REDAMANCEY 4

REDAMANCEY 

CHAPTER : FOUR

ZIAKTU : OLACEE RUSSEL 

Ka hmai niin a chhun en siar siarah chuan ka harh a, tho mai lovin ka mut ngaiin ka mu reng a, nizana thil thlengte ka ngaihtuah kir a, Hriatpuia ka hlap laite chu ka ngaihtuah let a, ka nuih a za ta tlat, mipa induh tawk tak leh pa ve tak, chhungkuaah eng pawh tih ngai se a thu an ngaihchân thap thin, a unaute leh thianteho pawna an zah leh entawn ve ber kha ka lo hlap ta pawp pawp sia, tlawmah a la ve ngawtin a nia ka rin ni.

Sana ka en chuan dar 8 a lo ri der tawh, tho chhuak vatin ka inphih harh, inthlak leh ta nghalin inhnuai ka chhuk meuh chuan dar 9 a ri deuh thuak tawh. Zing lamah chaw pangngai kan ei ngai lo a, ka hmanhmawh lutuk lo, zan lam erawh chaw ei ngei ngei a duh thin thung. Chaw hmeh a duh tui viau a, a ei tam ngai lo thung. 

Pizza oven-a ka tih lum hlanin thingpui ka siam a, a so hun ka nghah mek laiin Hriatpuia rawn chhuk thla thâwm ka hria a, no dang lain ka siam belh leh a, kar loah a hmel ka hmu zui nghal zat bawk, t-shirt var leh kekawr bul a ha a, chapal a bun leh tawp a, hmuh a nuam viau, a lang naupang deuh bawk.

 A hna thawk kal tur kamis leh smart pant nen thlapa a inthuam hi chuan a zahawm lutuk a, amah lah mizo paah chuan a lian pawl kan tih tur ang kha a ni ve sia, ka inhmu hniam chu ka ti duh hauh lo nângin ka be hreh leh zual thin a ni. Chair-ah a thu thla a, a phone a ri zui nghal zat bawk. Ka thingpui chhuan a so rual chuan thli chhuakin a hmaah no chu a in mai theih turin ka dah sak, pizza chu ka la chhuak leh a chu pawh ei mai theih turin ka chhawp leh a.

Ani erawh chuan phone a la hmang a, a tawngkamah chuan zaninah tih tur pawimawh an nei a nih hmel, an inbiak zawh chuan a eiin a in ve ta nghal a. In be lem lo chuan kan ei mawlh mawlh a, puitlingah pawh a tawng duh lo chi ve ve kan ni a, sawi tur kan ván thin khawp mai. 

Hriatpuia fel ve na em em chu kan inneih tirh khan mipa tih takah a in hi a chei mawi hran lo a, banga lem ziak nalh deuh deuh intar kha a ni deuh mai a. A thil lo rem tawh sa te ka ti dang lam na sa a, sawi sel a nei ngai lo, ka tih ang ang chuan a en liam ve mai thin a, ka kutah a dah ve deuh tawp tawh ni maiin ka hria, chu chuan min tihlim a, in nuam ka tih phah bawk.

Kan ei zawh chuan ka tifel a, ani erawh chu phone khawihin a lo la thu thung,mak ka tih deuh vangin ka melh leh zeuh thin, nidang ang chu nise hna kal tura insiam in a inpeih fel leh vek tawh awm sia. Ka sil zawh chuan choka atang chuan ka chhuak ta nghal a, niminah in ka tifai vek a, vawiin chu han tih tur em em pawh a awm tawh lo, awm awl tawp aiah tiin chhuat te chu ka han nawt leh a, kan in a lian ang reng si a, chhuat nawh chhung pawn hun a lo kal duai hman thin, ka uluk thin em vang a ni pakhat a, che vut vut chi ka ni lo a, ka che muang hran lo bawk.

Ka nawh zawh chuan living room-ah ka thu a, inchhung chu ka thlek kual a, fel lo lai leh tih hmaih ka nei em tih ka zawng a ni, ka hmuh tak lem lohah chuan hahdam deuhin thu chungin phone ka en a, kan inneih tirh khan Hriatpuia hian ka phone kha chhia a ti ve ngang a niang, a thar min lo lei a, a to em em leh nghal a, ka la inthlahrung viau nge nge.

Nizan a rawn thleng tlai bawk nen Hriatpuia chu hna a kal ta lo a, a room-ah a mu hahdam ve a nih hmel. Ka phone chu en tur hre lo chuan ka thai kual ka thai kual a, ka ning ta deuh chuan lehkhabu lain ka chhiar ta daih, engtik laiin nge ka lo mutthilh pawh ka hre lo, ka harh leh meuh chuan dar 1 a lo ri der tawh, thawh tuma ka inbeng kán chuan ka bul lawka sofa-a Hriatpuia lo thu run chu ka hmu ta, eng nge maw a hriat ni, tunlai chu min ti phu dawt dawt reng mai.

"Eng nge a", ka ti hluk a, lungphu tha lo te hi ka nei tep tawhin a nia ka rin ni, hetianga a awm zel a ni chuan ka hlap leh duh tak tak ang. "Chhuahna tur kan nei, zanriah pawh kan ei nghal ang", a ti a. "Ka lo kal ve lo thei ang ngem", ka ti sep a, a hranpain chaw kan ei chhuak ngai lova, kan ei chhuah tawh chuan a thiante nen a ni thin a, tunah pawh an tel leh ngei ka ring a, ka peih lo a ni .

Ka chungah an sual pawh a ni lo, tha tak tak vekin min bia a, an polite hlawm em em a, ka tâna hriat nuam lo tur zawng an chhak chhuak ngai lo, mahse chu chu keimah ka nih vang ni loin Hriatpuia nupui ka nih vangah ka ngai thung, ka rilru lam dik loh vang zawk nge phei chu ka hre lo. 

"Dar 4-ah chhuah hman kan tum dawn nia", tih zawngin min chhâng a, a kal ta daih. In chung lam pana a kal chu ka enzui tawp a, a tih tawh chu engmah a sawhsawntir theih loh, chu chu ka ning viau bawk. Ka ril a tam deuh tawh avangin choka-ah chuan ka lut a. Ka in ei puar zawh chuan room-ah chho ta nghalin thawmhnaw suksa ho chu ka dah fel a, ka thuamhnaw leh Hriatpuia thuamhnaw ho chu ka thliar hrang vek a, ka ta zawng ka thawmhnaw bawma ka khung fel hnu chuan Hriatpuia thuamhnaw keng chung chuan a room lam chu ka pan a.

Kawngka ka kik dat dat a, a rawn hawng a, a phone chu a bengah a dah a, a tawng pah mawlh mawlh bawk, "Hei ka lo dah dawn a", ka ti a, a tawh sawn ve mai bawk, lut ta nghalin a thawmhnaw bawmah ka dah sak a, ka rem zawh chuan a room chu ka melh kual a, mipa che fel thlip thlep a ni lo a, a towel khuma a dah tawp chu la kangin balcony-ah chuan chhuakin ka zar ta nghal a, a zinnaa a ken a bag a ngai ngai a la awm chu phawrh ta nghalin a thawmhnaw ho chu bal bawmah ka dah a, a pheikhawk pawh a remnaah ka rem thlap bawk.

A room hi ka ti fai ziaha hnawk rem rum chuan a awm ngai lo, ka chet chhung zawng chuan ani chu phone hmangin a buai hle a, min uksak lem lo bawka ka chet ngaiin ka che mawp mawp a, a thawmhnaw bal hi chu naktukah ka su tawh mai ang, ka chhuah dawn thleng pawh chuan ani chu phone hmangin a la buai hle.

Sana ka ken chuan dar 3 a lo ri der tawh a, peih lo viau mah ila ka kal tho a ngai tih ka hria, bathroom-ah chuan lutin ka inbual a, ka chetna lamah thlanin min bual huh deuh bawk nen, tui vawt a ka inphuh tir meuh chuan ka dai sawng sawng thei, ka inbual zawh chuan ka insiam zui nghal a. 

Darthlalangah chuan ka inen a, kawr ka taksa phuar lam mah ka ha a, ka kawng fek rat mai pawh a lang chiang tak zet. Smart pants dum ka ha leh tawp a, pheikhawk heels sang lutuk lo ka bun a, ka sam erawh tih vak ngaihna hre loin ka thlah mawl tawp thung, ka vannei a engmah ka hnawih loh pawn ka vun hi a nung sar reuh a, tunah erawh engmah hnawih loh tawp aiah tiin ka hnawih ve tâk nual kha. Keima tawkah nalh ka inti ve viau.

Kan thlen meuh chuan dar 7 a ri der tawh, Bon Appetit kawtah chuan motor a ti dinga, ka chhuk a, ani'n motor a lo park thung, an thian then khat hmun danga awmho an lo haw a, chumi lawmna ni pah fâwmin thianho chaw ei chhuah an rawt hi a lo nia, kawppui nei tawh an awm nual a, chungte pawh chuan an nupuite an hruai ve dawn a ni awm e.

"Lut ila" tih pahin min rawn melh a, kan kal zui nghal a, kan va thlen chuan an lo thu khup tawh a, an lo tawngmawp mawp tawh a, keini pahnih min hmuh rual chuan "saw an lo thleng alawm", "in va rei ve", an lo ti tliar tliar hlawm a, ka bula mi lah chu ngawi reng hian thutna awlah a thu thla a, a duh lo chung hruai lui hi ka ang zawk. A bula thutna awlah chuan ka thu thla ve nghal a, chaw kan ei ho zeuh zeuh tawh avangin a tam zawk chu ka hriatsa an ni a, an hming ka la hriat loh te pawh chuan an hmingte sawiin min lo be sap sap hlawm a.

Thianho inhmu khawm e ti lo chuan hna lam chungchâng ngawt an sawi a, kal ka phur loh sa nen ka ning ngawih ngawih tawh ka hmelah erawh lan chhuahtir loh hram hram chu ka tum ve a ni, ka awm dan chu hrethiam ni awm tak hian Hriatpuia chuan min lo be leh zeuh thin. Kar loah zanriah kan ei ta nghal a, an thil siam a tui hlawm viau mai, Hriatpuia chuan chaw hmeh ka neih loh nia a hriat te chu min lo suah thin a, mi hmuha mawi a zawng pawh a ni mahna, mahse chu chuan min ti hlim tlat a, mi hmuha min ngaihsakna a lantir te chu nuam ka ti.

Zanriah kan ei zawh chuan thut khawmna hall lamah kan phei ta dial a, an thu sang sang a, kan la haw hmel loh na sa mai. He lam erawh a dan a dang ta, mipaho chuan zu no an dawm far a, an ri pawh a ring ta viau, Hriatpuia pawn a in ve a, ani erawh a tak rán thung, a thiante ti ti kar lakah chuan a tawng ve leh zeuh thin tih loh chu a ngawi ngul a. 

Zu rimin ka hnar a verh a, uak lo turin ka insum hrâm hrâm a ni. Hriatpuia chu washroom-a ka kal tur thu ka hrilh a, a ni pawn a awmna lam min lo kawh hmuh ve thuai bawk. Kal ta nghalin washroom ka thleng chu ka thaw chhuak hawk mai, sana ka en a dar 10 a lo ri der tawh. Hriatpuia hrilh ila lo haw hmasak mai tur em maw ni, midangho hi chu khaw chhungah awm vek an ni a, keini erawh kan in thlen nan pawh a lo berah darkar 3 tal a ngai dawn a, min hriat thiam tho chu ka ring.

Hall ka va thlen chuan hmeichhe pakhat a hmel ka la hmuh ngai loh, hmeltha zet mai hi ka thutnaah chuan a lo thu a, thawhtir duh lem lo chuan ka hnaih bera thutna awlah chuan ka thu thla a, Hriatpuia chu ka melh zeuh a, ani pawn min lo melh ve chiah bawk, a mitmeng chu ka chhiar thiam lo, a hmelah a lan chhuahtir si lo a, pawi a ti lo ni hmiang ka ti mai, pawi ti tura ka ngai ringawt pawh chu ka inhrethiam lo zawk.

Chu nu chu Ruaipuii a lo nia, Delhi-ah college a kal a, a graduate hnuah la awm khaw muang leh deuhin vawiin khan a rawn haw ve chauh a ni tih an tawngkamah chuan ka hrethiam a. He lai hmuna a rawn  kal chhan a sawi danah an thianho group-ah kan thlalak vel a lo hmu a, a rawn kal ve nghal a ni awm e. A ho ka ti ang reng, zan a tlai tawh ropui si.

 A sam sei tak chu a kir deuh a, make up pawh a inhnawih thiam tak zet, a hmui pawh a sen tha em em bawk. Kawrfual taksa ruangâm lang zet mai, a malte thleng vel hi a ha a, a pian a nalh bawk a, a inhmeh hle. A te chhe zawk zawk lo ang tih pawh a thu chung chuan ka ring thiam thei. A tawng mawlh mawlh reng a, a nui pah deuh bawk a, a tawng pah chuan Hriatpuia a melh leh thin a. Ka lo en ve reng bawk nen,  ka awmdan chu ka sawi thiam lo ka sa deuh pup pup mai.

Midang hriat ve hlau niawm tak hian Hriatpuia chu thil a hrilh leh thin a, a awm danah chuan a hlim tak zet a ni tih a hriat theih, Hriatpuia pawh chuan a thusawi chu a lo nuihpui ve leh sup thin. Mipa awm ve dang ho chu an rui ang reng tawh bawk nen an aw rawl a ring hlawm tawh viau a, an ni pahnih chu tu vakmah chuan an uksak lo bawk bawk. Hriatpuia chu haw mai ka duh tawh thu hrilh ka duh viau na in ka be hreh deuh tlat .

Mipaho chu zu rui tih takah an thu sawi pawh a nawi hlawm tawh viau, an thiante chet chhiatnate leh chu mi kha mi chu ka chhuahpui tawh tiin, mizo zing model hlawhtling tak tak te hming chu an sawi a, an âwkiah chuan chungho an ngaihnepzia ka hre telin ka hria. Ka rin an pha lo hle bawk, an line-ah hlawhtling tak tak vek an ni a, mite ngaihsan leh zah kai an ni thup hlawm bawk a, mahse mizia azawnga thing ka tih ber neitute an ni hlawm thung. Chutiang mizia an neih avang chuan ka hmusit ru hle hlawm bawk.

"Ruata a thar a mi", âw lo chhuahna lam chu ka hawi nghal vat a, Ruatpuii chuan nui sâng hian min lo melh a, Hriatpuia chuan min lo melh ve chiah bawk. Ka bula thu Ruata lah chuan ka lama rawn âwn deuh pah chuan " Ni e le, a hmeltha i ti em", a ti a, ka darah a rawn kuah zui zat bawk, a fiamthu tih hre mah ila ka lawm hauh lo, a rui tawh hle tih hriat zet hian a tawng buh nuai a, a zu rim chu ka ti thei lo hle bawk

"I duh zawng a va dang ta ve", nui uar uar pah hian Ruatpuii bawk chuan a ti a, midang ho pawh chuan a fiamthu tih hrethiam in a lo nuih pui ve a, ka tawlh sawn rual chuan Ruata pawn hrethiam ve niawm takin a kut a la sawn a. Freddy-a chuan "Ruatpui, Ruata te chuan hmeichhe innocent deuh deuh a duh tawh alawm", a rawn ti a, a âw pawh a ring lam hret a ni.

"Ruata chu bialnu thar neih vang mai zu han in duh tawh loh", a rui tawh hle tih hrethiam zet hian William-a'n a rawn ti zui zat bawk, a ni pawh a bâng chuang lo. Midangho chu an nui ring zual sauh a, Ruatpuii pawh chu nui ring tawh tak a ni. A nuam ka ti lo tak zet tawh, an vai mai chuan fiamthu thawh nan min hmang niin ka ngai a, ka rilru a na hle bawk. Hriatpuia chu ka en a, min lo melh ve chiah a, a ngawi ngul chuan ka rilru a tina zual tak zet.

Emily chuan ka awm dan chu a hrethiam a ni mahna " Duh tawk teh u, khatia nuih chiam chiamna tur a awm loh kha", a rawn ti a, ka en nghal vat a, ani erawh chuan Ruatpuii chu thip zet hian a lo melh thung. A awm dan over lutuk chu a lo ngaithei bik chiah lo a nih hmel. Freddy-a bawk chuan "khatiang huat tur a awm loh kha, a rilru tet thlak lutuk", meng mang lo chuan a rawn ti leh a, "Eng nge ka bialnu thar neih chu in buaipui chiam a", Ruata bawk chuan a rawn ti leh a.

"I bialnu thar a ni em ni", âw hriam takin a rawn tih chuan thâwm chu a reh nghal duk a, Hriatpuia lam chu kan hawi nghal thap bawk. Thinrim insum tih hriat zet hian a kut chu a hum nghet em em a, a beka thisen zam pawng tawlh tawlh pawh ka hmuh hmaih lo kher mai, a bula mi chuan hamhaih zet hian a lo melh ve bawk.

Rawn ding chhuakin ka lam a rawn pan a, ka kut chu rawn banin min pawt tho a, ka dara kuah pah chuan "Ka nupui hi fiamthu thawhnan in hmangin, a chanchin hi a tha lo zawngin in sawi tawh tur a ni lo bawk, thleng nawn tawh suh se", a ti nghet charh a, a thusawi chuan min thlamuan tak zet, a sawi chhung zawng chuan nghet takin min kuah a, thâwm chhuah reng reng an awm tawh lo.Hriatpuia chu ka melh chho ha a, a ni erawh chuan midangho chu chiang zetin a lo melh thung, a hmelah chuan a tih takzia ka hmu thei. "Nupui a", Ruatpuii chuan mak ti zetin a rawn ti chhuak a, thip zetin min melh zui zat bawk.

End Of Chapter Four.

Ps- Ka thawnthu ziah min lo chhiar sak avangin in chungah ka lawm em em a, in comments te hian min tiphurin min tihlim em em bawk. Amaherawhchu in beisei ka pha lo ang tih ka hlau em em a, thawnthu chhiar ve thin tho ka nihnaah hian 'hei chu he ti lo zawng deuh hian ti se aw' tih châng ka nei thin a, ka rilru leh suangtuahna lamah ka her danglam fo bawk.

Thawnthu ka vawikhat ziahna a ni a, tawngkam dik lo leh fel lo lai te a awm a nih chuan, comment lamah te lo sawi ula, ka insiam that zel theih nan. In beisei ka pha lo deuh a nih pawn 'hei chu a vawi khat ziahna chauh a nia, beisei sâng lo mai ang', tiin min lo hrethiam hrâm hrâm dawn nia.