REDAMANCEY 5

REDAMANCEY 

CHAPTER : FIVE 

ZIAKTU : OLACEE RUSSEL 

Ruatpuii zawhna pawh chhâng ta lo "kan lo va haw hmasa ang nge", a ti sup a, ka kutah nghet zeta kaiin min chhuahpui a, ka kut a vawnna lah chu a hmer nghet em em a, tianga a thinrim hi ka la hmuh loh avangin ka be ngam lo a, min kaih ang ang chuan ka zui ve tawp mai a ni. He ti  em em a a thinrim hi ka lo beisei lo a, eng ber khan nge tithinrim ka hre lo bawk, nge ni a a nupui fiamthu thawh nan min hmang chu a lo zak viau zawk nge ni! A chhan chu eng pawh lo ni se ka thlavâng a hauhna ringawt pawh khan min tilawm tawk em em tho. 

Motor chu chak zet hian a kalh a, ka hlau lutuk chu ka kut ka hum ruh hle a, ka mit ka chhing ta daih bawk. Motor ding dat thâwmah chuan kan thleng tawh a nih ringin chhuah ka tum a, "Ka tihpalh", a rawn ti zawi ruih a, ka hawi chhuah chuan kawngsirah motor a lo tiding hi a lo nia. A hmel chu ka en vat a, inthiam lo hmel tak tak hi a pu a, min en loin hma lam a en daih bawk. "I thiam loh a awm hleinem", ka ti a, ka tum vang ni hauh lo in ka âw a lâwi rut mai.

"Ka tiam a che, a thleng nawn tawh lo ang", mit meng thuk zeta min melh pah chuan a ti a, chhang lo chuan ka lo melh reng ringawt. Dim deuh tak hian ka khabeah rawn vuanin min kuai dak deuh a, ka inrin hma chuan a hmui lum ham ham chuan min rawn fawp ta a, chetsawn nachang pawh ka hre lo, dimte hian min fawp a, a duhthawh tial tial a,lo dang tur ka ni tih ka inhria a, mahse ka thei tlat lo,dang turin chakna ka nei thlawt lo niber hian ka hria. A rei hnuah phei chuan duhthawh tak hian ka fawp let ve a, chu chuan phurna a pe niawm tak hian a duhthawh zual sauh a.

Rei ngial kan infawh hnu chuan harh chhuak thut ni awm tak hian ka in la hrang a, ani pawh a lo insiam rem ve vat a, min en chuan a nui suk a, lai zet hian ka lo hawi sawn a. Kan boruak tang at kha awm tawh loin a daiin a dam raih a, nichina thil thleng vang khan ka la pangngai hlei thei lo a, ka biang chu a sa hat hat bawk. Ka melh leh zawk thin a, a motor khalhah ngawt chuan a rilru a pe a, thiam taka a stearing a han herh kualte chu a hmuhnawm ka han ti thar em em bawk a.

Ka mi hmuh avang chuan ka meng phawk hle a, tawng lawk nachang pawh hre lo chuan ka melh reng ringawt a, rapawm zet chuan min nuih a, "i lo dam maw", a ti vawt ruih a, a hmel chu nunna nei tawh lo tih hriat zet hian a dâng bel bawk. "Tlankim nang hetah maw", ka tibah nawk a, a nui hawk a "ka chhuah zalen che i ring reng reng em ni? Ka ta i nih loh chuan tuman an nei bik lo ang che", tih pah chuan a tlakna khâm lam pan chuan min pawt a, ka taksa chu a khur nghal der der a, duh lo zet hian ka lo tang ve bawk.

Min hnuk titih tawh a, min thlah tur chuan ka ngen lawm lawm a, ani erawh chuan ring zeta min nuih pah hian min pawt na zual sauh a, kham pawh kan thleng ti tih tawh. Ka tap hawm hawm a, a kut te chu ka seh a, ka chum bawk, engah mah ngai lo tih hriat zet hian min nuih uar sauh a. "Nang hian min that a, nangmah vanga thi ka nih hi, i thi ve tur ngei ngei tur a ni", ring zeta tih pah chuan khâm lamah chuan min nam vak a, ka tla thla nghal vawn vawn mai. Mangchhia!

Ring zet hian ka au a, ka luah min sawi dawt dawttu an awm bawk, " Mate, i him a nia, i tha em?", a ti mawlh mawlh a, thlan in min bual huh vek a, ka lo tap chhuak hi a lo ni , ka khur nasa em em bawk. Hriatpuia chuan nghet zet hian min lo kuah a, khur hlawk hlawk chuan ka lo kuah let ve a, mumal lo zet chuan "tumah ka that lo, ka thah a ni lo, a mahin a tla, a chesuala", ka lo ti bah nawk nawk a, "ka hria, tumah i that lo, hahdam phawt rawh", tih pah hian nghet leh zual chuan min kuah a.

Ka taksa khur a ziaawm deuh hnu pawh chuan min la kuah ta reng a, chu chuan min thlamuan a, tal chhuah pawh ka tum buai duh lo, him hliah hliah a inhriain hetiang taka thlamuanna hi ka la nei ngai lo. Ka hnunga chûl heuh heuh pah hian "muhil rawh ka lo veng ang che",  a ti sup a, chu nuam ka awm tinuamin kar loah ka muhil zui leh mai a.

Ka harh leh chuan keimahin chauhin ka lo mu tawh a, sana ka en chuan dar 10 a lo ri der tawh! Engtin nge tiang chen chen hi harh miah lo a ka mut theih le, Hriatpuia pawh chu min kaihtawh ve mai tur a nia, ni tak hnaah a kal daih tawh ang. Tho chhuak ta nghalin ka inbual a, inhnuai ka chhuk meuh chuan dar 12 a ri tep tawh, ka ril pawh a tam tawh viau. Nizan thil thleng ka ngaihtuah chhuah rual chuan ka biang a sa hat hat a, ka hriat sual loh chuan 'Mate' ti khan min ko tlatin ka hria, min ko chiang alawm!

Thil ka ei mawlh mawlh lai chuan Hriatpuia chu choka-ah a rawn lut hlawl a, mak ti zetin ka lo en a, min en chuan a nui deuhin ka hria, ka thil ei ka la hmuam tun zui, ka lan dan tur chu ka ngaihtuah peih lo zawk! Ani pawh tun ang hunah te eng nge inah a tih ni, hna a kal daih tawh emaw tih laia. "I tha em?", tih pah chuan ka bula chair-ah chuan arawn thu thla a, ka thil ei hmuam tun chung chuan ka lo bu nghut nghut a, a nui leh tawh!

Kan eina ka sil lai chuan ka bulah a lo ding ve reng a, ka sil fai sa ho chu alo hru ro zel a, ka melh leh zawk thin a, ka nuih a za deuh tlat a nih chu. "Min en min en suh", a rawn ti sup a, a lai deuh bawkin ka hria, ka nui chhuak ta nge nge a, a ni erawh a nui tha duh vak lo, chu chuan ka nuih a ti za zual a. 

In chhung tifaiin ka che chhunzawn nghal a, mak takin ani pawh ka bulah chuan a tap ve chawt a, a tul tul te chu a lo ti ve a, inchhung tihfai pawh hnehsawh tak a ni. Kan ti ti pah a, kan nui dun bawk a, hun nuam tak kan hmang dun a ni, zawh pawh kan zo hma khawp mai. Intifaiin mahni room lam ve ve kan pan a, bathroom atanga ka chhuah rual chuan ka phone a lo ri ral ral a, kan en chuan Hriatpuia nu a lo ni.

Chhang ta nghalin aw zângkhai tak hian "Bawihi i buai em", a rawn ti a, ka buai loh thuin ka lo chhang ve mai a, "tlaiah chaw rawn ei ula, kan inhmu khât em mai", a ti leh lang lang a, "Ka hre lo le, Hriatpuia thu thu a ni mai", ka ti a, "Ka be tawh a 'i tih dan dan a ni mai' a ti a", a rawn ti leh a, kan ei tur thu a chhangin phone kan titawp a. Mak tak maiin Hriatpuia nu hian min ngaina em em a, nu tawng duh leh nuih duh tak a ni.

Kan inneih tirh khan a mawiah min be ve mai emabw ka tia, mahse a lo ni hauh lo, a ngai patin min be reng a, mi rilru tluang tak a ni bawk. A hnua ka hriat leh danin Hriatpuia hi an unau bulah hian a duat zual a, a fa hmasa ber a nih vang pawh a ni mahna, kei, a fapa duh ber nupui ni ta na na na chu min lo ngaina ve tawp ni awm a ni. 

Rooma atang ka chhuah leh rual chuan Hriatpuia chu a room atangin a rawn chhuak ve chiah a, "ka nu'n a rawn bia che em?", tiin min zawt a, "Min rawn bia a, 'kan lo ei dawn nia', tiin ka chhang a", ka lo ti ve zat, a bu nghut nghut a "Insiam la kan kal nghal mai dawn mi", a ti leh a, "a pawi miah lo ang", ti a chhangin room-ah ka lut zui leh a. 

November thla kan chuang kai leh tawh a, kum dang zawng aiin khua a vawt a, thingin min hual khup bawk nen kan awmna chu a vawt zual a, dai a thla nasa thei em em bawk. Mangchhia ka man tak zeuh zeuhah chuan keimahin ka mu ngam ta tlat lo a, Hriatpuia khumah ka riak ve ta mai zel a, a ni erawh sofa-ah a mu thin thung, mahse zan ka thang harh apiangin min si chêtin, ka kawnga kuah chungin  a lo mu thin a, ngaiah ka nei der tawh. Tunah zan dar 7 a ri tawh a, chaw ei turin Hriatpuia ka nghak mek a, zan dang ang chu nise dar 6 khan a rawn thleng a hun daih tawh, ka call a la thei bawk si lo, an la buai a nih ringin, puan lum sin hlun chungin living room sofa-ah tv en chungin ka lo nghak a ni. 

Min sawi dat dattu an awm avang chuan ka meng chhuak hlawl a, ka lo muhil daih chu niin, Hriatpuia chuan min lo kai tho hi a lo ni. A inthlak fel vek tawh a, a sam la hnawng chapah chuan a inbual fel vek tawh a ni tih ka ring thiam nghal a, a rimtui hle bawk. "I lo call lai ka lo hre lo a, meeting-naa ka silent kha ka lo turn off theihnghilh daih a", tiin a insawi fiah nghal zung zung a, a buai hle thin tih ka hria a, ka  beisei miah loh laiin a insawifiah ve te chuan min tihlim em em bawk.

Chaw eina ka tifel te chu min pui leh thlap a, keiin ka sil faia, ani'n a lo hru hul thung a, kan zawh chuan ka room-ah chhoin ka inbual ta nghal. Tshirt leh pyjama ka inbel a, inhnuai lamah chuan ka chhuk leh ta nghal a, Sofa-a thu chungin tv-ah chuan movie a lo en a, hmuhnawm ka tih ve thin em em Divergent a nih avangin va thuin ka en ve ta nghal a, Hriatpuia hriat hlau zet chuan a changtupa chu pa ka tih em vangin ka lai zet hian ka lo nui ru leh pat pat thin a, ka kut te chu hum ruhin ka insik thul. Hmuhnawm tizet chuan tv chu ka melh reng a, engtik laiin nge ka lo mutthilh leh rêng ka hre lo, hneh zet hian min pawm kângtu an awm avang chuan ka harh zawk, meng mang lo hian tlak hlau zet chuan a nghawngah ka lo kuah ve a. Dim zet hian kumah chuan min nghat tih ka hre thei, ka muhil leh ta nghal siai siai a.

Ka harh chuan zing dar 4 chauh a lo la ri a, Hriatpuia'n ka kawngah min lo kuah leh reng tawh bawk, khua a vawt bawk nen mut a nuam hle. Mutthilh leh mai ka tum a, ka kawnga a kuahna kut chu a che hrut a, ka kawr chhungah a zen lut a, a kut lâwng chuan ka pum chu a chul kual dan dan a, ka lo daw dep dep chauh tawh. "I harh tih ka hria a nia aw", a ti sup a, a kut chu sawn chhoin ka hnuteah a tawp chat a, a kut tang chuan ka hnute hmur chu a hmet hrual a, insum hman loin ka lo thaw chhuak hawk thung.

Amah hnaih leh zual tur chuan min kuah a, a taksa khauh tungah chuan ka bet ta thlar mai, ka nghawng zawnah chuan a thaw lum ham ham a, hnung lamah a mipatnain min si run bawk. Min kuai kerin ka hmuiah chuan a rawn fawp a, ka rilruin tawp a hun a ni tih ka hria mahse, tawp turin tha reng reng ka nei tawh lo, a leh pek tawn châknain ka khat zo tawh. Engtik laiin nge ka thawmhnaw a hlih reng ka hre tawh lo, kan taksa lâwng a han innâwk takah phei chuan tawp tur reng kan awm tawh lo. A na zawk a, dim leh dam takin a che a, tawpah phei chuan insum zo lovin ka rak chhuak hial a. Vawi engzat nge kan tlak dun pawh ka hre seng lo, a che zel a, kum tam tak hmeichhia mutpui tawh lo ang maiin a hmanhmawh bawk.

Kan zawh meuh chuan thlanin min bual hun tap tawh a, "inbual ang le", tih pahin min pawm kâng a, min tih ang ang chuan ka lo awm tawp tawh. Bathroom-ah pawh chuan a thleng leh a, kan inbual rei hle bawk. Chau zet hian bathroom atang chuan ka chhuak a, ka thawmhnaw ka ha peih hrâm, khumah bawk chuan ka mu leh nghal a, ka chau ve em a ni. 

Khumah chuan rawn lawnin ka chalah a rawn fawp a, ka lo dawh hle hle thung, "hna ka kal lo mai dawn a mi", a ti sup a, a nui deuh bawk, "Ai, va kal rawh", dul zet hian ka lo ti a. "Okay, mahse i mut dawn pawn thil ei hmasa phawt la", a ti leh a, "nakinah ka lo ei mai ang, mut phawt ka duh", dul tak bawk chuan ka chhâng a, "I chau hle a ni maw, ka kal dawn nia aw, thil lo ei ngei ngei ang che", tih pah hian ka chalah a rawn fawp leh vang vang a, ka mit ka lo chhing a, ka muhil chu a ni zui leh nghal mai.

Ka harh leh meuh chuan dar 12 a lo ri der tawh, thil thleng ka ngaihtuah chhuah rual chuan ka biang a sa hat hat a, ka nui nghal ver ver bawk.

Chuta chhin chu thil a danglam ta , Hriatpuia'n min ngaihsak em em a, a hna bâng rawn haw apiangin thil min lo hawn sak a, ho te teah min ngaihsakna a lantir a, min duat em em bawk a, thil ei turin min hruai chhuak fo a, ka sawi ni miah lo hian ngawi renga min hruai chhuaha min bazaar pui a ching em em bawk a, zantin atih tur a thulh ngai lo a, nupa kan nih lohna reng a awm tawh lo.

April thla kan chuang kai leh tawh a, ruah a sur duhin thli a thleh nasa thei em em a, thli leh ruah hlau ngai reng reng lo khan Hriatpuia duatnate ka han dawn takah chuan ka hlau thar ta em em a, ka inhre thiam tawh bik lo. Keimah kha ka ni ta lo emaw ka ti rum rum zel, ka thik thu a che ta em em a, engkimah ngaih khawih tur ka zawng ni berin ka in hre tawh. Ka awmdan danglam chu ka inhrethiam a, mahse ka inthunun thei tlat lo a ni. Ka thik thu che ta lutuk chu Hriatpuia lawmah a tla a "A tha, tiang hian i thik thute hi tichhe ziah tawh rawh", a ti mauh mai a.

Vawiin chu ruah sur chuan ban a tum ta lo  emaw tih mai turin a sur nileng a, tunah pawh a la tla charh charh reng a, tam erawh a ni tawh lo thung. Motor rawn tlan lut thawm ka hria a, sana ka en vat a, dar 8 a ri fel chiah a ni. Bawp khawkherh ata thuin tv ka lo en a, a rawn lut chu ka lo melh zawk duh chauh. Min en chuan a thaw hawk a, tunlai ka awmdan chu hahthlak min ti ve deuh a nih hmel.

Chanchin rawn sawi miah loin a rawn tlai em em a, min be miah loin a awm bawk a, ngaihzawng a nei a nihte ka ring a, ka zeldin kual a, hnunglamah min lo bum reng a nih te ka ring ta a, min lo nuih zat thin dan turte ngaihtuah kualin ka rilru a na ta em em a. Min be miah lo a min kel pelte chu ka ngaihbel kual a, ka mittui a rawn luang ta zawih zawih mai. 

Ka ngaihtuahna mai mai chu ka tahpui ta chiam mai a, eng nga tinge hetiang hian ka awm? Ka inthiam tawh lo. A rawn chhukin ka lo tap min hmuh chuan min rawn pan vat a, ka tahchhan min zawhte chuan ka lo tap uar sauh a, tih ngaihna hre lo zet chuan min kuah ta hlu hlu a, ka lo tal ve aih aihte chuan min kuah nghet zual sauh a. Ka tah ban hnu chuan min thlah a, ka tah chhan min zawh chuan mittui tling pam chuan "Eng nga tinge bialnu i neih a", kan ti thla rawk a, "tuin nge bialnu ka nei ti a", mit meng thuk raiha min en pah chuan a ti dam diai a.

"I nei alawm, ka mumangah pawh ka hmu vek, chuan tlai deuhah i rawn haw a, chanchin pawh rawn sawi loin, call pawh i la duh lo", ka ti sep sep a, ka samah a rawn chul a "Chuvang chuan maw i tah a", a ti zawi ruih a, ka lo bu nghat thung. "Ka tih palh chanchin ka rawn hrilh loh che vangin, kan meeting rei leh ta sia, i rawn call khan ka rawn thleng tep tawh avangin ka la ta lo a nih kha, lo la zawk ila tha tur a nia", a ti dap dap a, a han insawifiah takah chuan ka tahchhan te ka ngaihtuah kir a a ho ka ti leh ta em em a, tunlai chu ka heti reng mai. 

Ho tak takah ka tap a, ka rilrute a no thar em em a, nidanga ka hlauh ngai reng reng lohte kha ka hlau ta em em a, ho te teah kawina tur ka zawng kual a, chungah te chuan Hriatpuia chuan ning miah loin min thlem a, ka tahchhan ho tak tak ka sawite chu ning miah loin a ngaithla a, min nuih san ngai bawk hek lo. A lo chau deuh a nih pawhin a ti lang ngai lo a, ka inthlahrung ve em em thin a, mahse ka inthunun thei tlat lo a ni.

Hriatpuia nu'n leng phei tura min tih avangin Hriatpuia rualin ka kal ve a, inkawtah min drop a ani chu hnaah a tlang nghal a. Inchhung ka luh chuan min lo chiau au vat a, min lo lawm thiam ve ngang mai. "Bawihi min lo zui lawk ta che", ka nu chuan a ti a, tho ta nghalin a hnungah chuan ka zui ve vat a, in hnuai room lamah chuan a chhuk zel a, kal pah chuan a ti ti pah mawlh mawlh a, ngawi reng chuan ka zui ve zel a.Room pakhat kawtah chuan a ding ta a, tala lianpui chu hawngin a lut a, ka zui lut ve vat a, switch a hmeh rual chuan a âng ta iar mai, mak ti zetin ka hawi kual a.

End of Chapter Five.