REDAMANCEY 8

REDAMANCEY 

CHAPTER : EIGHT 

ZIAKTU : OLACEE RUSSEL 

"Lalrin i hman em, Harold-a tlai dawn nia",  Mami chuan a rawn ti lut lang lang a, Bawihtea neck tie awrh thattir mawlh mawlh pah chuan ka hman tep thuin ka chhang a, ka dan ngai te bawkin ka fapa chu nitina ka hrilh thin chu ka hrilh leh mawlh mawlh tawh a "Bawihte mi tihbuai hmasak loh tur aw, schoolah harh miah loh tur a ni bawk a, zirtirtu te thu awih hle bawk tur, miin an tihbuai hmasak che chuan vawikhat tlawm a tawk ; vawikhat i hnar ang nga an la cho viau che chuan chak ngei ngei turin i tang tur a ni, mahse mi tihbuai hmasak loh tur", ka ti mawlh mawlh a, hrethiam tak tak ve niawm hian a lo bu ve nghauh nghauh a.

"I fapa hi chu i chuang ve alawm, fighter nihtir hi i tum em maw ni", kan thusawi hre pha tih hriat tak hian Mami chuan room pawn lam atang nui ar ar pah chuan a rawn ti lang lang a. Kei pawn ka thusawi chu a dik lo tih ka hria, mahse a inven dan tur ka hrilh niah ka in ngai, miin hnuai chhiah taka an biak ka duh lo a, kei ang chiah a mi thu hnuaia kun mai mai tur ang khan ka phal lo bawk. 

Lalruatsanga niin kum 4 a ni ve tawh a, vawiin hi kharkhat a school kal ve na chiah a ni bawk. A mit, a beng, a hmui a pa chiah chiah a ni a, miziaah lah a la chhun em em bawk. Hriatpuia ka chhuahsan atangin kum 5 a liam leh tawh a, mu leh mal nei lo a thla thum tawp ka awm hnuin ka pum chhungah naute chuan min chhan chhuak a, dam leh châkna ka neih phah a, chutih hun chhung zawng chuan Mimi hian min buaipui a, a ni hi nu Muani restaurant-a ka thawhlaia thawk ve tho kha a ni a, a hunlai kha chuan ka kawm ve ber a ni a, nu Muani boral hnua hna dang kan thawh tak vang leh ka awmna ka sawn zui tak daih vanga inbe pawp ta lo kan ni. Bawihtea erawh Ruatsanga tia ka koh mai zel laiin Mami erawh chuan Harold a ti kher zel a, a star pa a nih ka ring deuh mai.

Mami te hi chhungkaw harsa tak an ni lo a, a nu leh pa pawh sawrkar hna thawk ve ve an ni a, restaurant-a a thawh chhan tak erawh kha chu chhungte tibuai lo a, mahni intodelh a tum vang a ni a, tunah chuan kan veng high school-ah a thawk ve mek a ni. 

Hriatpuia in ka chhuahsan hnu khan kan intawng hlawl a, ka harsatna te hrilhin inluahtur ka mamawh thu te ka hrilh nghal a, min puih a lo inpeih em em a, an inhnuai an siam mek thu leh an siam zawh veleh a ka luah theih tur thu a sawi a, ka tan thian tha tak a ni zui ta a.

Khang thla 9 chhung, Ruatsanga ka pai chhung zawng khan Hriatpuia theihnghilh tumin ka bei a, mahse ka fapa hmel ka hmuh takah erawh ka theihnghilh ngai dawn lo a ni tih ka hre ta a, chuta tang khan hre reng chunga palzam ka tum ta zawk a ni. 

"Anu ka kal tawh ila", Ruatsanga tawng rîah chuan ka harh zawk a, mit meng fiah zet hian min lo melh kiau a, mak ti hmel a pu deuh bawk, nuih var var pah hian a chalah chuan ka fawp vang vang a, room kan chhuah san zui a. "Ka naute chu i va chhelo ve, hmeichhiate chu i zunah an uai hneh leh dawn mang e", Mami chuan Bawihtea chu a lo fiam a, Bawihtea pawn a lo nuih var var mai.

"He pa tak hi chuh, a len hun chuan hmeichhe ho an va la buai dawn tak, keipawh hei ka buai tan der mai", min en pah hian a leh a, a nuih leh hawk hawk bawk, a fiamthu tih hre mah ila "Ruatsanga hriatah khatiang kha sawi ziah suh, a ler hma lutuk ang", ka lo ti nur nang a. "Ka ti tak tak alawm, a hmel leh a mizia hi hmeichhe duh chi tak tur a nia", ka thu sawi ngai pawimawh lo zet hian a ti liam leh puat a, ka chhang zui tawh lo thung.

Scooty-ah chuan Ruatsanga phur chuan kan chhuak zui a, Mami pawh kan hnungah a rawn tlan ve bawk. Hriatpuia khan pawisa tam tham zet hi ka account-ah thlatin a lo thun ziah a, ka number ka thlak kha ka reset zui leh tak loh vangin message ka dawng lo a, ka lo hre lo mai mai hi a lo ni. A tirah kha chuan hmang duh loin a ngai ngaiin ka dah reng a, ka chungah a thil tih vang leh ka nun a tihchhiat manah tiin ka hmang ve ta kha a nia.

An school bulah chuan ka ding a, Mami pawn a thawhna school lam panin min pen san ta bawk. Kan in vai lauh lauh a, a naupang phu loh hian a puitling ve reuh a, nghah reng a ngai ve lo bawk. A fing a, a bulah phei chuan tangkam hman fimkhur a ngai zual em em a. 

Ruatsanga kum 3 a tlin khan hna ka zawng ve neuh neuh a, class 12 thleng chiah zir tan kha chuan a lo vang tawh si a, computer te ka han zir chawp leh lawp lawp a, vanneihthlak takin Mami pa hian an office-ah LDC hna a ruah thu a sawi hlauh mai a, min sawipui nasat em vangin min la ta kha a nia. Chu chu ka ei zawnna a ni deuh mai a, thlawh pawh a chhe hran lo a, kan ei khawp chu kan hmu ve mai zel.

Ruatsanga school hruai a ngai thin si a, kei duh hun hunah ka vang thei si lo a tiin, Bawihtea school kal hruai tur hi awmpui ang deuh hian ka la ve a, ka hna van hma zawng inah a lo awm a, ka ban veleh a haw ve leh mai zel a, mi rin thlak tak a8 ni bawk nen ka duhsak ve viau thin. Hna ka thlen chuan office dawr tur pawh an lo thahnem leh tawh viau a mai.

Tlai dar 4 a rik chuan kan office chu ka chhuahsan a, hmanhmawh deuhin hian la panin ka inkhalh haw a, a lo tap dawn lo a ni tih hre mah ila, keimah zawk hi ka awm thiam thin lo a, ka ngai nghal em em zel. In ka thlen meuh chuan dar 5 a lo ri der tawh, Bawihtea'n min lo lawm chul a, ka thil hawn sak ka pek chuan a lawm thiam ve viau mai.

Eirawng ka bawl nghal a, chaw hi chu Hlutei hian a lo chhuk mai zel a, chawhmeh erawh ka haw veleh ka siam mai thin a ni. Awlsam taka siam theih tur chi hi kan ei mai zel a, ka hautak lo viau mai, chawi ei dawn hnaiah chuan kam ram lam chi ei ka phal sak ngai lo a, chaw a ei that loh ka hlauh vang a ni, thu pawh a awih ve viau mai.

Chaw kan ei kham chuan homework ka tih pui a, anni pawl angah chuan pencil control zir chiah hi an homework a ni deuh mai a, chu erawh a hnehsawh ve tawh viau, school a kal tan hma atangin alphabet a thiam chhuak vek tawh a, number pawh 1 to 50 thleng a thian der tawh. Tunah rih chuan lehkha zir nuam a la ti viau mai a, a len hnuah eng tak ang ang maw.

Lehkha kan zir zawh chuan thut thlengah thuin phone-ah  'Beauty and The Beast', ka en pui a, hmuhnawm a ti ve viau zel. Vawi engzah nge kan en chhuah tawh pawh ka hre lo e, a kham thei lo chu a nih ber hi. Hmuhnawm ti deuhin a en a, keini ani ka lo en thung a, nau ka pai tih kha Hriatpuia ka hrilh hman ta lo a nih kha, khatiang teh hrep kha chu nin o ila, ka fapa hian pa a nei ve tur, 'i pa a thi tawh' tih zawng a a pa chanchin hrilh ka duh lo a, a pa chu mi tha tak angin hria se ka duh a ni, thil hrethiam rual a nih hunah chuan zawhna a nei ve ngei ang nga, chumi tana lo inpuahchah lawk chu ka tih theih tawk a ni tih.

Ka ngaihtuahna chu duh loin ka lu ka thung nar nar a, ka fapa kan en nak chuan a movie en a lo mutthluk san daih tawh hi a lo ni. Ka off sak a, dim te a pawm kangin khum lam ka pan a, ka mut thattir hnu chuan a chalah ka fawp vang vang a, ka kianga a awm vang hian ka hlim a ni, ka ta liau liau ni tura a lo piang pawh hi ka lawm. Dinhmuh chhe bera ka din lai pawh khan  inchhirna pakhat mah ka nei ngai lo.

Hriatpuia chanchin engmah hriat zawn ka nei lo a, nupui a nei ta nge pawh ka hre chuang lo, an chanchin ka hriat theihna tur tawh phawt chu ka hawi san a, ka number ka thlak zui a, social media-ah lah ka deactivate vek bawk, ka tum bawk a, hre lo tak ka ni. Ka chunga hetiang thil a ti hi rin harsa ka la ti a, zawhna tam tawk ka inzawt thin bawk, 'eng nga ti nge?' Tihah bawk ka tawp leh mai thin a ni.

Mu tura ka inpeih meuh chuan dar 11 a hnai kuar tawh, phone pawh en peih ta lo chuan Ruatsanga kuah chungin ka muhil zui nghal a. Ka harh leh meuh chuan ni a lo chhuak der tawh a, ka tho zui nghal a, ka inphih fai zawh chuan, Ruatsanga fai tho tur chuan roomah bawk ka let leh a, a la mu tui viau mai, ka koh ka koh takah chuan phak zet hian a rawn tho ve tiah tiah a, meng mang lo hian "kan kal tawh dawn a mi", a rawn ti a, "Kal dawn chiang, le inphih fai ang le", nuih hak pah hian ka lo chhang a.

Kan inphih fai zawh chuan walk turin kan chhuak nghal a, nikum lam atang khan zingkar walk kan ching thar ve a, a nuam kan ti ta phian sia, heti hian zingtin kan inzui ve hnak hnak zel mai a ni. Naupang tih takah thui erawh a kal tha peih ngai lo a, a rei berah minute 15 vek chu min tibuai loin a kal thei lo, haw lam phei chu kan inpawm leh daih tawh zel.

Kan let leh lamah chuan a ti ti ve barh barh a, a school kal chanchin te chu a sawi ve a, phur tak hian ka lo sawipui a, a rih ve deuh tawh avangin ka pawm tha deuh vek bawk. Thui tak kal kan ni lo bawk a, in pawh kan thleng har lo, kan inbual nghal a, kan zawh chuan thawmhnaw dang hak tir tawh lem lo in a uniform chu ka inbeltir nghal a, artui leh cake chu thingpui nen kan hmeh zui a, a tiffin tur pawh ka siam leh thlap hnuah ka insiam zui ve nghal a.

Hriatpuia nena chaw kan ei mumal lo lutuk kha ngaiah ka nei a, tun thlengin zingah chaw kan la ei ta lo reng a, tlaiah erawh kan tih thin dan thoin chaw pangngai kan ei thung. 

Ka insiam zawh chuan kal kal ta nghal a traffic jam-a kan tan chhung tur nen hun hman thiam a ngai em em a, ka rin ang chiahin jam-ah chuan kan tang rei leh hle a, school kan thleng meuh chuan tan hun a ri dawn hnai tawh. Ka hna lamah ka thlang veleh nghal a, ka va thlen chuan ka thawhpui pakhat a boral a ni tih ka hre zui a, nizan atangin phone ka la en miah lo a ni tih ka hre chiah.

Office erawh kal tho tur a ni a, mahse kan bang hma hle thung, kan ban chuan hun ka nei tho bawk a tiin Hlutei chu ka call a, vawiin chu lo chawl rih mai turin ka ti a, hna kan bang hma a ni tih ka hrilh bawk. La hma deuh mah se Ruatsanga te school la chu ka pan ta tho a, kal pen leh tur khan ka tlai palh ka hlauh vang a ni. An school kawtah chuan ka nghak ran a, an school awmna a rem bawk a, scooty park-na tur pawh ka hmu nghal mai.

Nghah pah chuan tiin ka phone chu ka phawrh a, group chu ka en zui a, kan thawhpui boral chung chang chu an lo sawi ngei a, Mami message chu open-in ka chhang zui nghal a, messages dang erawh chhan tum lo chuan ka out zui a, call list ah chuan missed call a lo awm a, number hlang niin nizan dar 11 vela a lo call-na daih a ni tawh a, a rawn call leh loh danah a pawimawh vak lo a nih ringin ka call back duh lem lo.

Dar 12 a rik chuan an lo chhuak ve ta tuk tuk hlawm a, Ruatsanga chuan min hmuh veleh hlim tih hriat zet hian a thiante pawh ngaihsak zui lo chuan a rawn tlan ter ter a, min rawh bawh nghal chuk chuk mai, ka kal avanga a hlimzia ka hmuh chuan ka inthiam lo hle ringawt. A riltam ringin restaurant-ah chuan ka chawlh pui a, burger a duh thu a sawi chuan milkshake nen kan pahnih ta tur chu ka chah a.

Tui ti zet hian ka ei a, kan tawng pah mawlh mawlh bawk, vawiin lam chanchin te chu a sawi leh barh barh tawh a, ka lo nuih pui ve hak hak mai. Chu tia kan ti ti mawlh mawlh lai chuan "min lo hrethiam lawk", tih thâwmah chuan ka hawi chhuak vat a, hmeichhe pakhat hmeltha zet mai hian nui sang hian min lo en a, a inchei dan pawh a zahawm khup mai. 

Ka hmehhriat a nih lem loh avang chuan ring hlel ru zet chuan "Keimah maw", ka lo ti hu a, mawi zet a nuih leh pah hian " aw ni e, ka lo thu ve thei ang ngem", a ti zui leh a, amah chu hre lo mah ila, hawihhawm tak hian "teh reng mai, lo thu", nuih let sang pah hian ka ti a. Ruatsanga bula chair chu a pawt chhuak a, a thu zui a, Ruatsanga chu a melh deuh vang vang bawk.

A awmdan chu chiang zet hian ka lo en a, a tawng chhuah hun ka nghak rán bawk, ka lam a rawn hawi chuan a nui leh sei a, a nui mawi tak zet a ni, a sam sei tak chu a ngil tha em em a, a thlah hniang bawk. "In dam em", a rawn tih chhun zawm a, kan dam thu chuan ka lo chhang ve mai a. Ruatsanga lam hawi chuan "Bawihte tunge i hming", nelawm tak hian a bia a, a che vel chu ka lo thlir reng a, hmuh a nuam tak zet.

"Ruatsanga", ka fapa lah chuan a lo tibul deuh hmuk a, ka lo nui hawk mai, chu hmeichhe hmeltha zet pawh chu a nui ve tho bawk. A nel tawh te bulah tawng duh em em, hmelhriat loh laka inkhar phui tlat mi a ni a, an biakna erawh bul tak tak hian a chhang ve zel tho thin. Hmelhriat loh laka fim khur turin ka hrilh nasa a, a zawm tha a ni tih pawh ka hria a ni.

"I fel hle mai a, i hmel a tha bawk si", tiin nelawm tak bawk chuan a be leh a, Ruatsanga tawngkam bul tak chuan a biak a thulh tir phah lo, a class zat te leh a ni hman dan te chu a zawt a, be rengtu na na na chu ahnuah chuan Ruatsanga pawh chuan azawhna chu a chhang tha ve ta viau, an inbe lai chu intibuai lo hian ka lo thlir reng a, a phone a rawn rik takah chuan a chhang zui a, an inbiak zawh rual chuan "ka tihpalh ka kal phawt a ngai, kan inhmu leh vat dawn nia tiin Ruatsanga a mangtha leh hnu chuan a kal zui a.

"Anu i thiante em ni", a rawn ti ta reuh a, a hmel chu ka en vat a, min lo melh kiau bawk, chhan mai dan tur ka hriat loh vang chuan ka bul ta nghut a, ni e, ka hmel hriat a ni em tih ka lo inzawh ve lai mek a ni. Tunge a nih ka hre lo a, a hming pawh a sawi chuang lo, a rawn kal a, mi hresa niawm takin nel takin min bia a, inhmuh leh vat intiam chungin a kal leh a. 

End of Chapter 8