REDAMANCEY 6

REDAMANCEY 

CHAPTER : SIX

ZIAKTU : OLACEE RUSSEL 

Ka hawi kuala naupang toys hlirin a khat a, bangah te chuan naupang thlalak a intar khat vek a, kil khatah chuan naupang thawmhnaw a inkhai tlar dul bawk. 

A ngaihna hre lo zet chuan ka nu chu ka melh a, min en in a nui sâng a, thutna tur a awm miau loh avang chuan kan ding dun reng a. Banga thlalak intar en chian tum chuan ka kal hnai a, ka nu pawh chuan min lo zui ve thuai a, mipa naupang pakhat mawi em em a nui lai chu ka melh fuh chat a, thlalak then khat te chu nau piang hlim te a ni nawk a, thla khat a nih lai te, chutiang zelin a kum 7 bawr vel a nih thlenga a thlalak chu a awm.

Ka nu chuan a hmaa thlalak mawi tak chu hlim zet a en pah hian "Hriatpuia a nih hi, kum hnih a nih laia kan lak a nia", a ti sep a, thlalak dang chu en leh in, "hei hi a pian hlim a mi a nia, a lo pian chhuah khan a thaw miah lo a, doctor-ten nasa taka an beih hnuah a mar an hmu ta a, chutah pawh an hmu lo leh zeuh thin a, beiseina sang tak nen Pathian hnenah kan tawngtai a, Ani'n min lo ngaithla a, kan dilte pêkin kan awm a, dam tha pangngai takin a rawn sei lian a, 

kum 7 a nih khan kal(kidney) lamah harsatna a nei chho tan a, test hrang hrangte kan neih hnuin doctor-te chuan a kal hian hna a thawh kim tawh loh thu min hrilh ta a, kan thlak vat a nih loh chuan a nunna hial a chân theih tur thu min hrilh bawk a.

Doctor-te chuan tih theih an neih tlem hle thu sawiin phai lamah min refered ta a, a kal thlakna tur pawh zawn buai ngai miah loin, vanneih thlak lutukin kan lo inmil hlauh a, ti chuan ka fapa thla kaw chhung, ka pum chhunga ka thawk ruala thaw ve thin kha, ka hnute tui ring tura lo piang chhuak ringawt pawh ka tan a hlut tawh teh lul nen, a aia inzawmna tha zawk nei turin Pathianin min ruat a, ka fapa a nih vang hian vawiin ni thleng hian Pathian hnenah lawmthu ka sawi thin.

Chu ta chin chu harsat lian tham tawk loin Pathian zarah hrisel takin a rawn thang lian a, engtiang pawha lianin, hmuh phak lo a hlaah pawh awm mahse ka thinlung hi a kiangah a awm reng a, a unaute tan a fair lo tih ka hria mahse, fate theuh theuhah buaipui nasat bik hi chu kan rilruah pawh an lo lian deuh bik a nih dawn hi", a sawi tawp lamah chuan za lo deuh hian a nui a.

"Ka hrethiam che alawm", sawi tur hre lo zet chuan ka lo ti a, ka hrethiam tak tak em phei chu ka hre lo, nui sang hian min en a, 

"ka mo atana ka pawm nghal thlap che kha mak i lo ti mai thei, kan fate duh zawngah hian inrawh kan tum lo a, an tâna tha leh tha lo hre vek an ni tawh a, an thlang sual a nih chuan an tawrh ve a ngai a ni mai. 

Amaherawhchu mi tha lo an neih hi kan hlau a, Hriatpuia hian hmeichhe pakhat a lo tawng tawh a, ani chuan hun harsa a tawh lai ber leh a mamawh lai berin a kalsan a, a tuar em em a, rei tak a nunah nghawng a nei nge nge, mahse nang a tawng ta che a, nupui neih a tum thu min hrilh khan min thâwng em em a, i hmel ka hmuh khan ka ring nghal thlap che a, i mit meng pawi sawi lo zet a min melh khan Hriatpuia a nun ngai i neihtir leh theih hi ka ring tlat a, tunah a chhanna ka hmu mek a nih hi, nang a neih hnu che hian a danglam tawh tak zet a ni. 

Hetiang thu ka hrilh che hi mak pawh i ti mai thei a, mahse Hriatpuia kiangah hian i awm reng ang ti raw, i kalsan lo ang tih min hrilh rawh", ngen ngawl leh beisei nei zet hian min en a, a hmelah chuan hlau thâwng hmel ka hmu thei bawk. 

A kut chu va ban in nghet zet hian ka chelh sak a, "Ani'n min kalsan a nih loh chuan ka kalsan ngai lo ang", ka ti a, ka nuih sang bawk, chutah hahdam hmel zet hian a rawn nui a.

Ka kuta test kit chu ngam leh ngam lo hian ka bih a, rin pahnih a lo sen kalh mai, ka mittui a rawn baw zawi a, hlimna vang a ni, mahse ka la chiang ngam tlat lo, ka pum chu ka dawm a, ka thin phu dep dep pawh chiang takin ka hria. Hriatpuia ka ngaihtuah a, pa a ni ve tawh dawn a ni tih hi engtin nge a ngaih ang, a hlim ang tih ka ring a ni.

Ka nu te ina ka len atang kar khat zet a liam leh tawh a, ka ngaihtuahna tibuai zettu erawh tunge Hriatpuia hmangaih chu ni ta ang tih hi a ni, tun thlenga a nun a nun la nghawng buai theitu chu tunge ni ang? 

Amah lah zawh chi a ni dawn der si lo, tunge ni ang tih ka ngaihtuah tlut tlut zel a, ka nu kha ka lo zawt mai lo kha ka inchhir hnuhnawh leh thin.

A pum chu ka dawm ka dawm a, ka hlim takzet a ni, Hriatpuia fa a nih vangin ka hlim leh zual a, ni e, ani hi ka hmangaih a ni. Naktukah in doctor va hmuh a, a ni ngei a ni tih ka chian hnuah Hriatpuia chu hrilh chauh ka tum a ni. 

"Eng nge i ngaihtuah a", hnung lam atangin min rawn kuah a, a lum nghal veng veng mai, a kut chu ka lo vawn hman vat a. "Engmah ni lo e", ka ti sep a.

Min kuai her a, ka chalah chuan a fawp vang vang a, "muhil tawh rawh le a tlai tawh a nia", a chau deuh a ni mai thei, a aw a dul em em a, kar loah a muhil ta reng bawk a. 

Kei erawh naktuk ka nghahhlelh lutuk vang nge ni ka muhil thei reng reng lo a, fa nei tur angte a ka in suangtuah chuan ka nui ver ver a, ka hlimna chu ka thup thei mawlh lo a ni. 

Ka muhil dawn siar siar tihah phone riin min ti harh a, a ringtone atang chuan Hriatpuia phone zawk a ni tih ka hre mai a, a tawp a, a ri leh a, tun ang zan tlai tawhah tunge ni ang, thil pawimawh pawh a ni thut thei tiin a ban chu dim te in ka la sawn a, ka tho ta them them a, a tawp leh hman chiah a, messages tone a ri ve ta thung a.

Phone chu ka ban de de a, mahni inthiam lo rilru tak chuan ka en a Angela tih hnen atangin a nia , message chu open kher loin notification chu ka thai thla a 

"Ka nghak reng thei lo a nia, ka ngai tawh che a, nang lah chu hmeichhe dang kiangah i mu daih a, i tih tur chu ti vat la, i kiangah ka awm duh tawh, keimah chauh chuan ka khua a har", tih hi a lo nia, a dang lehah chuan "Muttui aw ka hmangaih che", ka thin chu a phu dep dep a.

Message chu a ngaihna ka hre lo kher mai, ka chhiar nawn leh thin a, a tawng chu hrethiam vek chung siin a sawi awmzia ber erawh ka hrethiam reng reng lo mai, a thawn sual em maw ni le, tunge Angela chu ni ta ang?

Khumah Hriatpuia hlat deuh takah huan ka thu a, tui taka a muhil hmel chu ka thlir a, ka ngaihtuahna chu a buai tak zet, Angela tih hming pu a thianteah hriat ka nei si lo. Amah chu zawh dawt tur em maw ni, mahse thuruk inthup lian tak lo awm ta se, inven nana hmangin an fimkhur phah thei tlat.

Sana ka melh a khua a var har tawh dawn lo tih hriain ka tho chhuak ta law law a, luna burin inhnuai lamah ka chhuk a, ka rilru lak pen nan chuan tih tur ka zawng kual a, a zawna zawng ka ni bawk a, ka buai ta viau a, mahse ka lawm daih zawk, ka awm mai mai a nih chuan ka rilru kawmin ka inngaihtuah leh vak vak ang nga, zawhna tam tak ka inzawt bawk ang nga , a chhanna erawh Hriatpuia chiahin a kawl thung ang.

Chhuat nawta ka lo buai lai mek chuan Hriatpuia chu stepah chuan a rawn pen thla thauh thauh a, a dress-ah chuan a walk dawn a ni tih ka hrethiam mai. Min hmuh vel leh chuan "Good morning", a ti sup a. Nuih luih sâng hian "Morning", ka ti let ve a, awih awm loh khawpin a aw a pangngai, chu chu ka duh dan tak a ni bawk. Choka-ah va lutin rei loah tui bottle keng chungin a rawn chhuak leh a, min be tawh lem lo chuan pawn lam panin a kal zui nghal a.

Dar 6 velah Hriatpuia a rawn let a, kei erawh ka lo la che mawp mawp thung, room-a a chhoh dawn chuan rawn leh hawiin min en reng tih chu ka mit sir chuan ka hmu thei a, engmah sawi ta lo chuan chuan a chho thlang ta zawk a. A kal chiah chu ka thil tih lai chawl meuh hian ka ding a,  boruak chu ka hip lut kawk a, a insanmar nasatzia pawh ka hre ta chiah.

Ka awmdan chu mak a ti ve pawh a ni mahna, ni e mak tih loh ngaihna a awm lo, min thawh khalh ziahtu kha ka thlawh khalh ve ta tlat a, chu ringawt pawh chu thil mak a tling.

Dar 8 a rik chuan ka in tihfai chu ka zo vel chiah chiah a, hah zet hian sofa-ah ka thu a, ka hawi kual a, a fai tha kher mai, darthlalangte pawh a tle hûn a, hmuh a nuam tak zet, inbual tur chuan ka room lam ka pan a, ka inbual zawh chuan rei awm tawh loin inhnuai lamah bawk ka chhuk leh a.

Sofa hnungah chuan ka lu chu ka nghat a, ceiling chu ka melh reng a, a ngaite bawkin Hriatpuia message dawn chuan ka rilru a rawn luah leh ta a.

Kut vawt thlerin ka biang a rawn khawih chuan ka meng chhuak nghal a, Hriatpuia chuan min lo en reng a, a lo inbual fai leh sar tawh a, hmuh a nuam leh pek hle, ni dang ang chu ni se, a hmel tha tak chu enin ka pasal a nih vang chuan ka inchhuang leh hle tur a nia, tunah chuan ka rilru buai lutuk tlat a ni.

"Dik lo a awm em?", a ti sup a, ka sirah chuan a rawn thu thla ve nghal a, lo insiam remin ka bawh titih a, a âwmah chuan ka lu ka nghat a, min lo kuah ve thuai bawk.

"Awm lo e, nizan ka mu tha vak lo a", ka ti sep a, ka hnungah chuan a chul heuh heuh a, ka mit ka lo chhing vat a, a hnenah hian ka thla a muang tih chiang takin ka hria a, kha message kha chu an thawn sual a nih ka ring ta zawk.

Rei fe chutianga kan awm hnu chuan thil hriat chhuah zawk ka nei a, inbeng kâng nghalin "vawiin chu ka in entir dawn em maw ni ka ti deuh a, ka lu hi a na leh tlat thin a", peh hel ang reng tak chuan ka sawi a, ka luna ka chhuanlam a ni mah zawk.

"Ka kalpui dawn che nia", a lo ti ve thuai a, a âwmah bawk chuan ka va bawk leh a, ka chalah a lo fawp vang vang a, min kuai dakin ka hmuiah chuan a rawn fawp a, ka lo chhang let thuai a, a duhthawh telh tleh a, engtik laiin nge ka chungah a awm hman reng ka hre lo, a kut chuan ka kawr chhung a rawn zen a, ka hnuteah a tawp a, a kut tang chuan a hmur chu a chhep hrual a, awm ngaihna reng ka hre tawh lo.

A kutin a khawihna chu a hmuin a chhui thla zel a, ka kawr chu rawn hlîmin, a ka chhung sa ham ham chuan a hnute chu a rawn hmuam a, a lei a hman tel takah phei chuan ka awm ka lo kan awk a, zei zet chuan a ti che kual a.

Ka kekawr kawng a vawnna a kut chu lo vawn hnanin, "hetah chuan ni lo", ka âw teh hrep pawh chu a, ka hmuiah bawk a rawn fawp leh a, min pawm kâng a, ka ke chuan ka lo kherh bet ve nghal a, min fawhna thlah chuang lo chuan inchung lam min pan pui a.

A darin kawng khar a nêk hawng a, khumah chuan min bawh tlu nghal a, in la hrangin hmanhmawh zet hian a thawmhnaw a phelh a, kei erawh chuan thawmhnaw ka inbel tawh lo thung.

Ka hnuteah bawk a bur leh chat a, a kut chu a sawn thla a, ka point a khawih thlen takah phei chuan ka insum thei lo lek lek tawh, a hmuin chu a sawn thla zel a, eng nge tih a tum tih chu mumal lo zet hian ka lo en a.

Ka kapah chuan a hmai chu a phum ta a, ka awm ka lo kan leh awk a, a lei chu zei zet hian a chet kualtir a, ka taksa a rawn khur tan a hriat vel leh chuan tawp chawtin a mipatna chuan a rawn chet chhunzawm ta a.

Ka pahnih thâwm siam bak chu thâwm dang hriat tur a awm lo, nupa kan ni a, kan tan thiang lo a awm tlat lo, chu chuan a nawmna a tifamkim niin ka hre bawk.

Traffic jam-ah kan tang leh nghek a, Hriatpuia'n meeting pawimawh a neih leh thut avangin doctor erawh min hmuhpui thei dawn ta lo a, damdawiin kawtah chuan chhukin ani erawh a tlan tlang leh nghal a.

Doctor kan biak lawk sa tawh a nih avangin ka thlen chuan ka lut nghal mai a, kan inhriat sa tawh avangin in nel takin kan inbe nghal thuai a, Hriatpuia thianpa tho a nia a, Ruatdika niin tlangval ngo ving veng mai a ni a, a incheina leh a hmel fai sarte chu hmuh a nuam em em a, a hnathawhin a zir bawk a, kum naupangte ni chungin a lang zahawm khup mai.

Ka rai tih chu ka nem nghet ta thap,  Ultrasound thlalak chu ka en leh thin a, ka hlim tak zet a ni. Hriatpuia hotel lam panin taxi ka la a, ka in entirna lehkha leh ultrasound thlalak ka bag a awm reng chu ka hre rauh rauh a, nizan lam message rengin ka rilru a luah tawh lo.

Hotel ka thlen chuan floor chung berah ka chho thlang nghal a, a secretary chuan min lo wish sap a, ka lo nuih var var mai, ka hlimna chu ka thup hlei thei meuh lo a ni. "Hriatpuia a awm em", ka tiin ka zawt a, ka la nuih sâng tho.

"Sir chu vawiinah a la rawn kal miah lo", a lo ti a, ngaih that lohna pawh ka la nei chuang lo, hmun dangah an meeting a nih ka ring nghal mai a, "meeting dar engzahah nge an zawh ang", tiin ka zawt leh a, "vawiinah meeting a nei miah lo", mak ti ang reng tak hian a ti a.

"Ohh! I hresual a ni mai thei, meeting a nei alawm", ka lo ti ve vat a, mihring ve tho an ni a, an ni tan pawh thil hriat kim vek a har dawn tih ka hria, "min lo hrethiam la, vawiin a programme kan en nawn lawk ang nge", tiin a hmaa computer chu a en a, amah chu ka lo en ve ran bawk.

"Miss, a pawi ka ti lutuk, vawiinah eng meeting mah a nei lo, i duh phawt chuan hei i check thei ang", tiin a sawi ta mai a, urgent meeting a neih thut vanga damdawi ina min kalpui hman lo ang khan a insawi si a, a secretary chuan min lo la en reng a. 

Ka bag atang chuan ka phone chu ka phawrh a, "a va zia lo tak, a message ka lo chhiar sual a nih hi, meeting a neih dawn thu a sawi khan hotel lam ni turah ka lo ngai ringawt a, i hna ka ti khaw tlai ringawt che a, a zia lo hle mai", ka ti ta hluai a.

"Ti khaw tlai lo e, in tihbuai ber tur zawk alawm kan nih", a lo ti ta zung zung a.

Hotel kawtah chuan ka ding vang vang a, a message engmah ka dawng tak tak lo a, ka zahna tur thup nana dawt sawi mai ka ni, nupa inpawh lo lutuk tur ang nga min ngaih kha ka duh lo a ni, ka in entirna result ngaihven tur tak ngial pawn min la be lo a. Eng vanga dawt min hrilh nge a nih ang, tha takin a hman loh tur thu sawi mai se, ka phut luih dawn loh tehreng nen,  hotel-ah a awm lo a, meeting a nei bawk hek lo, a nih chuan khawiah nge a awm tak ang.

End of Chapter Six.

PS- Comments lamah te ka dam vat theih nan duhsakna te min hlan liam liam a, ka lawm tak zet a ni. Ka tan in hlu lutuk a, ka story te ngaihnawm ti deuhin in lo chhiar thin a, amaherawhchu in beisei ka phâk loh ka hlau em em a, in tel lo chuan engmah ka ni tih ka inhrechiang em a ni.