REDAMANCEY 1

REDAMANCEY 

CHAPTER - ONE 

ZIAKTU : OLACEE RUSSEL 

Ka mu lai chu min ti harhtu awm ang mai hian ka harh kawk a, thawhphan pawh nei lo chuan ka thu chhuak hlawl mai, ka hawi kual a engkim chu ka mut dawna a awm ang vek khan a la awm,  eng nge hmuh ka inbeisei pawh ka hre chuang lo, thil danglam ka zawng a ni ber.

Ka mut thlak leh rual chuan thâwm ka hre ta, nichin aia chiang zawk mah khan ka harh a tih theih awm e. Hlauhnain min rawn man a, ka tha a khur nghal der der mai, chet nachang pawh hre lo in ka awm ngai chuan ka awm a, ka room kawngkhar chhung lama ka kalh chu ka melh ngar bawk.

Hriatpuia ka ngaihtuah chhuah rualin room leh lama a mu mai mai pawh ka lo thlamuanpui thinzia ka hre chhuak. Ani te chu naktukah a rawn haw chauh dawn tih ka hria, chu pawh an hna an zawh fel hman chuan tih chauh a ni, Lungleiah hna pawimawh a awm thut avangin a zin a, ni thum lai a châm tawh.

Mahse chu chu ngaihtuah hman pawh ka ni tawh lo, engtin nge ka tih tak ang, ka biru mai dawn nge ni a, ka sa him nan tukverh atanga zuang thlain ka tlan chhe mai dawn, ka zuang thla a nih vaih chuan ka thi a nih loh vêk pawn ka ruh eng emaw ber hi a thliak ang tih ka chiang. Chutia buai zet a ka rilru ka lo sen melh melh lai chuan thâwm bawk chu ka leh ta!

Kha kha eng thâwm nge? Ka beng chhe ri mai mai a ni lo tih hriat zet hian a ri leh rak rak a, thâwm lo chhuahna chu inhnuai lam a ni. Kan in leh a chhehvelah Sazu leh Zawhte an awm lo tih ka chiang, nge ni a an lo awm reng a ka lo hre lo zawk, rukru a ni ang ngem? Min that ta se , min khawih ta se, tih ang reng chu ka rilruah a rawn lut zut zut a, ka tha pawh khur nasa tawh tak a ni.

Inhnuai lamah chuan a khât tawkin thâwm a awm leh thin a,  pên thâwm ka hre a, step-a lo chho thawm a ni, a thâwm chu a dîm ve hle tih a pen muan danah a hriat theih, mahse ka tan chuan ring tak a ni thung. A lo hnai zel a, ka room pâwnah chuan a tawp chat mai. Thaw dep depin kawngkhar chu ka melh a, pên thâwm ka hre leh a, kalsawn thâwm a ni tawh thung.

Hriatpuia room lam a pan niin ka hria, a file pawimawh te kha lo ru ta se, emaw pawisa te, ka hlau thâwng nghal khawp mai, huain ngei thin viau mah ila ka pasal a ni miau a, a chhiatna chu ka chhiatna a ni ve bawk. 

Khum atang chuan zâwi muangin ka pên thla a, thâwm chhuah hlau zetin ke lâwngin kawngkhar lam chu ka pan a, nihliap sei tha zet banga kan khai chu inven nan tiin ka ban zui bawk.

Kawngkhar kalhna chu ka ban de de a, a ri zui khep mai, thâwm chu ka han ngâi châng leh a, engmah ka hriat zui tak lohah chuan dîmtein kawngkhar chu ka hawng a, ka lu chu ka rawlh chhuak a, light kan off vek avang chuan engmah ka hmu chiang thei lo a, ka room light  chauh chu eng awmchhun a ni a, chumi ring chuan a hmuh ve theih sawih sawih a, ka hawi kuala tumah hmuh ka nei lo. Hawng zau leh deuhin ka pên chhuak ta a, hmuh thut pawha vuak mai theih turin ka nihliap pawh chu ka kut pahnihin ka keng a, thlauh palh hlau zet hian nghet takin ka hum rân bawk.

Hriatpuia room lam chu thâwm chhuah hlau zet chuan ka pan them them a, ka ke khur nasa lutuk vang chuan ka pen chak thei lo thung, ka thlan fim a rawn bawl tual tual a, ka hawi kual thuak thuak reng bawk. Eng thil nge ka tawn ang! Eng nge thleng zel ang? Tih ngaihtuah chung chuan ka pan zel a, mihringin a thihna tur kawng hre reng chunga pan lui zel ang hi ka ni ber tawh.

A reh dan em em chu 'tumah an awm lo emaw ni' tia ka ngaihtuah lai mek chuan kawngkhar lama rawn pên thâwm chu ka hre leh ta a, bang lam chu ka hnaih nghal rawk rawk a, a lo chhuah vel leh a lo vuak tluk pawp tum chuan inring ránin ka lo châng a. Ka lung phu rang lutuk leh ka kut khur nasa lutuk chu ka hlauh vang a ni tih ka hria, mahse chu chu ka ngai pawimawh hman tawh lo, ka bei let lo a nih chuan a nunna hial pawn a tawrh phah thei tih ka hria.

Kawngkhar chu a rawn in hawng ta a, vaw nghal mai thei tur chuan ka lo inring tawh. A rawn pên chhuak chiah chu ka hlap nghal pawp pawp a, mipa rûm nghut rî ka hre zui nghal a, a taksa rem lai laiah chuan ka hlap a, "Keimah" lawm lo âw kâ zet a tih rîah chuan ka tawp chawt mai.Ka meng chhuak a, ka hmaa ding chu a hmel hmu chiang thei lo nângin a âw rî ka hriat a, a taksa ruangâm ka hmuh takah chuan tu nge a nih ka hre chiang hle tawh.

Tawng chhuah lawk nachang pawh hre lovin ka melh reng ringawt a, min lo melh chhuk ve run tih chu ka room atanga eng chaurau tak lo chhuak atang chuan ka hmu thei bawk, ka lungphu ranzia te, ka hlauh thawnzia te leh ka manganzia te ka ngaihtuah chhuah rual chuan ka thin a rim hle tawh, ka lung phu la su dup dupte avang chuan ngai ka la awh thei lo. 

"Tinge", thaw hawk paha ka tih chuan min en vang vang a, min chhâng ta mai lo chuan a bul lawk a switch chu a hmet ri khap a, a êng ta uar mai. Ka awmdan leh ka hmel a hmuh chian takah chuan a thaw hawk a, inthiam lo hmel ka hmu zui nghal bawk. Ka awmdan chu chiang zetin min en a, ka nihliap ken chu rawn banin, bang nghen chhan chuan a tung a, a tlu rî ka hre zui nghal zat bawk. Ni e, kei pawh nihliap ang mai hian ding nghet thei loin ka tlu ve lo chauh tawh.

Ka kutah rawn kaiin a room bul lawka hall, inleng pawimawhho a kawm thinna lam chu min pan pui a, sofa-ah chuan thuin min pawt thu ve nghal a, "Ka tihpalh ka tihlau che a", a mit mengah chuan min ngaituahna niawm tak ka hmu a, mahse a reh leh vat a, ka hmu sual zawk pawh a ni mai thei, a rei lo lulai em bawk a, chhâng lo chuan ka lo melh reng ringawt a, a hmai chu ka han en chiang deuh a, a lo khem ve nuai mai, a taksaah pawh chuan na a nei nualin ka ring, na tur khan ka hlap miau a, tha tawpa bei ka ni bawk a, ka inthiam lo ve deuh tawh. Mahse a chet dan ka ngaihtuah chhuah rualin ka inthiam lo rei lo hle.

"Naktukah i rawn haw chauh dawn emaw ka tia", pangngai tum takin ka ti a, a ri chhuak pangngai viau chuan ka hre bawk. Nichina ka hlauhthawnzia leh ka thirimna vel sawi chhuah ka tum hran lo, hmeichhe der dep tak anga lan hi ka thil duh lo ber a ni. Ani lakah lek phei hi chuan tihlan ka tum lo leh zual, nakina min nuihzat leh na tur mai mai a ni tih ka hrechiang.

"Vawiinah ka zo thei leh ta sia", a chhanna chu ka duh khawp lo ngang mai. "I rawn haw dawn tih i rawn sawi lâwk thei lo em ni", inring hman lo in ka ti chhuak a, ka inchhir nghal, a call beisei lutukah min ngaih ka hlau a ni, a ner nawk hmel ka hmu zui nghal zat. Nichina boruak dam raih kha a bo leh vek tawh tih chu hrilh hran ka ngai lo.

"Ka rawn call che khan la duh ni la chuan i hre tur a nia" âw nel awm loh zet leh ngei awm rawng kai lek lek chuan a ti hmuk a, tlaiah khan a missed call ka hmu tak, a pawimawh viau chuan a rawn call leh mai ang ti khan ka call back duh ta lo kha a nia, mahse sawi lan ka tum hran lo. "Rawn call ni la chuan ka pick tur a nia" a tawngkam ang bawka ngei awm chuan ka ti ta kher a.

A mitko a sán ralh a "I hriat chhian kha" ti leh hmukin a tho zui a, inhnuai lam panin a kal zui nghal nal nal, a tukkhum chu rum zetin ka melh reng ringawt, ka han ngei thar leh em em khawp a, nichina a chet dan te ka ngaihtuah chhuah leh lek phei chuan va thawh lawka va vuak leh pawp tur em maw ni.

Kal kawngah a rawn in ei puar dawn lo tih ka hriat chian em avang chuan zâwi muanga thoin inhnuai lam pan chuan ka kal a, a hming maia a nupui ni mah ila inchhung chêt lamah hi chuan ka tih tur ang hi chu bawhpelh ka tum lo a ni, hmeichhia ka ni tih hi ka inhrechiang em bawk a.

Step-a a ka chhuk thlak lai chuan choka a a lut tur chiah chu ka hmu hman a, tlaiah eirawng ka bawl lo tih ka hriat chhuah rual chuan ka thaw nghal hawk mai, a zin emaw chaw ei chhuahna tur a neih hi chuan thingpui leh chhangin ka inhnawh puar mai thin a, chocolate ka ei tel ngei ngei bawk thin. Zanin tlaiah te pawh rawn sawi lâwk se chuan ka lo bawl ve mai tur a nia, oh ni tak a call ka pick lo.

Ka va luh chuan a lo hawi kual thuak thuak a, fridge chu a hawng a, chawhmeh a zawng a ni mahna, a duh a hmu lo tih hriat zet hian a khar leh a, ka lo ding ve reng chu min hmu awm pawn a awm lo. "Tlaiah eirawng ka bawl lo a", ka ti sep a, ka tum loh deuhin ka âw rîah chuan inthlahrunna a tel, ani pawn a hriat hmaih ka ring bik lo.

"Okay" thingpui bel awmna lam chu a pan zui zat a, rang zet a va lak khalhin gas on chuan ka chhung zui nghal a, a ni erawh chair-ah chuan thuin a laptop- a lo en leh daih tawh, a chhuk khan engmah a keng si lo a a dah sa a nih ka ring. Polite taka eirawng kan bawl chawp mai dawn mi tia zawh pawh ka peih lo, a chhanna tur ka hriat sa vang a ni. Ka thingpui chhuan a so chuan ka siam zui nghal a, a hmeh tur pizza nen chuan a hmaah ka chhawp sak a, ani erawh chuan thil a la type mual mual thung.

A lo haw tirh khan ka lo en chiang tawk lo nge ni a hmelah chuan chau hmel a lang a, a lang pawr deuh fap bawk, a mit hnuai a val kalh a, a va kalnaah khan a mu miah lo em maw ni. A hmel rum lam mah chu a inhmeh zawk emaw tih tur a ni a, a sam awmze nei zeta a mehtir, a uluk thin em em pawh a thur ve deuh a, mahse chung chuan a ti pa zawk ka ti ve tlat thung. 

Hmeltha vul chuk tia sawi tur a ni lo a, mahse hmeichhe lamah a tla na viau tih ka hria, nupui nei lai a ni tih hre reng chunga hêl ngar ngar duh tawk lah bo lo, a sang thain a lian em em a, a taksa chu a uluk tih hriat zet hian thau chhia engmah a nei lo bawk, chu mai bakah a hausain a la hlawhthing em em zui. 

Mizo zingah an chhungkua hre lo hi an awm ka ring lo hial zawk, thlahtu te atanga hausa an ni a, chhungkaw hung tak an ni bawk, an chhungkaw sumdawnna ringawt pawh a lian em em a, an unau zingah a upa ber a, a pi leh pu pawn an duat ber bawk, a cousin leh a naute pawn upa ber a nihna angin an zah em em a, an awm khawm ni khua pawn intithu hauh si loin a thu an ngai chang thap thin thung a, a nu leh pa, a pi leh pu thlengina an râwn ber a ni a, amah lah in uluk mi em em leh chhungte zah thiam tak a ni leh zel a, chu chuan a chhungte a tilawm leh em em bawk a, aaaa an tupa rangkachak ti ila ka sual sual tam lo ang.

An chhungkaw sumdawnna pawh atirah kha chuan a enkawl ve a, chu pawh a nu leh pa mai ni lo a pi leh puten an ngen vang a nia, mahse a tui ngang lo a nih tih an hriat takah kha chuan a duhna lam takah a kal kha an phalsak ta kha a nia, amahin a  kal hrang ta a, a taimakna leh a tumruhna a avangin a hlawhthing em em bawk, a ma thawhchhuah ngeiin bul atan a, tunah chuan mizorama hotel changtlung ber neitu a ni ta hial a.

An chhungkaw sumdawnna chu a nau mipa pahnihin an enkawl zui a, an ni pawh fing tak an ni, an te ber erawh hmeichhia niin a hrisel lo em em a, mahse ani pawh lawyer ngat kha a nia, hrisel leh dam tha ver vawrin han awm phei se chuan tun ai hian a la hlawhthing leh zual zawk ang, a khât tawk damdawiin pan ve reng leh kar chuang fe te chawlh ngai khawp a a dam loh chang a tam, chu ti chung pawn mizorama lawyer kan neih thatte zinga mi a ni tho a nia.

A cousin teho nena an inhmuh khawm ni khuate hian min hruai ve zeuh châng hi a nei thin a, mahse nuam tihna pakhat mah ka nei ngai lo, mi puitling tak vek an ni a, an ti ti duh zawng pawh a pui thei viau, thilho lam mai mai hi an buaipui lo a, mahse han rik ve bep bep chang chu an nei thin, an awm khawm tawh chuan mizo an ni ta lo emaw tih mai tur hian hnamdang tawng an hmang uar a, thiam pawh thiam tak an ni, english leh hindi in an tawng pawlh nawk nawk zel.

"Ka hmuhnawm viau a ni maw", tih rîah chuan ka harh zawk a, ka lo en reng chu niin, a va zahthlak mai mai tak. Ka ngaihtuah a zawng hi hmuh tlang vek a tum emaw tih mai tur a chiang hian min en a, ka zâm chhe lek lek a ni, "Chutiang i nih pawh ka hre hran lo e", ka zahna leh zâmna thup tum tak chuan ka ti a, thil ka ngaihtuah nasatna lamah thingpui a in zawh lai reng reng ka hre lo, ka en chuan no a lo ruak huai tawh a, pizza pawh a ril a tam ve viau a niang nidanga ei tha peih mang lo khan a lo ei ve teuh kha.

A eina chu seng felin ka sil zui nghal a, ka sil zawh chuan chair-ah bawk chuan ka va thu thla leh a, min rawn melh zeuh a " I la mu dawn lo a mi" a ti a, banga sana intar chu ka melh zeuh a, dar 2 a lo pel fel der tawh.Room lam pan tur chuan ka tho zui nghal a, "I la mu ve dawn lo a mi", tia ka zawh chuan a zawh tep thu leh a zawh huna a mut ve mai tur thu a sawi a, keipawh inchung lam pan chuan ka kal zui nghal a, ka thil tawn a vang khan chapal ka bun lo tih pawh ka lo hrechang leh tawh lo.

Puitling pahnih chiah cheng ta na na chu hnawk rem rumin ka awm khât hle a, a ti hnawk tur kan awm lem lo bawk. Mahse inchhung hi chu a khât tawkin ka tifai reng  thung. Kan inneih hma khan awmpui langa kal hi a nei thin a, zingah kalin rawng a bawl a, chhunah in te tifaiin tlai eirawng bawl zawhah a haw leh mai thin a. Ka inneih atanga thla hnih hnuah kan ban ta kha a nia. 

A chhan pawh ni lengin inah ka awm a, engmah tih tur ka nei ngai bawk si lo, han len khaw thawn ve dawn pawn Aizawl khaw pâwnah daih kan awm a, kan in leh a chhehvel bak ka thleng peih ngai si lo. A hnena ka sawi tirh pawn bân kha a rem ti lo viau a mahse, keimah ngeia in enkawl ka duh thu leh hmeichhia ka nihna ang taka ka hna leh mawhphurhna a nih thu ka sawi takah kha chuan rem a ti ve ta kha a nia.

In tihfai leh mahni duh ang taka han rem kual te hi ka nuam tih zawng tak a ni. Kan in hi a lian a, chhawng khat niin room tin te hi duhthusamin a zau tha em em vek bawk a, inhnuai lamah ringawt pawh pindan awl pahnih lai a awm a, chu bakah gym room a nei hran thlap bawk. Library room nei bawkin tah chuan hna pawh a thawk nghal mai thin a ni.

Room ka luh chuan bathroom-ah ka lut tlang nghal a, insil tum chauh a lut ni mah ila, ka thawmhnaw te hlipin ka inbual nghal law law a, geyser pawh ka on buai peih tawh lo, tui vawt zetin ka in phuhtir a, ka dai nghal sawng sawng thei, rei inbual tawh loin bathroom atang chuan bathrobe inbelin ka chhuak a, ka thawmhnaw bawn chu hawngin t-shirt dum thawl deuh taka ka hak thin leh payjama var chu ka la chhuak a, ka inthlak zawh chuan ka mu nghal than mai. Ka phone ka bana han en mai ka tum nak chuan battery a lo sen vat mai a, charger lak tum chuan ka tho leh rih a, ka charge zawh chuan ka mu leh ta a. Muhil mai thei lo chuan ka mu meng kar a, ka suangtuahnain ka hun liam tawhte ka chhui kir leh ta a .

End of Chapter One.