REDAMANCEY 2

REDAMANCEY 

CHAPTER : TWO 

ZIAKTU : OLACEE RUSSEL 

Thla nga liam ta mai chauh kha a la ni, tlai khat ka hna bang chu nidang aiin ka tlai a, zan dar 9 a pel thui tawh viau, mahni chauh chuan ka in luahna lam pan chuan ka kal hnek hnek a, thil tam tak ka ngaihtuah kual a, ka awm zui zel dan turte, eng thil nge ka tih leh tak ang? Rilru buai zet chuan ka ngaihtuah ngut ngut a, thluak ka nei ve ta lo emaw tih mai tur chuan ngaihtuah chhuah erawh ka nei lo hle, a ngaiah ka kual ka kual ringawt mai a.

Ka rilru hrethiam ve niawm tak hian khua a rawn dur khup khup a, khawpui a ri dur dur bawk, ka kal chak zual sauh a, ruah sur hma ngeia in thlen hman chu ka tum a ni, ka kal hman hmawh bawka ka tlan lo chauh tawh, ka in luahna lah chu a la hla ang reng si, taxi mana insen ka ui thin em vanga ke a kal thlang ngat ngat thin kha ka nia. 

Minutes 20 vel ka kal tawh ang tihah ruah mal lian pui pui a rawn tla a, ka phone leh ka document-te chu a huh hlau zetin mi bathlar ka chuh nghal rawk rawk a, minutes 10 vel chiah kal a ngai tawh a sin le. Dar zat en tum a ka phone ka phawrh chuan ka battery a lo low leh daih tawh, en pawh a eng leh thei tawh lo, thaw hawkin ka phone hlui ve tawh tak chu ka en a, a battery a tlo lo em em a, khawih miah lo pawn a lo phai leh duak thin a ni.

Darkar chanve vel zet ka nghah leh hnu chuan rual chu a hán ve deuh tawh a, zan a tlai ve bawk nen ruah chu ka do ta tawp a, ka document te chu an huh hlau zetin ka kawr chhungah ka thun a, ka tlan zel a kar loah ka in chu ka thleng a, ka huh nasa hman viau, ka thil kente pawh chu an lo hnawng ve a, nasa erawh a ni lo thung. Ka inbual zawh chuan ka sam chu ka chhen ro leh a, engmah pawh ti peih tawh lo chuan ka mu ta than mai.

Ka nu leh pate hi tu te nge an nih ka hre lo a, fahrah inah ka sei lian a, chu hmun chhuah san tluka châk kha ka nei ngai lo. Chu hmunah chuan khawhar takin hun ka hmang thin a, thiante hlim taka an nuiha an infiam laiin kil khatah ngawi renga thuin ka lo thlir thin a ni. Ni lengin thing buk hnuaiah thuin duhthu ka sam thin a, chu hmun zîmteah chuan khawvel neitu, a duh duha thil engkim her danglam thei ang mai hian ka suangtuahna khawvelah ka cheng a, ka hma hun thim tak ngaihthah luiin ka suangtuahna khawvela êng de va va chu ka thlir lui tlat thin.

Kum 18 ka nihin chu hmun atang chuan ka tlan chhuak ta a, Aizawl khaw chhungah ni hnih tawp ka vakvai a, ei tur leh in tur pawh nei lo chuan mi kawt thlerah riltam takin ka riak mai thin a. Mihring tam takin min kal pel a, mipui an zi hut hut bawk a, motor tam tak an in sulpel zut zut bawk a, chung mi tam tak te zingah chuan min puih tum a ban phar reng ka hmu lo, hlim taka an nui hmelte chuan ka chan chhiatzia min hrilh nawn leh thin ni mai hian ka hria a. 

Ka thil lo suangtuah thin leh duhthusamte chu beisawnna ruama min hnuk luttute mai an ni tawh. Ni khat chu riltam taka mi bathlara ka thut laiin nu pakhat, thau lam pang hi ka bulah rawn kalin ka hming, leh ka awmnate leh chhungte ka neih leh neih loh chu min rawn zawt ta a. Chhanna ka pek hma hauhin kan piaha restaurant lam chu min panpui leh ta nghal a.

Dawr lo viltu te chu ko ta nghalin ei tur a chah a, a eitur chahte an rawn dah hma chuan ngawi rengin a thu a, min melh reng a, kei erawh chu kimkidakin a mitah pawh melh ngam loin hnuai lam melh chuan ka thu a, rei loah a rei tur chah te chu an rawn dah a, ka hmaa ei tur tui hmel tak takte ka hmuh chuan a riltamzia chu ka hre thar leh a, ani chu rawn tawng chhuakin ka tâna a chah a nih thu leh a vai chuan ka ei vek theih tur thu a sawi a, mak ti zet leh ring ngam chiah lo a ka melh lai chuan a lo bu nghut a, ei tur chuan min hrilh zui leh a. 

Chutah zet zawng ka riltam lutuk tawh chuan ka ei nghal bawrh bawrh a, min thlir reng a ni tih hre chang lo lek chuan ka a hmaa ei tur te chu ka hap buan buan a, ka mittui rawn luang te chu lawmna vang a ni tih ka hria, ni e a hming pawh ka hriat loh ka hmaa thu chu ka tan chuan vantirhkoh ang mai a ni a, a chunga ka lawmnate chu ka mittuite hian an sawi mawlh mawlh ni mai hian ka hria. 

Ka thil ei chu ka helh awl awl a, ka khuh zui kharh kharh a, ka hmaa thu bawk chuan no chu ban vatin tui min thlir chhuah sak a, ka in nghal khawlh khawlh mai. A ei tur chah tur ka ei zo ta vek a, a tamin a man a to hmel hlawm si a, a inseng teuh dawn a ni tih ka hriat avang chuan ka inthlahrung kher mai. Tui ka in leh te te a, ka chezia chu ngawi rengin min lo thlir reng a, lawmthu ka hrilh chuan a nui sen sen a, nichina a zawhna ngai bawk chu min zawt leh ta a.

Keipawh chuan ka chanchinte chu ka hrilh ta vek a, ka sawi chhung zawng chuan tawng miah lo reng min melh reng a, min zir chiang ni mai hian ka hria a. Chênna in ka neih loh thleng chuan ka sawi ta vek a, ei tur avanga ka lawmziate sawiin a tawp ka khar ta a. A ni chu rawn tawng chhuak ve ta in, dawr hi a ta a nih thu leh a dawrah chuan hna ka thawh theih nghal tur thu a sawi a, a dawr hnung lampangah chuan mut pindan zau vak lo a awm thu a sawi zui bawk a, lawm zet chuan ka melh a.

Ka hnar phal lo a, hnar thei dinhmuhah pawh ka ding lo a ni tih ka inhrechiang a, ka tih theih zawng chu lawm taka lo pawn mai a ni. Ka thawh tur ang te chu a sawi zung zung a, dawr chhung tihfai leh an thil eina vel sil tur a ni a, zingah hma taka thoin hna thawkho rawn kal hmaa lo tihfai leh chauh a ni awm e. Chu erawh ka thiam zawng tak tur a ni a, in tihfai leh seng fel na na na chu ka awlsam ve viauin ka inhria. Home-ah khan hnathawkte kan pui nasa thin a, inchhung tihfai pawh keimah nin kan ti mai zel a ni.

Hun a kal ve zel a kumkhat ka thawk tling ve ta reng mai a, ka thawh tirh phat atangin pi Muani mit thlun loh hlauin tha takin hna ka thawk thin a, min fak ve viau bawk, a che tawp chi ka ni lo bawk a, ka chetna hnu chhui tur a awm ngai lo a, a ni pawn chu chu hriain min duhsak nasa zual a, hlawh pawh min siam ve nge nge, chu erawh a tirah ka hnar ve nasa viau a mahse, ani erawh chuan hma hun thui tak min lo thlirpuiin ka thawh tirh phat atang khan min lo khawp sak char char a lo nia.

Ka kawl duh ringawt min pek a tum chuan aman kawl zawk tura ka duh thu ka sawi a, nu Muani bawk chuan bank account te min hawnpui a, tah chuan ka hlawhho pawh kan dahlut nghal ta vek a, a chungah lawmthu sawi sen loh ka ba nasa tak zet a ni, a ni hi tawng lo ta ila a awm zel dan tur pawh ka ngaihtuah ngam lo, ka tan a hlu tak zet a ni. A tâna rim taka thawh chu ka tih ve theih chhun a ni tih hriain ka thawk nasa zual a, a dawr chhung tihfai mai ni loin waitress hna chu ka thawkzui ve nghal mai thin a ni.

A dawr a lian lutuk lo na in an thil siam te a tui em em a, mi pawn an lo dawr nasa viau thin a, indaih lo taka ni hman ral chang pawh kan ngah ve thin. Nu Muani chuan ka hlawh pawh thlatin account-ah a rawn transfer ve mai thin a, a hnena lawmthu sawi nan kawr mawi deuh ka leisak ve nge nge, man tam erawh a ni lo a, ka phak tawk a ni tih hriain a ni pawh a lawm thiam ve viau. Ka hlawh chu ka hmang hleu ngai lo a, ka khawl ve ngat ngat thin a ni. 

Nu Muani bawk chuan a fate thawmhnaw hluite min pe a, a la thain a la thar hlawm viau a, a hnena thawmhnaw lei ka duh thu ka sawiin a ni chuan lei a ngaih loh thu leh a fate ta min pek tur thu sawiin lei a phal ta lo kha a nia, min pe hnemin a la tha hlawm bawk nen ka sawi zui duh tawh bik lo kha a nia. 

Ni khat chu hna an bân vek tawh hnuin nu Muani chu a la tawi khaw muanga, min melh leh vang vang thin a, ka ngaih tha lo chuan ka zawt ta tawp a, ani chuan cancer natna a vei thu min hrilh ta a, a stage pawh a lo sàng viau tawh a ni awm e, tun hnaiah dawrah a rawn kal mumal lo em em a, a dam loh vang a lo nia, a ni chuan a boral a nih chuan a dawr hi a chhungte an tih ral nghal tur thu a sawi ta a, a chhan erawh a sawi lem lo a, a pehhel ve ni a ka hriat avangin ka zawt duh ta bik lo a, a inthlahrun hmel kher mai. Inluah tur te min lo zawn sak vek tawh hi a lo nia, chu pawh a boral hnua awm tur nei lo a ka awm mai hlauin a lo be lawk vek tawh hi a lo ni. Ka mamawh tur ang chi pawh a dah nual tawh thu a sawi a.

Ka vantirhkoh a va ni chiang tak em, chu chu nitinin a tharin ka hmuh belh zel bawk a ni, ka tap a, lawmthu sawi ngaihna pawh hre loin ka melh tlawk tlawk a, min rawn kuah a, ani pawh a tap ve bawk, hun tam a neih tawh loh thu a sawi a, a natna avang chuan kan tap dun bawk a. 

Thla khat a liam leh meuh chuan Nu Muani pawn min boral san ta a, ka tuar ve viau mai a, ka nu ang thaw thanga ka en, ka tana hlu tak a ni a, a ni hi awm lo se chuan kei chu ruang bak ka chan ka in ring tawh lo, a ni chuan nun thar min pe a, ka tan a theih tawp a chuah a, a ni chu ka êng a ni a, ka thla a ni bawk a, a zarah enna ka nei ve a, amah vang bawkin ka thlawk ve thei a ni. Nu Muani'n ka inluah atana a tiha chuan keipawh ka insawn lut nghal a, dawr kha hrilh an tum tawh vang a ni. Ka pawisa lo khawlh ve tang tang te chu ka hman ve a ngai tawh a, nu Muani ka tana a hlutzia bawk ka hre thar leh thin. 

Ka inluah zau lem lo takah chuan hun ka hmang ve bek vek zel a, thawh tur ka hmuh ang ang te chu ka thawk ve lawp lawp thin a, thawk rimin chau ve thin mah ila, ka inah ka luh a, ka khuma ka mut meuh chuan ka thawhrimna hlutzia te hriain taksa na leh chauh reng ka hre tawh ngai lo. Thlamuang takin ka mu a, beisei nei zetin ka tho a, beiseina thar nen ni ka hmang ral ve thin a ni. A hrehawm zawngin engmah ka ngaihtuah ngai lo a, mahni in hmuh hniamna lah ka nei ngai hek lo, khaw thim châng awm ve bawk thin mah se, a piaha khaw êng lo awm tur chu ka thlir lui tlat zawk thin a ni.

Tlai khat ka hna vang chu nidang aiin ka tlai deuh a, khua a thim fel vek tawh bawk. Ka hnung lamah chuan horn a rawn ri leh thin a, a tlanna tur ka dang a nih ringing hawi let lem lo chuan kawng sir lam chu ka hnai zel a, mahse ka rawn ri leh zel tho, ka zawnah tak chuan motor chu dawn dingin "ka lo thlah ang che", tih ri ka hre zui zat bawk. Ka melh vat a, chupa chuan min lo melh run a, a mitmeng atang chuan ka hlau nghal ringawt a, lu thing mat matin ka kal zawm leh a. 

Rawn tlan ve zelin ka kalna tur dang zawng tak chuan a rawn ding ka chat a, "ka thlah ang che biak lawkna tur che ka nei a pawi i tih loh chuan", min rawn pah chuan tawng ve bawk mahse, a aw ri erawh a nelawm loh viau a, thu pek khauh zet hnial theih loh tura a sawi ni mai hian ka hria. "I chungah engmah ka ti lo ang, biak lawk che ka duh mai a ni", a tih leh a, ka en reng chuan min ring rawh tia ni awm tak hian a lo bu nghut a. A car kawngkhar chu a rawn hawng zui nghal zat bawk.

Tîm dai chu ka lut a, bet lo zet chuan ka thu bawk, ka hlau ru viau a, eng vanga lut ringawt nge ka nih pawh ka in hre lo, hmel hriat loh leh nghal, a thusawi  kha hnial har ka ti ni mai in ka hria. A tua mah chu kan tawng lo a, a tawng hun ka nghak a ni ber, a ni lah chu a ngawi leh reng bawk si. Ka lo chuang chu ka inchhir leh viau tawh, min ru dawn em maw ni le?  Tia hlau thâwng taka ka ngaihtuah lai chuan "Hahdam rawh", ka lo ti sup a.

"I sawi tur chu ka nghak", rang zetin ka lo chhang a, ka chhang rang a ti deuh nge min rawn melh zawk a, ka lo melh ve chiah bawk nen kan mit a intawng a, ka tek chhawk ni mai hian ka hria, ka hawi sawn nghal vat bawk. A ngawi leh reng tawh a, ka in awmna lah chu kan tlan zawngin ka in sawn hla ve zel emaw tih mai turin kan thleng har ka ti tak zet tawh. 

Hriat chhuah thut ka neih avang chuan ka melh nghal kawk a, ka in awmna ka hrilh miah lo, mahse a hre sa niawm tak hian a tlan dik thlap bawk si. Mak ti zetin ka melh a, ka melhna chu hre lo niawm tak hian a motor khalhah ngawt chuan a rilru a pe a, hnehsawh zeta a stearing a han control te chu hmuhnawm tak a ni. A ding dat a, ka hawi chhuah rual chuan ka in luahna bul lawkah kan lo ding reng tawh, mi in hnuai a nih avangin step-ah zawh tur a awm thung.

"Engtin nge i hriat", ka âwah chuan mak ka tihzia a hriat theih, a la ngawi vang vang a, min chhâng dawn lo a nih ringin chhuk tum chuan car kawngkhar hawnna chu ka vuan a, athu rawn sawi avang chuan ka tawp chat mai, "Eng maw i sawi", mak ti zet chuan ka ti chhuak a, ka hre sual a nih ringin chiang zetin ka melh a. Ani pawn min lo melh ve chiah bawk, a mitmeng fiah zetah chuan ka melh rei ngam lo.

"Min nei rawh", a ti leh sup a, chu tah zet zawng ka hre sual lo a nih tih ka chiang ta, ka awih lohzia leh mak ka tih zia chu ka hmelah chuan a lang theiin ka ring. Mak tih lohna chi pawh a ni lo, nichin lawkah ka hmu ve chiah a, a hming tak ngial pawh ka hre lo a, a ni pawn min hre bikin ka ring lo.Chuti chung chuan eng thil nge a sawi tak hi!

Chhuk tum chuan kawngkhar hawnna chu ka vuan a, mahse ka hawng thei tlat lo, ka tih nawn leh pawn a la in hawng thei ta chuang lo. "Ka chhuk dawn", rum zeta melh pah chuan ka ti a, "In be lawk ang", a hmel nena inhmeh lo zeta dam chuan a lo ti thung. "Sawn dun tur kan nei lo, ka chhuk duh".

 "Ka duh ka sawi hma chu i chhuk lo ang" thinrim zet chuan ka melh a, ka thinrimnate chu a ngaih pawimawh loh hmel kher mai. "Hawng rawh", ka ti leh sup a, ka thinrim tawh chuan tawng chhuah ka harsat thin a, ka tawng chhuah chhunah pawh a dam dap tawh thin.

" Kan inngaihzawn leh ngaihzawn loh ka ngai pawimawh lo, min nei la i harsatna te hi ka sut kian sak ang che, i mamawh engkim ka pe bawk ang che, chuan zawn hmuh i harsatzia hi i hria em? ka thâwng che tih ka hria, mahse he hun hi ka nghak rei tawh a, tun hun hi hun tha ber a ni bawk, lo inngaihtuah la rei tak erawh ka nghak thei lo ang, chhanna tha tak min pek ngei ka beisei", a thu sawi chhung zawng chuan ka thaw pawhin ka hre tawh lo, car kawngkhar a hawng a, rang zetin ka chhuak nghal bawk.

A tlan liam hnu chuan ka in lam panin ka kal ta chauh, min thâwng lutuk a, ka ke pen te chu a sak vekin ka hria. Khumah chuan ka let thla tawp a, a thu sawite chu ka ngaihtuah let a, mak tihna bawk chuan min tuam leh hlup hlup a, engtin nge khang thute kha a awlsam tak a a sawi theih! Eng vangin nge min zawn? Eng vanga min neih tum ve ringawt nge a nih?  Za lo zet chuan ka nui chhuak a, a zak thei lo ka ti hle bawk.

Inngaihtuah pawh ka ngai lo kher mai, a hming tak ngial pawh ka hre lo a, chu tih lai kara inneihpuia lo insawmte chu a! Hun a liam ve zel a, kha pa ka hmuh ni atang khan ni thum lai a liam leh tawh, min hmu tura a rawn kal ka ring tawh lo kha a nia, ka rin ang chiahin a rawn inlan tawh lo reng bawk a. Eng vanga khatiang thu sawi ringawt nge maw a nih tih ka ngaihtuah ve thin a, chhanna erawh vawmbo ang hmiah a ni thung a. Ngaihtuah chhuah châng erawh ka nei leh thin.

Kar khat zet a liam leh tawh, ka ni hman dan a ngai reng a, zingah hna ka kal a tlaiah ka haw leh thin a, mahse ka ning ngai lo a, nuam ka ti em em thin. Rim takin ka thawka, thianghlim takin ka la lut a, mi anga hausa leh neinung ni lo mah ila, ka ei tur ka thawk chhuak, tumah ka awt ngai bik lo a, ka neih phak loh tur thil ka awt ngai lo hek lo. Ka thawh chhuah milin ka nung a, thian ka kawm ngai lo a, mahni chuan ka hlim tawk em em tho.

Tunlai chu inchhung chei nuam ka ti thar a, bungrua pawh ka lei belh nasa viau, keimahte chuan ka che ve rak rak thin a, a nuam ka tiin ka hlim viau thin a ni. Mahnia awm hrehawm ka ti ngai lo a, nu leh pa tel lo a sei lian ni ta na na na chu an mahni ngaihna leh han thlak hlelhna ka nei hran lo a, han ngaih vak ngaihna pawh ka hre chuang lo. 

Amaherawh chu midangte an nu leh pa te nen hlim taka an len a thil an ei ho te, inpawh taka an ti ti lai te ka hmuh châng chuan awm ve se tihna rilru ka pu thin a, mah se chu tah pawh chuan ka vei rei ngai chuang lo, ka in hre thiam tawh bik lo, an tel loin kum hei leh chen ka awm a, ka pian hlim atanga ka hmuh phak loh leh khawih phak lohnaa an awm hian ka ngai hlu tawk lo niin ka inhre ber, ka mamawh miah lo tihna ni loin, nun phung pangngaiah ka nei a, beisei tur an awm lo tih ka hriat chuan em vang pawh a ni mah na.

Tlai khat ka hna bang chu ka chau ve deuh bawk nen thil pawh ei ta lo chuan ka muhil zui nghal a, kawngka kik ri dat dat thawmah chuan ka harh a, phone ka van vat a, zan dar 7 a lo ri der tawh, ka ril pawh a tam tawh viau. Kawngka kik ri bawk ka hre leh a, inleng ka nei ngai lo a, tunge a nih ang tih rin ngaihna pawh ka hre lo. In luah man lah ka pe tha em em a, sawisel ngai khawpa hnawk leh tawpin ka inbul ka dah ngai lo bawk, a hnim deuh chuan ka tlo mai thin a ni. Chu chu hriain in neitute pawn min fak ve hle bawk.

Kawngka ka hawn ruala ka mi hmuh ang chuan ka meng phawk hle, khar leh nghal ka tum a, a pheikhawk chuan a lo dang a, hnehzet hian a pawt hawng khawng nghal bawk, engmah sawi lo chuan a rawn lut a kawngka chu a kalh nghal daih bawk. In neitu ang mai chuan min kal pel a thut thlengah chuan a va thu a, amah a lian bawk ka in keimaha duh tawka ka lo chet tlatna hmun chu ka hmu te nghal rawih rawih a. A hawi kual a, hmuh hmaih neih a tum loh hmel kher bawk.

End of Chapter Two