NOBODY BUT YOU

Nobody But You

By OLACEE RUSSEL 

"Pawnah ka awm", ka phone chu ka melh reng a, tunah zan dar 10 a ri tawh a, mahse ka hnial thei lo. Zawi muanga thoin inthlak tawh lem lo chuan, kawr lum ka ha leh tawp a, november thla kan chuangkai tawh a, kum dang zawng aiin khua a vawt emaw tih mai turin a vawt tha. Dim ang reng tak hian ka room ka chhuahsan a, ka chhungte an mu fel vek tawh tih ka hriat chuan ka thaw huai mai.

Pawn ka chhuah chuan vawt tiin ka khur nghal bauh bauh a, rawn chhuak lem loin car-ah chuan min lo nghak a ni tih ka hre mai a, a car bul ka va thlen chuan min lo hawn sak vat a, ka thu lut zui ve mai bawk. Tlan chhuah a tum lai tak chuan "Hmun hlaah ka kal hman lo a sin, ka chhungte an mu vek tawh", zawi ang reng tak hian ka ti a, ani erawh chuan hma lam melh ngur hian motor a star chhun zawm a.

Kan tlan chhuah hnu chuan ka ngawi ta rauh rauh a, ka thil tih hi a dik lo a ni tih chiang takin ka hria, mahse ka hlat thei lo a, a kianga ka awm theihna tur a nih phawt chuan engmah tih hreh ka nei lo bawk. Motor ding dat thâwmah chuan ka hawi chhuak vat a, khawi emaw kawng sir laiah motor a lo ti ding a, mak ka ti lem lo, hetiang hi a thleng dawn tih ka hriat sa vang a ni.

"Messages te reply ve thin la, chanchin rawn zawh ve che pawn i view ve ngai bawk si lo", inthlahrung tak chuan ka ti chhuak sep a. Ani erawh a ngawi reng, ka lam a rawn hawi a, motor atanga chhukin seat hnung lamah a lut a, kei pawh chuan hrethiam takin chhuk ve tawh lem lo chuan driver seat leh front seat inkarah chuan ka lut phei a. Min lo vuan nghal vat a, a mal chungah min thuttirin ka hmuiah a rawn fawp nghal a, keipawh chuan ka lo chhang let thuai a, ka kut chuan a nghawngah ka kuah a, ani ang chiaha uar chuan ka fawp let a, a kut chuan min zut kual pah reng bawk.

Kan in kawtah chuan motor a ti ding a, ka chhuk dawn chuan a lam hawiin "Message reply ve tawh rawh aw, i thlen hunah lo sawi la", ka ti a, mahse chu thil chu a thleng ngai dawn lo a ni tih chu ka sawi hma atang daih tawh khan ka hre bawk.

Ka room chhung chu ka chhuah dawna a awmdan ngai chiah khan a ka awm a, khumah chuan ka let thla tawp a. Kha ni Sawmtluanga ka tawn niah bawk khan ka let leh ta a. Kha mi ni khan hna interview-na tur ka neih avangin hmanmawh takin ka kal hlawk hlawk a, zingah thawh ka hai vang a ni pakhat, traffic a jam nasat em vanga ke a kal ka ni. Hman hmawh tak chuan ka kal zel a, kawng ka lo en lo deuh a ni mahna, mi ka su ta chawrh a, kei a sutu zawk chu ka la tlu dawt zui, a hmel pawh en em lo chuan ka bag atang ka document lo tla darh nuai chu ka chhar a.

Min puih pawh tum lo chuan ka che chu min lo en tawp a, ka chhar zo ta maw tihah, din chhuah paha a hmel ka en chuan mak ti zet hian ka meng a, ani erawh chuan chal tichuar deuh tap chuan hrethiam lo tih hriat zet hian min lo melh thung. A hmel chu ka han en chiang leh deuh a, tu emaw a hmel pawh ka hriat loh, lem ka ziah mawl ve tawp nen khan an inang em a ni. Chu tia ka lem ziak a ang ta em em chu hamhaih lutuk chuan ka kut chu phar chhuakin a hmai ka han tawk de de a, a tak a ni tih ka chian takah phei chuan ka meng phawk leh zualin ka ring.

Ani erawh chu chu tia ka han tawk chu duh lo tih hriat zet hian hnung lamah a awm zeuh a, kei pawh ka in thing harh thuai bawk, "Ka tihpalh", ka tibah nak a, a lo bu nghut a, a kal chhunzawm leh nghal a, min chhang miah lo chu ka lungawi lo ru dawn dawn a, hawi let chuan a kalna lam chu ka en zui a, ka dinna piah lawka car lo in park-na lam chu a pan a, a ta a nih leh nih loh ka ngaihtuah hma hauhin a driver seat lam kawngkhar chu a hawng a, a thu lut zui a, a tlan chhuah thleng chuan ka thlir ta reng a.

Ka tlai tep tawh a ni tih ka hriat chhuah leh rual chuan hman hmawh tak hian ka kal chhun zawm leh a, kha pa vang vek kha a ni, a ni kha awm lo se chuan ka thleng daih tawh ang. Kal pah chuan ka ngaihtuah zui rauh rauh a, a sam buk lam te, a mit hmul buk lam lek lek te leh a hnar ngul sang tha zet te kha, a hmui hnuai lam chhah deuh tap te, chung zawng zawng chu ka lo hre hman vek a ni tih ka hriat chuan, lai zet hian ka nui a. Interview ka neihna hmun tur ka thleng zui ve mai bawk a, ka tlai lohna chu minutes 2 chiah chiah a ni.

Kei hi Rinsangzuali niin, thla hmasa lawk khan B.A english ka zo ve a, kan veng middle school a english teacher post ruak a awm lai tak a lo ni bawk nen han tih chhunzawm tur ka la hre mai lo chu hna ka han dil ve rawih a, vawiin hi interview kan neih ni tur a ni nghe nghe. Ka pa hian nikum hmasa mai khan cancer natna vangin min lo boral san tawh a, PWD-ah hna chelhin a awm ve a, chutia a han boral takah chuan vanneih takin ka u chu ka pa aiah a lut thei hlauh mai a, kan lawm thiam ve viau mai. Unau hi pahnih chiah kan ni a, kei hi a naupang zawk ka ni bawk. Ka nu hian min la dampuiin nurse hna a thawk ve mek a,  Pathian zarah kan chhungkaw khawsak a harsa lo hle.

Interview kan neih atanga kar khat a liam leh meuh chuan call ka dawng ta a, ka lo tling ve hi a lo ni, ka chhungte pawh an lawm thiam viau mai. Kha pa ka lem ziah ang tak kha hmuh leh ka châk em em a, khawiilo kal ni khuaah lah amah hmuh tumin ka hawi kual ruai thin a. A ni erawh puallenga thleng thla ang hlauh a ni lawi si, hmuh tur reng reng a awm ngai lo. Ka mut dawn thlengin min tibuai a, ka mu hnuah lah ka mumang lamah min tibuai zawm a, ka harh lahin amah lo buaipui tur ka hre leh si lo. A hriat miah loh chuan ka nunah hmun thuk tak a chang reng si a.

Thlakhat a liam leh chuan ka hmu leh hlawl a, chu erawh hmeichhia nen a ni tawh thung, chu hmeichhia chuan a banah a kai a, mizo film thar 'Nobody But You' tih an release-naah a ni a, hetiang hmuna ka hmu kha mak ka lo ti viau a, mahse kalpui a nei tih ka hriat takah erawh kha chuan ka mak tihna kha thikna in a rawn thlak a. Ka peih lo chung Bawihpuii'n min sawm avanga kal ka ni a, ka thlen hnuah pawh ka la in sawh nghawng nghawng lai a a hmel ka ka hmuh thut kha chuan ka phur hman viau a sin le. 

Chu mi zan chuan a hming thlengin ka hre ta a, Malsawmtluanga niin doctor hna chelh mek a ni a, an mahni'n private hospital an nei bawk. Chu a hmeichhe kalpui chhelo zet chu Asawmi niin, Sawmtluanga nen chuan kum 5 lai an lo inzui tawh a ni a, ani erawh beautician a ni thung, a dawr pawh Aizawlah na na na chuan lun tak a ni, thla hnih liam ta mai khan Bawihpuii sam colour tur kha an dawrah chuan ka kal pui nghe nghe a, amah chu a hranpa takin ka lo hre ngai lo a, kan kalni pawh chuan dawrah a awm lo a, a nauteho khan min lo buaipui zung zung a, an polite em em bawk, an dawr chhung pawh changkang tak a ni. 

An inthen a ni tih ka hriat chuan ka lo phur ve em em a, engtin tin emaw Bawihpuii'n a number lo nei theiin min pe chhawng ta a, min phur pui ve viau a nih kha. Ka zah theih lohna zawng zawng sawng khawmin "mi mawl lutuk", tih hi ka va thawn ta rawih a. 'Hi' 'Hello' 'I dam maw', tih vel kha chu a common riau a ka hriat vang a ni. Nithum hnu thleng pawh chuan message reng reng a seen thei lo, a last seen a hide daih bawk si nen.

Chuta chun chu ka reh zui ta vang vang a, a chanchin ngaihven erawh ka thuh ngai lo, an la inkawp tha leh lo tih chu ka hriat dan a ni a, hmeichhia ka nihna ang erawh chuan hma va lak ka tum bik lo. Ka cousin Rinzuala birthday kan lawm in kan inhmu leh hlawl a, ka cousin hi doctor a ni a, an hna vanga inhria an nih ka ring ve tawp a. Rawn kal pui a neih loh danah an la inthen reng a nih ka ring a, ka lo hlim ve viau. Keimah chauha ka lo thut lai chuan ka bulah a rawn thu thla a, ka lo zam hle a, a kamis var te chu a inhmeh bik riau hian ka hria a, a kawrkilh chung ber chu a kilh tel lo a, a kawrban pawh a thlep chhing daih a, chu chuan a tilangpa zual niin ka hre bawk.

"Ka duh che", ka ti sep a, beer in ngai hlei lo khan ka han in ve rawih a, can khat pawh in zo chuang loin hai deuh chiai a, boruak ngam tawk vel lekin ka rui bawk. A lo nui deuh suk a "ngaihzawng ka nei a ni tih hre reng chungin maw",chiang zet a min en chung hian a ti a, a tawngkam chuan an la inthen lohzia a nem nghet bawk, ka lo hriat ve dan dik lohzia ka hre nghal bawk a. "A pawi ka ti lo", chu thu chu ka ka atang a chhuak ang tih rin ngaihna ka hre lo, ka duh hneh lutuk a, engmah hi ka zah zo lo ni ta berin ka hria. 

Chu ta tang chuan mi hriat lohin kan inzui ve a, inzui han tihah pawn lam kan chhuak dun ngai lo a, call leh message tak ngial bawn kan inbe ngai lo, zan tlai takah thu tawite a rawn sawi a, keiin zawm loh harsa ka lo ti em em a, khaw daiah te kalin ka thianghlimna hial ka hlan ta a, vawi khatin vawihnih a hring an tih ang deuhin kan hmang zing ve ta viau. Tawngkam tawite a phuh chhuak a, zawm loh harsa ka lo ti em em zel a, pangngai taka inzawmna neih duh viau mah ila, ngaihzawng nghet nei a ni a, chu chu chiang tak ka hre bawk, ka duh thlanna a ni a, min en dahah duhna a tel lo tih ka hria, hei erawh chiang takin ka hria 'min mamawh' tih hi. Mahse a ropui lo viau a ni 

A chang chuan mahni inkhawngaihna in ka khat thin a, thiante nen a ni emaw chhungte nen emaw pawh nise han chhuah dun nikhuaa abialnu nena an inzui lai kan tawh fuh nawlh chang a tam a, chungah te chuan min hre ngai lo ang maiin min kal pel a, zanah a duh a hmuh theih nan thu tawite hmangin a lam pan lo thei loin min siam leh mai thin. Danglamna awm miah lo a min kal peih laite chuan rilru na takin chaw pawh ei thei loin ka awm thin a, zan mut theih loh ka ching thar bawk a. Mahse then harsa ka ti a ni. 

Engtik laiin nge ka lo mutthilh pawh ka hre lo ni engin ka hmai a rawn chhun en siar siarah chuan ka harh a, nizan thil thleng ka ngaihtuah a, ka phone ka ban vat a, ka rin ang ngeiin engmah a lo awm lo, eng vanga en kher nge ka nih pawh ka inhre chuang lo. Tho ta nghalin ka inphih fai a, ka va chhuah chuan ka nu'n eirawng a lo bawl leh mek tawh a, tih tur tul ang angte chu tih puiin kar loah chawi ei kan peih a, kan ei kham chuan vawiin inrinnina ni bawk nen bazaar ka rilruk a, Bawihpuii ka han sawm chuan thingtlang lama an chhungte dam lo, damdawiinah kalpui a ngaih avangin a lo hman lo a, keimaha kal ka hreh lo tho bawka tiin midang chu ka sawm duh ta lo law law.

Bazaar tawt zetah ka inhnawh phei a, vanneih thlakin ka duh zawng ka hmu fuh hlauh a, inkhai bawr teuh chung chuan inhnawh puar turin restaurant lam chu ka pan a, ka thut hnu chuan order ka siam zui nghal a. An rawn dah rual chuan ka riltam tawh lutuk chu ka ei nghal mai a, tute nge rawn lut a, tute nge ka piah thu pawh ka ngaihsak lo, chutia ka ei mawlh mawlh lai chuan "hei hi an siam thar a nia, ka la ei lo a, chah chhin ang aw", tih tawng thâwmah chuan ka hawi chhuak a. Sawmtluanga leh Asawmi chu i hmatawnin an lo thu dun a, menu an lo bih dawn mek bawk, min rawn hmu ve awmin a awm lo.

Ka thil ei lai chawl meuh chuan an awmdan chu ka melh reng a, an hlim takzet a ni tih chu tutan pawh hmuh hmaih theih a ni lo. Saw tiang taka a hlim lai saw ka la hmu lo a, tiang sawn ka kiangah a awm ve ngai lo a ni tih te ka ngaihtuah a, an hlim bik lutuk chu ka rilru na leh thinrim inpawlh chuan ka hmaa thil chu ka ei ta bawrh bawrh a, ka ka a leng lo thleng thleng a ka hnawh takah chuan ka helh zui a, ka khuh bawrh bawrh mai, tui min lo pe vat a, ka la khuh zui reng tho, ka mittui a tla phang tawh a, ka hrawk a thip vek tawh bawk. Waiter kal sawn hnu chuan a hawi chhuak a, Sawmtluanga chuan min lo melh reng a, Asawmi erawh chuan min hnung chhawn avangin min hmu lo thung.

Ei man ka pek tawh sa a nih avangin ka thil lei khai bawr tung chung chuan ka chhuak zui nghal daih a, pawn ka thleng chiah chu ka thaw zui nghal hawk mai, khatiang kha vawi tam tam ka tawng tawh chung pawn ngaiah ka nei thei lo chu a ni ber hi. Chau zetin in ka thleng a, ka thil lei pawh dah fel nghal lo chuan khumah ka mu zui nghal than a, vah chauh sa nen ka thil tawn teh hrep chuan min ti chau zual a, ka rin loh deuhin ka muhil zui ta mai a.

Ka harh leh meuh chuan khua a lo thim fel der tawh a, ka chauh ringin ka chhungte chuan min lo kai tho duh lo hi a lo ni. Thil ei châkna ka neih lem loh avangin chaw pawh ka ei duh ta lo a, ka khumah chuan ka mu zawi nghiai mai. Ka chan chu a tlawm tak ka ti a, dik tak chuan midang hmu lo ka ni bik lo, mahse rilruin duh a thlang tawh a, midang in tihbuaitir ka duh lo a ni. Min duh der ve tu te pawn min rawn be ve lawp lawp thin a, ka inhawng duh miau loh avangin an beidawng ve leh mai thin a ni.

Tunah erawh chuan rilru thar put ka tum tawh ang nga, engti kawng zawng pawn a ngaihzawngah min pawm ngai dawn lo a ni tih chang takin ka hre bawk a, ka hma hun atan awmzia awm vak lo a ni. Thu thlukna ka siam fel tawh a, Sawmtluanga ka then dawn a ni, tunah kan inthen lo a nih chuan nakinah kan inthen tho tho a la ngai dawn a, kan tih fel vat hi a tha zawkin ka hria. Kan inthen avang hian ka hlim phah dawn lo a ni tih chiang takin hre mah ila, a ni tal a hlim chuan hlim dan tur chu ka zawng chawp ve mai tawh ang, ani chuan tawrh chhan tur a nei lo bawk, a ngaihzawng ka ni miau lo a.

Ka phone message tone a rik chuan ka en nghak vat a, Sawmtluanga a ni! "Pawnah ka awm", tih te hi a lo nia, ka awm zawn hi a thip vawng vawng ni mai hian ka hria, "ka chhuak thei lo", ka ti a, min chhang tawh dawn lo emaw ka tih hnuah "i chiang a maw", a rawn ti leh a, ka inngaihtuah vang vang hnuah chuan ka chhuak ta a, phone-ah ni lo hmaichhanah ngei tawpna siam ka duh vang a ni, a hmel ka hmuh tawpna tur pawh a ni mai thei a, tha taka thlah ka duh vang a ni a, ka huat zui dawn loh thute pawh hrilh ka duh.

Motor chhung ka luh rual chuan a tlan chhuak nghal a, engmah sawi buai loin ngawi rengin ka chuang a, ka sawi dan turte ka ngaihtuah kual, motor a din dat chuan ka hawi chhuak a, ka thil tih tur hi a dik ber em ka hre lo a, mahse a tawp nan thlah ka duh a ni, min hriat rengna tur sulhnu ropui lem lo tak a ni ngei ang. A chet hun pawh nghak lo chuan a mal chungah ka va thu a, a hmuiah ka fawp nghal chat mai, a hamhaih ve deuh a ni mahna min chhang lawk lo, mahse a hamhaih chhung a rei lo, ni e nidangah kan mutdun khan min tih ang angin ka awm tawp zel a, chet ka la ve ngai reng reng lo a ni. Ka fawhna atanga ka hmui la sawnin a nghawngah chuan ka fawp a, ka zahna tizual turin a hmel ka en duh lo a, ka mit ka chhing tlat bawk.

Motor a start hma chuan "inthen ka duh a", ka ti zawi sep a, min en loin hma lam a melh ngur a, stearing erawh a hum nghet nghal hle tih ka hmu thei a, a hmelah erawh engmah a lan chhuahtir lo thung.

Min chhan lawk loh avang chuan " kan inthen tho a la ngai dawn a, tuna kan inthen mai hi a fuh zawk", ka ti leh dap dap a, "a tha alawm", a rawn ti ve ta sup a, ka melh reng a, he ti em em hian a ni maw min lo duh loh theih ni, amahah danglamna chhete tal pawh a awm lo chuan min tina tak zet. "Ka duh lutuk che a, min ngaih dan tur pawh zah zo loin, nangmah mai ni lo ka chhungte, Asawmi thleng pawn zah zo loin i kiangah hun ka hmang a, i kianga ka awm tlat chuan min duh ve theih mai kha ka lo ring thin a, mahse a lo ni teuh lo mai. Nang chuan duh i thlang fel tawh a, kei chu kawngpeng pakhat, kawngpui pawhna mai chauh ka ni. Ka duh ber ka nei thei ngai dawn lo a ni tih ka hriat atang khan a dawttu thlan thiam ka zir tan a, mahse chu chuan duh thu a sâm tawh ngai si lo. Ka ta ni tura ka ngaih che avangin ka tân ka suangtuah che a, ka suangtuahna a kal thu dawn veleh nang chu i bo leh daih thin si a.

Mahse pawn thiam dan ka lo zir ve tawh mai ang, hmeichhe chak tak ka ni thin a, tuna pawh ka la ni reng tih ka hria, beiseina eng de va va hi tunah chuan alh leh ngai tawh lo tur a chhem hlum a ni tawh, tunah chuan ka hlim tawh ang", ka bia nge keimah ka infuih pawh ka hre tawh lo, chiangtaka ka hriat erawh chu 'hma lam ka pan ang' tih hi a ni. Khumah chuan ka mu thla hnawk a, ka mittui a tla lo a, engtin chiah nge ka awm pawh ka hre chuang lo, ka â deuh hui ni maiin ka hria. 

Kum khat dawn delhi a ka awm hnuin ka nu in min ngen nasat em avangin Mizoram lamah haw chhoh ka tum a, ka u in airport thleng min thlah a, a ni erawh kar khat hnuah a rawn haw dawh chauh a ni. Kum khat hnuah mahni ram lei lung ngei han hmuh leh chu rilru hi a hlim veng veng mai a ni, ka tum vang ni hauh lovin mi pakhat bawk ka hre chhuak leh a, duh lo zet hian lu ka thung zui a, ka nuin airport-ah chuan min lo hmuak a, ka haw chu a lo lawm ngang mai.

In ka then hnu chuan chau zet hian room-ah ka lut a, ka room chu tihfai than tih hriat ze hian, bal leh rim chhia hmuh tur emaw, hriat tur a awm lo. Thlawhnaah hian ka mut a chhuah viau pawn ka muhil duh ngai lo a, in ka thlen tawh hi chuan ka mit a thip tun tawh zel a, tunah pawh mutthilh nan hun ka duh rei lo hle.

Ka harh leh meuh chuan ni a lo tlangsang tawh hle a, sana ka en chuan dar 10 a lo ri der tawh, nizan khan ka mu thlang a, tunah tiang chen chen ka mu leh a nia, inphih fai zawhah room atang ka va chhuah chuan ka nun min kaih thawh zawh loh thu a lo sawi mawlh mawlh a, ka chauh vang a nih thuin ka lo chhang mai a, ka haw tih hriain Bawihpuii a rawn lang zui zat a, kan han inhmu chu kan khek nghal vak vak mai. "I va cher ve, eng nge min lo hawn, i va tawn bo rei thei char char ve", zawhna chhan sen loh min zawt nghal mawlh mawlh, "eng ber kha nge ka chhan hmasak dawn", tiin ka lo fiam a, kan nui zui uar uar mai. 

Roomah kan inzui lut a, ka thil hawnsak ka pek chuan a lawm thiam ve viau mai, hun rei tak inhmu tawh lo kan ni bawk a, sawi tur kan ngah dun ngang mai. Sawmtluanga chanchin zawh ka duh viau a, theihnghilh tum a zin kha ka ni bawk si, haw chiah a han ngaihven nghal kha nuam ka ti si lo. Chutah ka rilru hria niawm tak hian "Sawmtluanga te chanchin kha I hria em? Ee i hre lo tak ang a, i zin daih sia", min zawt a, amah chuan a inchhang leh nghal zung zung a, "eng maw", ngai pawimawh lo niawm tak hian ka lo ti liam puat a, "ti khan awm vel lo mai teh aw, i ka ngaihven reng tih ka hria a nia, i zin chu i hlawk tehchiam lo a nih hi", a rawn ti leh bawrh bawrh a, kei pawh ka inzep duh ta bik lo, an chanchin chu ka lo zawt vat a.

"Kha tia i awmbo hnu khan Asawmi nen khan innneih an tum a, mahse Asawmi kha a dam lo zui ta reng sia, inneihna pawh an huaihawt thei ta lo alawm , tunah phei chuan a boral tawh, a natna tak erawh ka hre lo", a ti ta zung zung a, min thâwng ngei mai, an inneih daih tawh ka lo ring a nia, Asawmi a boral maw! A mak ka ti ngei mai, Sawmtluanga engtin nge a awm ve ang, ngaihzawng dang nei leh ang nge nge Asawi thihna a tawrh vangin a la indawm kun reng zawk ang. Ka thu hriat te chuan min tihah lutuk tlat.

Asawmi te in kawtah chuan ka ding vang a, ral ve hrim hrim ka duh vang a kal ka ni. Door bell chu ka hmet ri ral ral a, rei loah nu upa lam hian a rawn hawng a, midang lo awm ve dangte pawh chuan min lo chiauau nghal vat a, an fel tak zet a ni. Ka kal chhan te ka sawi chuan an hnuk a ulh tha leh a. Chiang taka ka hming te ka han hrilh takah kha chuan mak ti hmel deuh hian min en tawhin ka hria, a nu chu roomah a lut zui nghal daih a, hrilhhai fe a ka en lai chuan, lehkha bu chhah lem lo tak keng chung hian a lo chhuak leh a, ka hmuh chuan takah chuan diary a ni tih ka hre mai a, nu Pari ka en chuan a mit a sen ram mai.

 

Ka bula tak chuan a rawn thu a, "hei hi i ta tur niin ka hria, Mami kut ziak hnuhnung ber a nih hi", a ti tial ruan a, insum leh thei lovin a han tap leh rih. Ka ta tur kut ziak a lo hnutchhiah chu mak ka ti viau a, kan in hriat ngai awm ka hre si lo a, kei erawh kha chuan Sawmtluanga bialnu a nih vang khan ka hre ve tawp kha nia. Ka chhiar chak tawh em avang chuan chhuanlam siamin ka haw thuai a. Room kawngka chu chhunglamah ka kalh a, khumah chuan ka thu ran bawk. Ka keu chiah chu a phêk hmasa berah chuan hawrawp sin zet hian, 'UNSPOKEN THOUGHTS' tih hi a lo inziak a. Ka keu leh chuan he ti hian a lo inziak ta a.

Dear Diary, engtik atangin nge ka hre lo, mahse ani chu a danglam tawh tak zet a ni, ka kiangah a hlim tak tak tawh lo tih ka hre bawk. Engtik laiin nge kan inkarah midang an lo tlak zeh a, engtik laiin nge heng thil zawng zawng hi a thlen hre lo mah ila, ka kianga awm turin chelh ka la duh fan a, a taksa ka kiangah awm ve thin bawk mah se, a rilru erawh chu hmeichhe pakhat kiangah a awm tih chiang takin ka hria a ni. Rinsangzuali a nia , ani chu hmeichhe zaidam leh nunnem a ni, a felin a hmeltha em em bawk, ka hmangaih min lak sak avanga huat ka tum tehlul nen a nui mawi takte ka hmuh hian keimaha huatna awm zawng zawng hi an thlawk bo vek ta thin a ni.

Buaina ni ta ber chu Sawmtluanga zawk hi a ni, ka rilru tih nat a hlauh avangin ka kiangah a la awm tih ka hria a, a inthiam lo hle a ni tih sawi miah lo mah se ka hre thei a, ka lakah a inthlahrung a, chung zawng zawng vang pawh chuan min then ngai dawn lo a ni tih ka hre bawk. Mahse a rilru leh thinlung ka neih tel si loh chuan ka tan eng nge awmzia awm ang? Ka bialpa hmasa ber leh a tawpna ni turin ka duh a, inneih pawh kan sawi kai ve ta hial a nih kha! A taksa chu ka kianga awm inpeih reng mah se, a thinlung kha a ni ka duh zawk chu, mahni hma sial taka 'ka kianga a awm chuan a rilru ka nei leh thei mahna' tih rilru ka put laiin inneih ka rawt ta a, ani chuan awlsam takin a lo pawm mai a, mahse chu chu ka duh khawp lo a ni.

Ka hma sialna avanga ka hmangaih nun ka tichhe tur hi ka duh lo a ni, a ni chu hlim taka awm turin ka duh. Ka tlawm ta a ni, chhuah zalen mai chauh chu ka tih tur awm chhun nia ka hriat a ni a, chuan ka thil tih dikzia chu chiang takin ka hre bawk. Ani chuan inthen chu ka rilru tur a dâwn avangin a duh lo hle a, kan lo intiam dun tawh angin inneih hial pawh a sawi ri a nih kha. Ka laka a inthlahrun vang a ni tih chiang takin ka hria, mi tha tak a ni a, ani lo ka nunah midang seng luh ka tum lo bawk.

Van neihna nge vanduaina tih pawh hriat lohin cancer natna chuan min man ve ta a, ka chan tura ka dah kha ka ta a ni dawn lo tih ka hriat takah chuan ka lo beisei ngai hauh loh, mangramah pawh ka hmuh chhin ngai loh kha ka chanah ka tla a, pawm lo tak chunga pawm dan zir a ngai ta a ni. A rei tâk hnuah phei chuan 'ka ta tur liau liau a ni' tiin ka pawm thiam ta viau mai. Ka tan dam reng kha lungngaihna leh khawharna mai tur a ni a, chu chu Pathianin lo hriain min chhanhim angah ka ngai ta zawk.

Sawmtluanga chuan ka hun tawp dawn hnai thlengin min awmpui a, ka tan a inpe zo em em bawk, hmangaihna mit menga mawi taka in melh thin a, thian tha takah kan chhuak ta zawk a, chu chuan hlimna min pe bawk, a thinlung duh zawng pan turin ka duhsakna sang ber nen ka thlah ta a nih kha. 

Sawmtluang ka tana i awm reng thin avangin ka lawm a, ka hmangaih tak i nih vang leh, ka thian tha i la nih zui leh zel dawn avang pawhin ka lawm, nang ka tawng che hi ka inchhir ngai dawn lo a, ka tana mi hlu tak i ni reng dawn a ni. Ka ban phak loh a sangah awm mah la, nang erawh chuan ka kianga i awm ka thlahlel a ni tih i hriatin i rilru leh thinlung thu sawi ngaihtuah buai map lo in, ka ban phakah i awm a, ka tana i thil tih hi ka theihnghilh leh tawh ngai lo ang. Ka hmangaih hmasa ber i ni a, a tawp ber i ni thei tur pawh hi ka thinlung zawng zawngin ka lawm, i tana mi pawimawh chu ka tan pawh mi pawimawh an ni a, i hmangaihte chu ka hmangaihte an ni ve bawk. Sangzuali nen hlim takin awm ula, ka tana in hlutzia hi ziak dawn ila, ka nunna hian min daihin ka ring lo. Sawmtluang he khawvela ka awm ve tawh loh hunah pawh ka hmangaihna leh duhsakna sâng ber chu i kiangah, i bulah, i hmangaihte bulah a awm reng ang. Ka hmangaih tak zet che a ni. 

Diary chu ka khup thawk a, ka mittui a sur zung zung bawk, Asawmi tawrhnate ka ngaihtuah a, a rilru tur te ka dawnpui a, keia lo tawrh vete kha chu engmah lo mai a ni tih ka hre thar a, na tak tuar chhungin hlim takin a kal a ni tih ka hriat takah phei chuan ka zah a, ka ngaisang bawk, ani anga mitha hi ka la tawng lo. Sawmtluanga ka ngaihtuah a, Asawmi khan Sawmtluanga'n min hmangaih thu a sawi a nih kha, kan inkar zawng zawng a hre vek bawk a, chuti chung chuan a hmangaih kir leh beiseiin a lo nghak reng tihna a nia. 

Ka lo tap muhil a ni ngei ang ka harh leh chuan khua a lo thim fel tawh a, thil ei châkna ka nei loh avangin ka room-ah ka tawn chawt a, ka chhungte pawh ka zah zo meuh lo a ni, an lakah pawh ka inthlahrung viau nghe nghe, thla tam tak hnuah min hmu ve leh chauh a ni sia. Thlakhat zet a liam leh tawh a, Sawmtluanga hmuh ka duh viau nain biak hmasak ka duh tawh lo a, hmeichhe tiha mawi lo in vawi tam tak chet ka lo la tawh a, tih belh leh ka duh tawh lo a ni, pawn ka chhuak ngai mang lo a, inah chuan ka tawm deuh tlut tlut mai a ni. 

Ka phone ri chu hre reng mah ila ka uksak peih lo a, a rik reng takah erawh chuan a pawimawh a nih ringin ka en a, number hlang a ni. Lak loh ka tum zet nain min turtu awm ang mai hian ka la ta a, dar zat ka en chuan dar 9 chiah chiah a ni. "I lo haw tih ka hria a", ka thin a phu dup dup a, tawng chhuah lawkna chang pawh ka hre lo, ka ham haih em a, engkim ka hriat takah khan min biak ka beisei ru em em a, a reh vang vang takah erawh a rilru a danglam tawh a nih hial ka ring hman a nih kha. 

Ka chhang mai lo a, kan ngawi dun vang vang a, a la dah bik lo a nih tih ka hria, kan ngawih vang vang hnuah chuan " ka be lawk duh che a, rei lo te a ni mai", ka hnial hlau zet hian a ti a, a aw erawh a pangngai viau thung. "Ka lo kal ang", ka ti chhuak sep a, hahdam taka a thaw huai ri ka hre zawm nghak zat bawk. Pawn ka va chhuah chuan a car kawngkhar min lo hawn sak vat a, ka thut luh hnu chuan a tlan chhuak nghal a. A tua mah mah kan tawng lo ve ve a, ka kalna tur hman ka thlen hnu pawn kan la ngawi vang vang a, a car seat hnung a ngheng a, a mit a chhing tlat a, a muhil lo tih erawh ka hria, ka lo melh reng a, ka han en chian takah chuan a cher belh deuh a ni tih ka hmu thei a, a mit hnuai a val khalh bawk.

A rawn men chuan ka lo en reng si a, lai ru zet hian ka lo hawi sâwt a, a nui suk a ni tih erawh ka hmu hman tho, ka thin a phu nghal dup dup a, theihnghilh tumin ka zin bo a, ka hmuh leh takah erawh ka theihnghilh ngai lohzia ka hre chhuak a, ka lo ngai hle a ni tih pawh ka hria, bul tan hmasak erawh ka tum tawh bik lo. "I la danglam lo hle mai", amah leh amah a in hrilh ni mai hian ka hria a, a lam ka hawi min min lo la en reng a, ka bu ta nghut tho a. "Ngaihzawng i nei em", a rawn tih chuan "lu ka lo thing vat a, "chance ka la nei em", a tih leh chuan, "Mihring emaw, thil dang engpawh hlutna teh dan chu an hmelthat leh that lohah a ni lo a, a man a tam leh tam lohah a ni bawk hek lo, a entu leh a kawltu ngaihdanah a ni zawk. Ui hian rangkachak chhar ta se, a ha ziau tih reh nan a seh vak vak ang, a chhan chu kha rangkachak hlutna kha a hre miau lo a. Chu tiang chiah chu mihringte pawh hi kan ni a, min hlut thiam dan a zira hlua hlu lo mai kan ni", ka ti ta duah a, ka sawi thui bawk a, ka thaw huai mai, mak tak maiin ka thawl hawk niin ka hre bawk.

Kha thu kha ka rilruah ka lo pai ve reng tawh thin a, sawi chhuah ka duhna hmun taka ka sawi chhuah tak vang pawh a ni mahna. "I thu tlukna ka zah sak ang che, kha leh chen kha i lo bei ve tawh alawm, mahse ka tihpalh, hun kal tawh te, tun hnaiah thil thleng te, tun hunte leh hun lo la awm tur thlengin ngaihdam ka dil a che. Ka tibuai dawn che a, i rilruah ka châm reng ang nga, engtik lai pawhin min ngaihtuah reng ang, ka tihpalh ka tih tawh kha, Rinsangzual ka duh lutuk che a, ka â thei mai dawnin ka hria, ni lo ka â tawh zawk a ni ngei ang, chân leh che ka tum tawh lo a ni", lungawi zet hian ka lo melh reng a, han fiam viau ka tum vei nen, a thutak ta lutuk a, a rilru a thlak leh mai ka hlauh avangin fiam ta lo chuan a kutah nghet zetin ka va chelh a, a lo hum let ve thuai bawk.

Nichin lawka ka pasal ni ta Malsawmtluanga chu ka han melh a, mawi zet hian a nui a, a hlimna aia nasa a hlim chu kei hi ka ni ngei ang, a mitmengah tih tak zetna ka hmu a, inneih thutiam kan chham lai pawn kan hnuk a uilh hial a nih kha, min lawmpuitu an tha hnem em em a, thil pek beisei loha tam kan dawng bawk. Tunah chuan dan ang thlapin ka pasal a ni tawh a, inthen leh mai mai lo turin Pathian hmaah thu kan chham a, a tinghettu atan zungbun kan inbuntir bawk, engkim erawh Pathian kut vek a ni tih chiang takin kan hria.

Ni thla tur sen mawi phut maiin kan awmna chu a en kual a, kan hma lawk a Asawmi thlan chu kan melh vang vang a, kan rilruin a thiltih ropui tak avang leh kan tana a thil tih tawh zo zai te avang khan lawmthu kan sawi mawlh mawlh mai a ni. A sawmi hi nî ni ta ang se keini chu thla kan ni ang nga, zanah mawi taka kan en ve theihnan a ni chu khawvel mit hmuh ata a kalbo a. A tana kan hlutzia a sawi ang chiah khan kan tan pawh a hlu tak zet a, kan dam chhungin kan theihnghilh leh tawh ngai dawn lo a ni. 

Thutthleng lo awma kan thut chuan ka darah a lo kuah a, ka lo ngheng nghal vat bawk. Ni thla tur sen mawi tak chu kan thlir a, thu tam tak sawi lo mah ila, kan thinlungte chu hmangaihnain a inchhung khat tawn a, pakhat a lo phai ta deuh a nih pawn pakhat zawkin a chhung khat leh mai ang a, hmangaihna tawp thei lo siam turin bul kan tan dawn a ni.

"Eng ngati nge ka tih tauh hian ka lungawi hma chu mut i phal ngai loh a", ka ti chhuak sep a, ni thla tur chu a melh vang vang a, kei erawh chuan a hmel chu ka lo en reng thung. "Kan hma hun engmah kan hre lawk lo a, zanah lungawi lo deuhin muhil ta la, zing ni chhuak hmel hmu tur lo awm tawh lo ta la, engtikah mah ka inthiam thei tawh ngai dawn lo a, chu vang chuan tih thinrim che ka duh lo a, nangpawh lungawi lohna te i nei a nih chuan min hrilh zel la, hmeichhe dang ka lo melh a nih pawhin i nui hmel mawi tak min hmuhtir la, thingkung chu a zung vanga mawi taka thanglian a zarte chhuah thei a ni tih ka hre thar leh thin ang, i kiangah bawk ka lo let leh mai thin dawn a ni, kan chunga thleng tur chu Pathian thu thu ni mah se, ka theih dan ang ang a thil tha lo lo thleng tur lo ven ve ka tum dawn a ni", a ti nghet charh a, min rawn enin mawi deuh hian a nui a, keiin lungawi zet hian ka lo thlir thung. Ka pasal hi a hmeltha takzet a ni, mipa diktak thinlung pu mi a ni bawk.

Mihring nun hi chu lehkha bu ang mai a ni a, chapter tinah hlimna leh lungngaihna a awm a, chu erawh chuan zirlai tha tak min zirtir thung si a ni. Kan chhelvela mite hlutzia kan hre thar a, keimahni tan chauha nung tawh loin midang tana nung ve tur kan nih zia te kan hre thar bawk. Hmangaih i nih lohna hmuna hmangaihna i zawn chuan tahna leh beidawnna bakin a hmuak lo ang che. Hmangaih i nihna hmunah erawh i zawn buai ngai lovin, i nei lo a ni tih i hriat loh thlengin a awm vek, engkim.

A tawp ta!

PS - Comment lamah in ngaihdante lo sawi ve ula, short story ziah hi ka rilruah a awmna a rei tawh lutuk a, a plots tur lo duang fo tawh mah ila, a taka ka chet chhuahpui hmasak ber a ni a, in duh zawng a nih leh nih loh te in lo sawi ve hrim hrim dawn nia.🌷