REDAMANCEY 7

REDAMANCEY 
CHAPTER : SEVEN
ZIAKTU : OLACEE RUSSEL 






Ka phone chu phawrhin ka call a, a ring ral ral ri chu ka ngaithla a, a tawp a, ka call tha leh a, a la thei chuang lo. Taxi chu lain inlam chu ka pan ta ngawt a, kawng tluan chuan ka ngaihtuah a, ka awmdanah chuan biak ka châkawm teh chiam lo a ni mahna, taxi driver nen chuan kawng tluanin kan inbe lo a, side glass atang chuan min melh leh zawk thin tih ka hre thung.




Chau zet hian ka room-ah chuan ka lut a, ka inthlak nghal a, rilru buai zet chuan khumah ka let thla tawp a, ka phone chu lain ka call leh ngat a, a ngai ang tho chuan chhana ka dawng lo. Zinga kan awmdan leh a thusawite ka ngaihtuah let a, rinhlelh tur pakhat mah ka hre lo, kan bul tan dan ka ngaihtuah a, awlsam tein bul kan tan a, kan kal dun zel emaw ka tih laiin ani chuan kawng pêngah min pênsan a, keimah chauh awm tawh ang maiin min inngaihtir a, keimah chauh chuan kal dan tur ka hre lo a ni.





Kan bul tan dan ngaihtuahin atan thil harsa a ni lo, kei ve hi engtin nge ni ta ang, a vawikhatna atan ka nu leh pa, ka kianga an awm loh vang chuan ka vui ve ta, 'ka tawrh hi mi tawrh lakah eng tham mah a ni lo' ti khan ka lo inhnem ve thin a nih kha. Ka hriat miah loh laiin Hriatpuia kutah ka lo innghat nasa hle a ni tih ka hre thar a, chân ka hlau em em bawk, ka chhungkaw neih chhun, ka unaupa, ka pa leh ka pasal, ka tân chuan ka engkim a ni.




Ka pum chu ka dawm vat a, beiseina chuan chawp leh chilhin min rawn luh khung a, kan tan, kan nun tihlim turin Piatianin min pêkah ka ngai, ka hlauh thawn laia inhnemna tur min pe ni maiin ka hria.





Thil hriat chhuah zawk ka neih rualin Hriatpuia room lam ka pan thuai a, ka hawi kual a, engkim chu a awmdan tur ang thlapin an awm, a thawmhnaw bawm chu ka hâi a, engmah hmuhtur a awm lo, a khum bul drawer chu kawng lehin lehkha ho chu ka en kual a, ka tana tangkai tur hmuh ka nei chuang lo.





A office lam chu ka pan leh a, hna a thawh changa ka luh fona a nih avangin ka tîm lem lo, a dawhkana lehkhabu ho chu ka en kual a, a drawer chu ka hawng leh a, a hnuai ber ka hawn dawn chuan ka tîm deuh tlat a, ngai pawimawh lo lui chuan ka hawng ta pawp a, file chu la chhuakin ka en a, ram lehkha vel a lo ni a, a ngai ang thlapin ka dah lut leh a, bei dawng zet chuan ka hawi kual a.





A dawhkan kil sir lam pang chuan ka mit a la ta tlat a, kan en chuan dawhkan bang dang nen a inang lo tih ka hmu thei a, va kal hnaih nghalin kan en chuan kawngkhar te reuh te hi a lo nia. Awlsam takin ka hawng thei mai a, mahse a chhungah chuan kawngkhar dang bawk a lo awm leh a, chu erawh chu passcode ngai a ni tawh thung.




Hriatpuia brithday chu ka chhuk lut a, mahse a dik tlat lo, a ni thei tur awm ang a ka hriat chu ka risk zel a, beidawng zet chuan chhuatah chuan ka thu ta hnak a, engthil chiah nge he bawm chhungah hian a dah ni ang, he ti em em a hmuh hlau ang hrim a a dah chu, he ti em em a thuhruk chu ka hriat chian châkna chuan min tur et et mai.






Hriatpuia thu sawi ka hriat chhuah zawk rual chuan rang zet hian ka tho a, ani khan "ka tan chuan number 17 hian ka nunah hmun a chang tam ber", a ti a nih kha. Hriatpuia birthdate leh number 17 chu ka chhuk lut a, a dik tlat lo, 17 leh 25 chu ka chhu leh ta a, ka thin a phu dep dep a, beisei nei zet hian ka nghak ran bawk.






A ri ta khep a, a in hawng ta, kut khur dar dar hian ka kawng zau a, a chhung a awm chu chiang zet hian ka melh a. Diary chhah lam lek lek a ni, tim dai hian ka la chhuak a, eng thil nge a chhungah inziak ka hre hauh lo nângin ka hlimna tur ka hmu dawn lo a ni tih ka ring thung a, ka tah a chhuak et et mai.






Hriatpuia chair-ah chuan ka thu leh a, ka keu a, a hmasa berah chuan hawrawp hraw zet, mipa kut ziak tih chiang zet hian "THIS IS THE BEGINNING OF SOMETHING NEW", tih hi chiang zet hian hawrawppui hian a lo inziak a, ka thin phu ri dup dup chu chiang zet hian ka hria, ka keu leh ta a.





Date : 17 March 2016.

Vawiin khan hmeichhe hmetha tak mai kum 20 bawr vel tur hi ka hmu a, a sam sei tak chu a thlah a, ngo ving veng mai a ni, a hmelah chuan make up hmuh tur a awm lo a, a hmui pawh tih sen chawp ni hauh lo hian a sen no châk a. Thawmhnaw zahawm tak a inbel a, hmuh a nuam viau mai. A kalna lam chu ka enzui reng a, ka kalna lam tur a nih loh a vang chuan ka kalsan ta a.





Date : 04 May 2016.

Kha hmeichhia ka rilru luah rengtu kha vawiin chuan ka hmu leh hlawl a, a ngai ang bawkin hmuh a nuam leh viau. Tunge a hming? Khawi hmuhah nge a chen? Ka be ngam ngang si lo a, a ngaite bawkin a kal liam lai chu ka thlir leh ta a.




Date : 07 May 2016.

Vawiin chu ka hlim hle mai a, kha hmeichhia kha ka hmu leh a, mahse nidang ang a ni ta lo, a ni chu ka hmaah rawn dingin min melh chho. Lai zet hian min en a, "Ka pu ka kalna tur i dal a, ka lo kal lawk thei ang ngem", pawisawi lo zet hian a ti a, "Ka pu", a tih avang chuan ka lawm loh phah lo. Kal sawn ta chiang lo chuan a hming ka zawt a "Angela", lai zet hian a ti a.




Date : 17 January 2017

Angela chuan ka sawmna chu pawmin ka bialnu a ni ta a, ka hlim tak zet a ni.



Date : 14 July 2017

Angela chu ka kiangah a cheng ta a, nupa kan nih lohna chu kan kut tangah zungbun hmuh tur a awm lo mai chauh a ni tawh.



Date : 21 August 2017

Angela-i hmelah hian hahdamna a awm ni mai hian ka hria, hmeichhe zaidam leh nunnem tak a ni.



Date : 17 December 2020

Diary, vawiin chu chanchin lawmawm loh tak mai kan dawng a, Angela chuan nau a lo pai thei reng reng lo, a rilru a na em em a, in then hial a rawt a nih kha. Ka hrilhfiah fe hnuah kan inthlem dam thei ta hram a ni.



Date : 05 July 2024

Hun kan nei tam tawh lo a, inngaihzawn atanga bul tan hman pawh kan ni chuang lo. 


Date : 10 August 2024

Hmeichhe chak tak anga a lanna phen a der depnaa khat a nihzia hi ka hai hauh lo.






Diary chu ka keu leh a, a lo blank vek, a tawp thlenga ka keu hnu pawh chuan thu ziak hmuh tur reng a awm tawh lo. Zawi zetin ka khumah ka thu thla a, ka mittui a hul hiau a, ka rilru erawh a tawi map thung, tlawm intihna in ka khat a, eng vangin nge kei kher min thlan, ka tawt tun mai, tap bawrh bawrh ila ka thawl zawk hawk ngei ang.





Ka bengah an ri nawn tluk tluk a, ka pasal chuan min bum chiang hle mai a, a hmanrua mai ka nihzia chu ka benga thil in thum rawn tluk tluk chuan min hrilh chiang hle a ni. Ka beng ka hup ta ngawt a, mahse a tawp thei chuang lo, a fiah tulh tulh ni mai hian ka hria. A hmel ka mitthlaah a rawn lang a, ka ring phal lo a ni, a ni khan min bum a ni, ka kehchhe chiang ngei mai.
 





Hriatpuia nu min hrilh te kha ka hre chhuak a, ani pawh pawh ka ring zo tawh lo, chiang takin a fapa kalsan lo tuin min ti a nih kha, mahse eng nge ka chungah thleng ta hi. Bathroom ah chuan lutin shower hnuah chuan ka ding a. Tui vawt tak hnuaiah chuan ka ding reng a, ka ziaawm phah hauh si lo.





Sana ka en a, tlai dar 3 a lo ri der tawh, ka room chhuatah chuan ka thu sawi nuai a,  ka awm zel dan tur ka ngaihtuah a, khawiah nge ka kal ang? eng nge ka tih tak ang? Ka mal lutuk te chu hrehawm ka ti, thian, mangan changa biak tur tak ngial pawh ka nei lo chuan ka tih ngai hauh loh in mahni inkhawngaihnain ka that a. Hriatpuia lakah ka innghat nasa lutuk te chu mawhpuh tur ka zawng ruai a ni ber.





Thian ka mamawh changin ka thian a ni a, pa ka mamawh lahin ka tan a inpeih zo em em bawk a, hetiang hian lo awm hauh lo se ka tan a tha zawk tur, engkimah ka tan a hmasa ber vek a ni. A kiangah ka hlim a, ka lungngaih pawn ani thoin min thawi dam leh a, mahse tun hunah ve thung chuan min tina bertu a ni lawi si. Khang kan hun hman liam ta zawng zawng kha ngaihtuah kir leh atan chauh maw a nih tawh, a leh pek a awm tawh lo tur chuan min ti na.






Lem chan vek maw lo ni a, fa a duh vangin kha leh chen a hmangaih miah loh kiangah a cheng a, engtin nge a tih thelh zawk. Kei lah chuan a tak emaw tiin hlim takin hun hun leh ni ka chhiar a ni si a, a nuih ka ti za thin ngawtin ka ring. Min duatna te, min ngaihsakna te kha ka lo hlimpui viau thin a nih kha, ani chuan hmangaih a lo nei reng a, hah ka nun a tihchhiat dawn a thu tlukna a siam lai khan vawikhat tal min ngaihtuah ve ni se chuan hetiang hian ka awm lo tur, ka nun kha pangngai takin a kal thin a nih kha.






Dar kar engzah nge chutiang ka thut pawh ka hre lo, ka harh chhuah muh chuan khua a lo thim fel vek tawh a, thim hnuaiah light pawh on lo chuan ka lo thu tlawk tlawk hi a lo ni, va on tumna pawh ka en chuang lo. Breakfast bak kha engmah ei ka la nei lo a, ei châkna pawh ka nei lo, ka awm ngai chuan ka awm reng a, tunah khawnge a awm ang? A hmangaih tak kiangah chuan em ni a awm ang? Fiamthu thawh nana min hmingin min nuihzat mek mai thei bawk.






Ka room kawngkhar inhawng thâwm chu ka ngaithla a, va hawi phei kher lo mah ila Hriatpuia a ni tih chiang takin ka hria, ka room la thim vek mah se ka room pawn lama thla eng chaurau tak lo lut atang chuan min hmu ngei tih erawh ka hre thung. Light a on a, a eng ta iar mai, a lam erawh ka la hawi ta chuang lo, ka lam panin a rawn kal a, ka bul a rawn thleng tep tihah chuan a pen tawp ta chat a, a hmel en tum a, ka hawi chuan, ka bul lawka ka luggage chu a lo melh ngur a ni tih ka hmu a.






A hmelah chuan danglam a awm lo, ka chet dan chu lo hre lawk ang mai hian mak ti hmel ka hmu lo a, chu chuan min thâwng letling zawk a, mak ti hmel emaw, hamhaih hmel te chu han pu ve se hetiang em em hian mak ka ti lo tur. Hetiang a then hun hi a lo nghak reng tawh zawk pawh a ni thei, ning chung chunga ka kianga hun a hman ral ni pawh a awm ta ve ang.





Zawi muang hian ka ding chhuak a, a lam pan chuan ka ka chet chet a, ka chet dan chu ngawi reng hian, a dinna ngaia ding chungin min lo thlir reng a, a hmaah tak chuan ka va ding a, a mitah chiang takin ka melh bawk. "Engtin nge i tih theih zawk", ka ti a, ka âw chu a dam dap a, danglam a awm lo bawk, ani pawh hian chiang takin ka thinrim tawh chuan ri buan buan lo a, dam dap chi ka ni tih a hria. 





"Ka tân thil harsa a awm lo ka tih tawh kha", za lo zet hian ka nui chhuak a, min melh reng a, inthiam lo hmel tak hmuh ka lo inbeisei ve a sin le. Mahse hei ka hmaah chapo takin a hawi sang vah a, ka mitah min melh kal chu a nih si hi, Pathian hian inthlahrunna chhete tal a pe ve lo a ni mah na. "I insawifiahna tur ka la ngaithla hman e", ka ti leh a, a thiamthu tal sawi turin ka la beisei fan a nih chu a nia.






"Chiang takin engkim I hriat tawh kha, a bak eng nge hriat i la beisei cheu", a ti sup a, nichin khan ka na tawh viau emaw ka intia, a kâ atanga chhuak chuan thudik ngei a ni tih a nem nghet a, chu chuan nichina ka natna te kha chu a nepzia a ti lang ni maiin ka hian, hmaichhanah ngei han hriat takah chuan a nat dan a dang a, ka kehchhe tak meuh meuh a ni.






Ka luggage chu lain pawn lam ka pan a, a thil rawn sawi avang chuan ka kal lai ka tawp chat mai " I tân vek a sin engkim hi ka tih ni", a ti a nih kha, mak takin a âwah chuan danglam a awm tih ka hria, eng nge a nih ka hre lo thung, ka inher a, a hmel ka hmuh takah chuan ka hresual a nih ka ring leh ta zawk. Ka nun a ti chhe vek chu ti chung chuan ka tana ti a nih a la sawi ngam cheu a nia.  Khum lam chu ka pan a, side table-ah chuan kan inneih zungbun chu ka dah a, ka chhuah dawn thleng chuan a dinna ngaia dingin min en mawl tawp a, ka hnung chhawna ka kalsan ta ni.







End of Chapter Seven








Popular posts from this blog

REDAMANCEY 1

REDAMANCEY  CHAPTER - ONE  ZIAKTU : OLACEE RUSSEL  Ka mu lai chu min ti harhtu awm ang mai hian ka harh kawk a, thawhphan pawh nei lo chuan ka thu chhuak hlawl mai, ka hawi kual a engkim chu ka mut dawna a awm ang vek khan a la awm,  eng nge hmuh ka inbeisei pawh ka hre chuang lo, thil danglam ka zawng a ni ber. Ka mut thlak leh rual chuan thâwm ka hre ta, nichin aia chiang zawk mah khan ka harh a tih theih awm e. Hlauhnain min rawn man a, ka tha a khur nghal der der mai, chet nachang pawh hre lo in ka awm ngai chuan ka awm a, ka room kawngkhar chhung lama ka kalh chu ka melh ngar bawk. Hriatpuia ka ngaihtuah chhuah rualin room leh lama a mu mai mai pawh ka lo thlamuanpui thinzia ka hre chhuak. Ani te chu naktukah a rawn haw chauh dawn tih ka hria, chu pawh an hna an zawh fel hman chuan tih chauh a ni, Lungleiah hna pawimawh a awm thut avangin a zin a, ni thum lai a châm tawh. Mahse chu chu ngaihtuah hman pawh ka ni tawh lo, engtin nge ka tih tak ang, ka biru mai daw...
Read more

REDAMANCEY 10

REDAMANCEY  CHAPTER : TEN ZIAKTU : OLACEE RUSSEL  Ka hawi chhuah chuan khua a lo êng uar tawh a, ka tlaivar chiang ngei mai, ka mit a thip thum a, ka lu a na ngut ngut bawk. Ka tho chhuak a, damdawi ka ei ta nghal a, ka zia mai chuan ka ring. Vawiin hi inrinni a ni a, Ruatsanga ka lo tiam tawh ang ngeiin park-ah kalpui ka duh a, kar tirah khan ka book lawk vek tawh bawk. A duh ang chu ka theih phawt chuan tihpui zel ka duh a, ka ngaihsak a ni tih hi ka tawngkam mai ni lo, ka chezia thlenga a tam thei ang ber tih lan ka duh a. Nuin a fa tana hmangaihna a pek theih ang zawng zawng pek ka duh bawk, ka dawn loh, ka lo awh thin thil tam takte nen! Zing dar 5 a rik chuan Ruatsanga chu ka kai tho a, ka tih fai leh te te hnuah zingkar boruak tha dawng turin kan chhuak zui nghal a, la hma viau nângin motor tlan erawh hmuh tur a tam leh tawh hle. Kan nufa chuan kan inzui ve zel a, boruak a thiang tha bawk a, ka harh hawk a ni mai, ka luna pawh zia tawh tak a ni. Hriatpuia nena kan inthe...
Read more

REDAMANCEY 8

REDAMANCEY  CHAPTER : EIGHT  ZIAKTU : OLACEE RUSSEL  "Lalrin i hman em, Harold-a tlai dawn nia",  Mami chuan a rawn ti lut lang lang a, Bawihtea neck tie awrh thattir mawlh mawlh pah chuan ka hman tep thuin ka chhang a, ka dan ngai te bawkin ka fapa chu nitina ka hrilh thin chu ka hrilh leh mawlh mawlh tawh a "Bawihte mi tihbuai hmasak loh tur aw, schoolah harh miah loh tur a ni bawk a, zirtirtu te thu awih hle bawk tur, miin an tihbuai hmasak che chuan vawikhat tlawm a tawk ; vawikhat i hnar ang nga an la cho viau che chuan chak ngei ngei turin i tang tur a ni, mahse mi tihbuai hmasak loh tur", ka ti mawlh mawlh a, hrethiam tak tak ve niawm hian a lo bu ve nghauh nghauh a. "I fapa hi chu i chuang ve alawm, fighter nihtir hi i tum em maw ni", kan thusawi hre pha tih hriat tak hian Mami chuan room pawn lam atang nui ar ar pah chuan a rawn ti lang lang a. Kei pawn ka thusawi chu a dik lo tih ka hria, mahse a inven dan tur ka hrilh niah ka in ngai, miin hnuai...
Read more