REDAMANCEY 3

REDAMANCEY 

CHAPTER : THREE

ZIAKTU : OLACEE RUSSEL 

Min rawn melh zawk a, kei kawngka bulah ka lo la ding reng thung, " Lo thu la, inthlahrung suh", in neitu zawk ang mai chuan a ti a, a zak lo ka ti hle bawk. Ka in alawm le, engvangin nge hetia inthlahrung taka ka awm, ka thu ber bawk tia in ngaihtuah chungin ka pan phei a, ka melh no lo viau bawk. 

Thut thlengah pawh va thu lo chuan a ka ding a, min melh ve reng bawk, ka awm zawn a melh tak ngurah chuan thawmhnaw mumal ka ha lo tih ka hre chhuak a, ka awm chu ka hup nghal vat bawk, a lo nui suk a, ka awm dan atthlak zet avang chuan ka zak chem chem mai. Engmah sawi lo chuan roomah ka lut a, khum bulah chuan ka ding a, ka zak lutuk chu ka chhing tlawk tlawk a ni ber. 

Sawi tak ang khan inleng ka nei ngai lo a, keimaha awm ta na na na chu inah hi chuan t-shirt leh kekawr bul teh tlawng nen hian ka awm mai zel a, bra pawh ka phelh daih zel. Tunah pawh tiang chuan ka inthuam a, ka kekawr bul lah chu ka t-shirt hakin a khuh vek ti tih a,ka hnute hmur lah ka kawr chhanah chuan a lo pir ve vah mai a. Hetianga miin ka taksa an hmuh hi ka duh lo viau a sin le. 

Pyjama ka hmuh hmasak ber chu lain ka ha ta nghal a, bra pawh ka hreng zui nghal, room a awm reng theih ni lo chu ka va chhuah chuan a thutna ngaiah a lo la thu a, min lo melh ngur bawk, zak lo awm tak chuan a hmaah ka va thu a, a inthuam dan ka en a, ani chu a smart tak zet, kamis dum leh cotton jeans a dum tho a inbel a, smart shoe a bun thlap bawk, a bâna rolex sana gold rawng pawh ka hmuh hmaih lo kher mai, inhmeh em em bawk. Eng thil nge maw ka ngaihtuah le. 

"In leng ka mamawh vak lo a sin", tawng chhuak hmasa zawkah ka tang ta nge nge, "Hun ka pe tam viau tawh chein ka hria", ka thusawi ngai pawimawh lo zet chuan a ti a, a sawi tum chu ka hre chiang viau a langah erawh chuan "Eng thil nge sawi i tum", ka ti ta zawk, hre lo tak tak ni awm tak hian ka chal ka tichuar deuh náng bawk. A mitko a sán rulh a, a chezia chu ka lo en ve reng a, min awih chiah lo chu a nih hmel.

" 'Aw' i tihna angah ngai mai ang", a ti leh sup a, zak thei lo ka ti ngang mai. Ka hmelah pawh ka lan chhuahtir hialin ka ring. "Biakin hawnga inneih kher pawh a ngai chuang lo, court-ah kan ti mai dawn nia, biakinah pawh i duh chuan a tih theih tho, keima lamah buaina a awm lo", a sawi zawh rual chuan ka nui hul hak mai, awih lo zetin ka melh bawk. 

"Ka neih duh che i ring reng reng a mi", ka tawng chhuah theih velleh chuan ka ti a,

 "I duh ngei ang", mahni inrin tawk hmel zet hian a ti a, ka mitah chiang zetin min melh bawk, "I sawi duh I sawi zawh chuan i chhuak thei tawh, chuan ka sawm che a nih loh chuan rawn kal tawh suh", Ka zâmna thup tup tak chuan ka ti a, thinrim lam a lang lo a, ka thin ti rim tur khawpin ka engmah a ni lo bawk.

Muanga chângin a rawn tho a, a haw dawn ta emaw tiin, lâwm leh hnehtu inti zet chuan ka nui a, mahse ka lam panin a rawn kal ta zawk, ka lo melh ha a, ka hlau thâwng nghal hle bawk, hetiang mipa zak thei lo lutuk chuan min khawih duh mai ka ring a, invenna tur hmanrua a awm hnai em ti a, ka melh kual lai chuan ka bul a rawn thleng der tawh, pangngai tum tak chuan ka melh let ve ta zawk, ka zâm a ni tih a hriat ka duh lo.

Rawn kun hnai deuhin ka khabeah a rawn vuan a, min kuai dak deuh bawk, "I duh ngei ang tih ka chiang", ka mit a melh kalh pah chuan a ti a, ngei awm zet chuan ka lo nuih sak thung, "I duh duh hmeichhia thing thei emaw in ti suh, hmeichhe dangin an bawrh luaih luaih che a nih pawn an zingah chuan ka tel ve hauh lo a nia", ka ti a.

Ka khabe a vawnna a thlah a, a thutna ngaiah bawk chuan a va thu leh a, mitmeng nel awm lo zet chuan min melh ngur a, kei erawh chuan ngei awm zetin ka lo la nuih a. "Hmeichhe pakhat chu kum 18 a nih laiin a awm ziah thinna thingbuk hnuaiah chuan thuin, a awmna thlang lam chu a hawi vang vang a, chu tih lai chuan thli a thawk vuk vuk a, ruah nasa taka sur tur ang mai hian khawpui a ri dur dur bawk. Chutia amah chauha a thut reng lai chuan mipa pakhat amah ang rual tur hi a bulah chuan rawn kalin an inhnial ta a, chu hmeichhia chuan a thlang lam khamah chuan........".

"Duh tawk rawh", ka ti vin tuar mai, ka melh ngut ngut a, a ni erawh a nui suk duh lek chauh, ka tha rawn khur der der chu ka hre chiang kher mai, ka tiril a khur a, hlauhna avang a ni tih ka hria, khur nasa viau e ti lo chuan ka thlan fim a rawn bawl trual trual a. "Thil thlen zel dan I la hre duh em", min deusawhna tawngkam chu ka hriat hmaih lo kher mai, chhan pawh ka chhâng thei tawh lo, tawng dawn pawh ni ila ka aw a chhuak thei lo. Engtin nge kha thil thleng kha ani hian a lo hriat theih. 

"Min nei lo a nih chuan fin fiahna ka neih zawng zawng hian police-te hnen an thleng nghal ang". Hnehtu i ti zeta min melhna chu ka rap tak zet, a hawi sang deuh vah bawk. " Hetiang hian i ti thei lo ang", ka ti sep a, ka aw chu a ri che che chauh tawh. "Ka sawi angin ka awm thin tih I la hre chho zel ang chu, ka duh ka hmuh nan engmah tih hreh ka nei lo bawk", khauh zet hian a ti a.

"Ti nge kei kher", ka ti sup a, " Ohhh! I awlsam ber alawm, nupui tur ka mamawh a, midang zawn nana hun khawih ral ka duh hauh lo, awlsam taka neih tur i awm reng alawm", a thu sawi chuan min deng dawt ni maiin ka hria. " Min neih hi thil awlsamah i ngai a maw", rilru na zet chuan ka ti chhuak a, min ngaihdan hniam lutuk leh min hmuhsitna âw kâ chuan ka rilru a tina tak zet

" Ka tan thil harsa a ni hleinem, eng kawngah pawh ka duh ka neih theihna tur a nih phawt chuan tih hreh ka nei lo", awih lo zet chuan ka nui hul hak a, ani erawh chu hahdam hmel zet hian min melh thung, kan awmdan in nawm hleih lutuk chu ka tah te lam a chhuak zo tawh, ka la insum hram hram a ni. 

"I thil duh i sawi rualin I hmaah an lo chhawp sak thin che a, i thil duh i sawi ruala phe vut vut thin nu leh pa i nei a ni thei, i kut hmawr a pilh hlek pawh a damdawiin pan rawk rawk ngai khawpa ngaihsaktu che nu leh pa i nei a ni mah na, mahse mihringte hi kan inang vek lo a nia, mi then khat chuan dam ve hram hram tumin, hah leh chauh pawh sawi lovin, ngaihthah luih harsa khawpa taksa na an neih pawhin ei leh in tur an neih theih nan hna an thawk tau tau a, chu ti chung chuan an ei khawp an thawk chhuak tawk tawk chauh thin, rim tak leh thianghlim taka an thawh rah an han seng meuh chuan an taksa nate an hre chang tawh lo a, mahni thawh chhuah ngeia an duh leh mamawh an lei theite chu an hlim zawk hle thin. Awlsam takin i nunga, i duh leh mamawh engkim neiin i lo sei lian pawh a ni mah na, mahse mi nun tichhe tur ema sang chu i ni lovin ka hria", ka ti ta duah a, ka sawi hnem bawka ka thaw a chham lek lek. 

Ka thu sawi chhung zawng khan mit la sawn miah loin min melh kalh a, a hmelah danglam a awm hek lo, ka thusawi chu engah  vak a ngai lo pawh a ni mah na, danglam turah ka lo ngai ringawt pawh chu a mak zawk, mi hausa ho hian mi retheite dinhmun an hrethiam tak tak ngai lo an tih chu a takin ka tawng mek a ni.

"Chuan", a ti sup a, a thusawi chu ka duh khawp lo viau, "midang nei rawh, kei chu min lo tibuai suh", ka ti ta tawp a, a ner nawk hmel ka hmu zui zat bawk. "Ka sawi ngai sawi nawn reng hi ka ning viau a nia, kar khat hun ka pek che pawh a tul ka ti leh ta lo, thu sawi i zawm tha duh lo tlat, Friday hian kan innei ang, naktuk hun ka pe ang che, ka sawi kha hre reng la, tlanbo tih vel kha chu tum buai duh suh."

"I sual hle mai", tih ngaihna hre lo lutuk chuan ka ti chhuak, a ni erawh a lo nui suk duh chauh, ka haw tak zet a ni. A haw hnu thleng pawh chuan ka thut ngaiin ka la thu ta reng, ka inngaihtuah ngut ngut a, ril tam lam reng a lang tawh lo, engtin nge kha thil thleng kha a ni khan a lo hriat chhuah theih tih ka ngaihtuah a, ka mitthlaah thil thlengte kha a rawn lang nghat zut zut bawk.

Ni e, kha mi ni khan thingbuk hnuaia ka thut lai chuan Tlankima kha a rawn kal a, ani khan min ngaizawng a, ka thil tihna kawng engkimah min tibuai a, min tihnat a hreh bawk si lo, ka hlau ru viau nge nge. Kan home tân khan an thawh hlawk em a, a pa lah mi challang tak a lo ni leh zel bawk nen ka tan hek vak ngaihna kha a awm si lo. Min hmu turin a lo kal ziah a, midangte chuan fel an lo ti viau nge nge, a ni reng lah taka an lakah chuan a tha em a, a ni mai pawh ni lovin a chhungte thlengin biak chhiat theih pawh an ni lo.

Ka bulah a rawn thu thla ve a, min hnaih ang reng viau bawk nen ka ning lutuk leh rap deuh chu kal daih tum in ka tho a, rawn tho ve nghalin ka kal tur chu min pawt lui ta a, min thlah tura ka tih pawn a duh tlat lo a, ka kut a hmerna pawh na tak a ni, ka lo sual let ve ngar ngar a, ka hmaiah te pawh a beng a, mipa tha nge nge chu ka hneh lo ngang mai.

Chutah min thlah thut a kei ka pai nawk thung. Kha tah tak khan kham lam hnaiha awm zawk a ni bawk a, lung rap pialin a tla ta a ni. A tlakna lam chu khur zawih zawih chungin ka en a, ka hlau thâwng nghal hle bawk. Ka nam tlak a ni lo a, tihsual ka nei lo bawk mah se ka hlau thâwng em em tho. 

A ruang chu an char ta a, kha khan rei tak chung chu min nghawng nge nge, ka dam lo a thil ka ei thei hek lo, midangte chuan ka awmdan danglam chu Tlankima thihna ka tawrh nat vangah an ngai a,kan inngaizawng emaw an tih vang a ni, chutianga an rin chhan pawh Tlankima khan midangah bulah a bialnu ka nih thute kha a lo sawi thin a ni.

Nihnih a liam leh meuh chuan mokawr nen thla kan lakna tur lam kan pan mek tawh, ni e, duh thlan tur ka nei miau lo a ni, ka thiam thu sawina turin fin fiahna lah ka nei hek lo. A mak ka tih ber erawh a chhungte chuan min pawn nghal thlap chu a ni. Min be tha em em a, a la hlim chhawm bawk nen an zia an la thup nge phei chu ka hre lo.

Court-a kan inneih pawh an pawm vek a ni awm e, Hriatpuia'n ka fahrah zia hriain thiam takin a hrilhfiah pawh a ni mahna, chu pawh chu ni se mak ka la ti reng, kei ang mi rethei lutuk, thuam chhawm pawh nei zo mang lo min pawm nghal thlap te, ka nihna ang anga min hrethiam em em te thil pangngai a ni pawn ka hre tawh lo.

Ka mokawr inbel chu ka en a, a nalh takzet, ka neih ve pawh a ka rin loh leh ka ha ve ang tih pawh ka suangtuah ngai loh chu ka inbel a, mahse ka hlim chuang hauh lo. Nalh takin ka hmai te an chhei thlap a, ka sam pawh awm ze nei takin an bâwk tawm bawk, mo nalh takah min chhuah a, kei erawh chuan tân in luhna kawngka ang maiin ka ngai thung. Khawvel eng hmu pha reng chunga maimawn rila nghet zeta tang, ka kâ an hnawh vang ni hauh si lova tawng chhuak thei lo ang mai hian ka inngai.

He inneihna hi ka duh reng vang a ni lo a, ani hi hmangaih a ni bawk hek lo, a pawimawh berah chuan ka duh thlanna a la ni lo cheu bawk. Ka pawm thu ka sawi lo va, 'Ai' tih tawngkam hi sawi chhuah theihna tur hun tha pek ka ni lo mai chauh a ni. Mi sawi ka hre tawh thin ' Hmeichhia te tan chuan an pasal neih ni hi an nuna an hlim ni ber a ni', tih hi.

Ka chanah ve thung chuan a ni teuh lo mai, ka lu a veil mawi tak te chu ka tân chuan parda ang mai chauh a ni a, mâwina reng a nei lo. Ka zalenna chu ka mangtha a, inneihna chu fairy tale thawnthu ngaihnawm leh dam raih, hmangaihna thianghlim tak ang ni tura ka lo rinna chu a dik lo tih ka chiang tawh a, a monu ber chu ka hlim hlawl lo a ni.

Kan in neih atangin thla khat zet a liam leh tawh, inhauh in peih atin ka awm a, mahse chutiang chu a thleng tlat lo, Hriatpuia hnaah a buai thin em em a, a zin deuh reng bawk, nikhat chu sawi loh kar khatah pawh kan inhmu zeuh zeuh chauh a tih theih awm e, inah a awm chhunah pawh a roomah a awm mai thin. Kei erawh a hmel ka hmu tam lo chu ka lo lawm em em a, min khawih luih a tum dawn lo tih ka chian takah phei chuan, ka ngaih ang em em a mipa sual chu a ni lo a nih dawn hi ka ti ta a.

Ngaizawng a lo nei zawk pawh a ni mai thei, thil ni thei lo tawp chu a ni lo, a hming maia a nupui ni tura inneih kha kan ni miau a, a ni ang mipa chhe lo leh hausa, a sumdawnna kawnga hlawhtling em em, hmeltha leh pian nalh tak tan phei chuan hmeichhiate chu an vang dawn lo nasa. Model-a sawmtu pawh an nei leh zeuh thin, mahse a hnar zel thung tih ka hre ve kiau. Mipa tawng tam lo tak a ani a, fiamthu han thawha mi han be seuh seuh mi a ni lo bawk a, kei lahin chu ti na na na chu tiin tul tawpah lo chuan biak ka tum bik lo.

Kan inneihni atangin a ma inah kan awm nghal a, a mizia hriain a chhungte pawn an sawi sel lem lo a nih hmel, mo ni ve ta na fam chu keimah zawkin nuam lo ka lo tia, mahse inthlahrunna tur awm lo khawpin mi an ti tlangnel thiam a, chaw eiah pawh vawi hnih min sawm tawh nge nge. An fel hlawm em em a, mi changkang tak tak awm khawm an ni bawk a, an polite hlawm viau, an tawngkam a zângkhaiin mi pawi sawi an hlau em em vek ni maiin ka hria.

End of Chapter Three.