REDAMANCEY 9

REDAMANCEY 

CHAPTER : NINE

ZIAKTU : OLACEE RUSSEL 

In kan thlen chuan Ruatsanga chu a chau ve deuh a nih ka ring thutthlengah chuan a thu zawi ve ngiai a, kan thil leiho ka dah fel zawh chuan a bulah ka va thu ve a, min lo ngheng nghal chiai mai. "Anu, a u Hlutei hi khawiah nge", a rawn ti a, Hlutei a hmu lo chu mak a ti ve deuh a nih ka ring, "Vawiin chu hna kan bang hma a, ka ngai tawh lutuk che a, au Hlutei kha a buai a, ka lo hruai che a nih hi", tiin ka hrilh a, a bu ve nghut nghut mai. 

Kar loah a muhil zui a, school han kal ve tawh mah se naupang tih takah ni a la vui zo lo a, chhunah a mut erawh chuan zan kan meng rei thin khawp mai. Dîmtein khumah chuan ka mut a, room atang chhuak ta nghalin sana ka en chuan dar 3 a la ri lo deuh a, rawng bawl nan a la hma bawk nen, hman ni ni tiin inchhung chu ka tifai ta a, hnawk tak erawh a ni lo. Naupang mah ni se Ruatsanga hi che hnawk rum rum chi kha a ni lo a, a ri ve hluai ngai lo bawk.

In ka tih fel zawh chuan tlai dar a pel fel tawh a, Ruatsanga thâwm ka hriat chuan room lam ka pan vat a, ka rin ang ngeiin khumah a lo thu a, min lo ban vat bawk. Pawm nghalin chokaah ka hruai phei a, mut a kham chiah lo em maw ni a tawng duh lo reuh hle a, ka biak ka biak takah erawh a nui veleh ta var var mai. " Bawihte ka phone chu va la lawk mai teh, ka kut a lak lawh em mai", ka ti a, sosage ka kang mek a ni.

A tho ve nghal mai a min rawn pek chuan lo ban nghal vatin min lo call tu ka en a, number hriat loh a nih avangin nakinah call back mai tur chuan phone chu dawhkanah ka dah a, "Ruatsang, saturday hian park-ah kal ila", ka tih chuan phur zet hian a lo khek nghal raih a, "tuiah cheng leh ang aw",  "ramsa awmnaah pawh khan kal leh ila", a lo ti nghal vat vat a, nuih hak pah hian "ramsa awmnaah khan chu next-ah aw", ka ti a, pawm tih hriat zet hian nui var var pah hian a lo bu nghut nghut a,ramsa awmna a tih chu sa huan a sawina a ni.

Artui ka kan zawh leh takah chuan chaw ei kan siam a, kan nufa chuan hlim takin kan ei zui ta a. Chaw kan ei kham a, hmunte kan tih fel zawh chuan, a homework kan ti nghal a, a ziak ve malh malh a, a homework dang tih leh kan tum chuan Apple lem in print sa, rawng a chei tur a lo ni a, a rawng ho chu a dah darh nuai chu kan han zawng khawm leh rih a. Kan zawng hmu kim lo hle a, kan hman tur phei chu a hring chiah kan zawng hmu a, thenawm dawrah kalin kan va lei leh rih a. Kan let leh hnu chuan phur zet hian a chei ta nghal a.

A mutthilh meuh chuan dar 11 a pel thui viau tawh, ka inbual ta nghal a, rei erawh ka inbual lo. A bulah chuan ka va inthawlh ve nghal a, ka kuah nghal chiai mai, kar loah ka muhil zui ve ta nghal a. "Anu anu tho ang", min sawi dat datah chuan ka harh a, Ruatsanga min ko ri ka hre zui nghal a, tho ve nghalin kan inphih harh a, walk turin kan insiam zui leh nghal a. Kan pahnihte chuan kan inzui ve dat dat a, kan nui leh bawk bawk thin a, a nuam kan ti viau mai.

Office ka thlen chuan nidang ang bawkin ka thawhpuite an lo la thleng hlawm lo a, pawn lamah office dawr tur ho erawh an tha hnem leh viau tawh. Ka hna hi thu chunga thawh mah ni se a chauh thlak ve viau a, ni lenga computer hmaa thut chu mit pawh a rim ve hle. 

Kan ban chuan in lam panin ka inkhalh haw nghal a, chutia thlamuang taka ka tlan lai chuan ka hnung lam a ri zui chawrh a, ka tlu chu a ni nghal der mai. Ka mut dawn ngai chuan ka mu reng a, ka ke ding lam chu a na viau mai a, a nat em vang chuan ka che lawk thei lo, ka mit ka chhing vang vang a, Ruatsanga ka mitthla a rawn lang zui nghal a, ka tap lo chauh a ni. 

"Ka tih palh lutuk, i na em", tu emaw hian scooty rawn tun thawh pah hian a tia , ka la meng chuang lo, kan chhen vela mipui tawng thâwm pawh ka hria, ka meng chhuak riai riai a, mi pakhat hian hnai zetah min lo bih a, min tih harh a lo tum a ni. Chutia ka meng a hmuh takah chuan hahdam hmel zet hian a thaw huai a. Min thut tir a, din erawh ka la ding thei lo, ka ke ding lam chu ka ti che ngam reng reng lo. 

Kan chhehvela mite bulah chuan chu pa chuan min buaipui tur thu sawiin chungho pawh chu an kal darh ta a, ka lam a rawn hawi chuan ka lo en ve reng a, mipa sang lam, thau lam eia cher lam pawl mah, vun ngo lutuk lo a ni a, a inchei dan pawh a zahawm khup mai. "Ka tihpalh lutuk aw, ka tum reng vang a ni hauh lo a nia", a ti leh a, min su tu a ni tih ka ring thiam nghal a, min su na lo chu ka hlawm hle.

"A pawi lo", bul ang reng tak hian ka lo ti a, ka ke a na a nih chuan hna ka thulh ngei angai dawn a, ka lungawi teh chiam lo a ni, a lakah erawh tihlan ka tum lem lo. "Damdawiinah ka hruai ang che", a tih leh chuan ka lo hnial vat a, ka scooty kha khawiah nge a awm tih hriat tumin ka hawi kual a, ka rilru lo hria niawm tak hian, "I scooty chu ka driver-in workshop-ah a chhe lai a awm em tih en turin a kal pui a", a lo ti leh vat a, "Damdawiinah chuan kal ang", tih pah hian zo zetin min pawm tho a, lo tang ve thung mah ila, ka ke ka hmang thei miau lo a, hnialin awmzia a awm lo.

A carah chuan dim zetin min thuttir a, amah chuan motor chu a khalh ta nghal a, ka ke na chuan min tur ut ut a, a hmuh loh tur chuan ka ner ka ner mai, Ruatsanga ka ngaihtuah a, haw har min ti tawh viau mai thei a ni, khua lah chu a thim titih tawh a, Hlutei awm vang erawh chuan ka hahdam deuh. "Ruatfel tiin min ko thei ang", a tih chuan ka en vat a, min en lo chuan a motor khalhah ngawt chuan a rilru a pe ni mai tur hian hma lam a melh ngur a, ka rilruah Hriatpuia a rawn lang zawk a, ngaihtuah thui duh lo chuan hmalam melh pah hian "Rintei", ka ti sap a.

A inthiam loh thu a sawi mawlh mawlh a, chu ti na na na chu tiin kei pawh chuan tha tak chuan ka be ve ta a, hospital thlen hma chu ka ti ti ve tak nual kha, damdawiin kawt kan thlen chuan motor a park a, ka lo nghak rán a, a seat atanga chhukin motor a kal hual a, ka motor kawngkhar a rawn kawng zui zat bawk. Min pawm leh a tum chuan "min kai zawk rawh", ka lo ti vat a, khua a thim fel vek tawh a, mi erawh la tam tak an ni.

Inbat tung chung chuan damdawiin chhung chu kan thleng ve thei ta hram a, min lo en nghal zung zung a, ka ke ruh a lo pelh a ni awm a, adangah erawh na ka nei lem lo a, khatia min rawn sut khan min su na hran lo a, ka ke pawh ka scooty min delhna a ni, mahse min su lo se chuan min delh lo ang. Damdawi in atang chuan bai auh auh chung chuan kan chhuak a, a darah ka kuah run a, ani pawn min chelh bet run bawk. Ka ke chu an tuam var luk a, karkhat vel chu ka hmang thei dawn lo a, indim turin min chah uluk viau bawk. Hna lam ka ngaihtuah nen ka mangang ru viau mai.

"Ruatfel", ka tih chuan min rawn en vat a, "eng nge ni", a lo ti ve vat bawk, "engtin nge kan in kawng I hriat", mak ti zet chuan ka lo ti a, kan in kawng ka la hrilh miah lo tih ka hriat chhuah khan hrilh ka tum khan a lo tlan dik chat a, a mak ka ti a ni. A nui a "ka hre hleinem nichin khan helam kawngah hian i tlan sia, i hawna tur lam a nih ka ring a, ka tlan ve tawp", a tih a, ka lo nui ve hak mai, mi thil chik tak a nih ka ring. "Kha tah khan kual chho rawh, chuan vei lam i peng leh dawn nia", ka lo ti nghal a. Ka sawi ang chuan a tlan zel a. Rei loah kan in kan thleng a, kan inchhung thleng chuan min kai lut a.

Hlutei'n chutia ka ke an tuam var luk leh ka bula mipa a hmuh chuan a hamhaih deuh a, Ruatsanga erawh chuan ka ke chu a lo en a, Ruatfela a hmuh vang chu nge ni ngawi reng hian a awm a, a zak deuh a nih ka ring, Hlutei bulah thi awmzia ka sawi nghal zung zung a, kan rei chhan te ka sawi zawh chuan a lo hrethiam khawp mai. Hlutei chuan rei awm tawh lovin min haw san a. Ka thutna bula rawn thut ve pahin Ruatsanga chuan "Anu a na em", a tia a, a tap deuh titih a, a nat loh thute chu ka hrilh a, a la men par tho.

Kan nufa in be thâwm chu Ruatfela chuan ngawi reng hian min lo thlir a, haw ve a la tum lo em maw ni. A lam chu ka hawi a, chiang zet hian min lo en a, "va haw tawh rawh", ka ti a, min chhang lo thung, min ep chiah a thut thlengah chuan a thu a, kei leh Ruatsanga chu min en tawn sek bawk. "I fapa maw", a tih chuan a nih thuin ka lo chhang vat a, a bu nghut nghut a. "Ka hmuh hnu a ang hle mai", a ti leh chuan a hmel chu ka lo en chiang deuh a, mak ti hmel a pu tih ka hmu zawm zat bawk. Mipa ngang a ni bawk a, a buai rei lo hle, rei awm tawh lovin a haw ve ta nghal a.

Kar hnih zet a liam leh tawh a, ka ke pawh ka hmang ve sawih sawih thei tawh a, pangngai taka kal nan arawh thlakhat vel zet a ngaih ka ring. Ruatfela'n min rawn tlawh zing hle a, Ruatsanga pawn a nel tawh hle, a be sawm thiam em em a, a infiam pui peih bawk, kei nen pawh kan nui dun zing ve ta viau. Sawi hmaih theih miah loh chu kar liamta khan Mami'n pasal a nei a, Ramhlun a mi a nia, an inneihnaah ka kal ve thei ta si lo a, mahse kan harsatna te hriain min hrethiam viau mai.

Ka ke pawn hma a sawn viau a, ka hmang ve leh thei tawh a, kal zawng hian la na deuh mahse na tak a ni tawh lo a, a kal luih theih mai. Hna pawh ka zawm leh tawh a, engkim chu a ngaiin a kal leh tawh a tih theih awm e. Ruatfela nen pawh thian tha tak kan ni zui a, mipa fel tak a ni, Ruatsanga hlei hlei hian a ngai na a, a hmuh loh rei chuan a lam ve deuh reng zel.

Kan in lam pan chuan ka kal zel a, khua a thim fel tawh a, ka scooty tlan loh ni anih vangin taxi in ka kal a, jam-ah kan tang rei leh ta sia, khuain min thim hnan tawh a ni. Kan in pêngah ka chhuk tur chu ban tha chak zetin min rawn phih her lawp a, ka au tur chu ka hmuiah a hup nghal chawt bawk, kan inchungte inpiah thim lai deuh chu min pan pui a, a hmel ka hmu miah lo chung pawn tunge a nih hre chiang tak ka ni.

A purfume rim te, a chezia leh a taksa khauh tung te chu hai lo tak ka ni, ka hmui a hupna kut chu ka theih anga na in ka seh a, a rum nghut a a kut a la sawn zui bawk, ka kut a man behna erawh a la thlah lo, alam hawiin min kuai ker a, ka kut erawh hnung lamah a man bet ve ta thung. "Min thlah nghal rawh", ka ti nghak hluk a, ka duh angin ka che thei si lo, ka thinrim tun mai. 

"Hahdam phawt rawh", dam zet hian a rawn ti a, a hmel chiang takin ka hmu thei lo a, kan awmna a thim deuh bawk nen, thim zingah chuan bengchheng si lo in kan in pawt nawk nawk mai, ka au ring dawn lo a ni tih a hriat vang a ni mahna, mi kawngkal an awm lo hlauh erawh ka lawm tak zet, ngaihdan mak sak zet an nei leh ang a. "Kal bo rawh", ka tih chuan za lo deuh hian a nui a, ka kut a vawnna atanga tal chhuah ka tum chuan a hmer nghet sauh a.

"I kut a anat zel i duh loh chuan awm hle hle rawh", ka kut chu a na tawh em a ka che zel duh tawh bik lo, hrethiam ni awm tak hian min vawnna a thlah dul deuh a, tal chhuah theih erawh a la ni chuang lo. "Kal bo rawh" ka sawi ngai bawk chu ka sawi leh a. "Ka thlah zalen rei tawh mah mah che u, kan inneih leh a ngai", aw zawi tak fiah zet si hian a ti a, zak thei lo ka ti ngang mai.

"I mi hriat chian loh chu hnaih tur i ni lo a sin, eng buainaah nge i intah luh hi i hre kher lo ang, a hma kha chuan ka hum thei mai zel che a, tunah erawh nangmah ngeiin i hnaih zel chu a nih hi", chang zet hian a ti a, a thusawi awmzia ka hriat loh ang bawk in ka thu sawiin awmzia a nei lo tih ka hre bawk, ngaih pawimawh tlakah ka ngai lo na sa.

"Ven him ka ngai lo a, eng buaina mah ka thlen hek lo", ka ti ve salh a, ani erawh chuan "Ka hnenah awm leh rawh u, he hmuhah hian ka fapa nen inhim lo, buaina in a rawn pan che a, nângin i lo hnaih ve zel a, rawn kir leh rawh u, hun in nei tam lo a nia, hre reng rawh hnaih tumtu che u hi i hre chiang lo a ni", a ti a, ka ngawi reng a, chutah ka nui ta sang a, "nang zawk hi buaina i ni mai lo maw le, ka hmaah rawn inlan tawh lo la, kan him a ni mai", ka lo ti a.

"Hre reng rawh, hun kan ngah tawh lo a nia, kei chuan in himna hi ka ngai pawimawh ber", a chawl dat a, rawn sawi zawm lehin "Ruatfela hi hnaih suh, tu nge a nih chiah i hre chiang lo a ni", min thlah a, a hawi kual thuak thuakin, a kal leh tur chiah chu min rawn en a, ka lo en ve reng bawk, rawn kal hnaiin ka chalah a hmui lum vang vangin a rawn fawp a, chet mai nachang pawh hre lo in ka lo dawh mawl tawp a, a chezia chu mak ka tih em vang a ni.

Min fawhna chu thlahin min en vang vang a, cap dum rawn lek kangin a khum a, a incheina ka han en takah chuan a dum vekin a lo inthuam a, a lukhum pawh a dum tho a ni, "ka tihnat che avangin ka tihpalh", ti a, kal sawnin thim zingah chuan a pilbo ta a ni. Chet lawk nachang pawh hre loin a kal liamna lam chu ka melh ngawt ngawt a, a thusawi te kha ka awih hauh lo, eng vanga khatiang rawn sawi nge a nih tih chuan min tibuai zawk. 

Kawngka ka hawn dawn chuan ka ding leh vang vang a, Ruatsanga'n hetiang hmelpua min hmuh ka duh lo a ni, thawk ka la vang vang a, hlim hmel put hram hram chu ka tum a ni, kawngka ka kik a, Hlutei'n a lo hawng vat a, "Ka rin aiin in tlai daih", a lo ti vat a, a lakah chuan ka inthlahrung kher mai, a hawna tur ka tibuai vek awm si a, "A zia lo tak tak a ni, kan thawhpui a tlusual thut a, damdawiinah kan kal pui a", tiin dawt ka sawi ka ngawt a, a sawi zui loh danah min awih ve mai a nih hmel.

"Ruatsanga a muhil tawh a, a nghak ve reng che a, chhunah a muhil si lo a, a mu ta a nih kha," a lo ti nghak zung zung a, chaw a ei tawh leh tawh loh ka zawh chuan a ei tawh thuin min chhang a. "Ka haw nghal mai ang aw", a tih chuan ka bag atang chuan pawisa ka phawrh a, "kha i hawna tur ka lo pe ang che", tiin a kutah ka hmeh bel chawt a, "a ngai lo inthlahrung duh mah ta che, ka hna alawm tiang te chu, tlai chang te chu a awm ve tur alawm", tiin min lo hnial a, mahse pek ka duh ve tlat, min hnial hneh ngang lo chuan lawmthu sawi mawlh mawlh chungin a haw ve ta a nih kha.

Ruatsanga lo mu tawh chu ka lawm ang reng, ka rilru a buai rih em a, anu hetiang teh hrepa min hmu tur chu ka duh lo a ni, ka inthlak zawh chuan a mutna bulah chuan ka va kal a, a muhil hmel chu ka thlir vang vang a, khatiang teh hrep kha ni lo ila chuan 'pa' tia koh tur a nei ve ang nga, hlim takin an infiam ve tur a nia. Ka ngaihtuahna chu duh loin a bulah chuan thu thlain a chalah ka fawp vang vang a, nghet zetin ka kuah bawk, a muttui hle a ni ngei ang a harh eih lo reng reng.

Ka harh leh chuan kan mut dan ngai ngaiin kan lo ka mu a, sana ka en chuan zan lai dar 12 a lo ri tawh. Tho chhuakin ka inbual ta nghal a, zan inbual hi ngaiah ka nei tawh a, ka inbual ngei ngei zel. Ka lu na lutuk vang chuan ka su ta ngawt a, ka harh hawk ni main ka hria, shower hnuai chuang ka ding reng a, Hriatpuia thusawi te ka ngaihtuah a, kan himna a ngaih pawimawh ber thu a sawi a nih kha, tin fapa a nei a ni tih a hre bawk a, a kal dawn khan "ka tihnat che avangin ka tihpalh", a ti a nih kha.

A âwah a tih mai mai lohzia ka hre thei a, mahse rin ka leh ka duh lo, a lemchanna mai a ni tih chu inrintir ka tum a ni. A thusawi pakhat erawh kha chu ka zawn ngei ang, tumah hi ka ring leh tawh ngai lo ang a, ka hriat chuan loh chu ka hnaih ngai bawk hek lo ang, Ani ngei pawh kha. Ka mitthlaah ka chala a fawh lai kha a lo lang a, ka mittui a lo luang ngiai ngiai mai, khang kum 5 chhung zawng khan ka mittui vawikhat mah a tla ngai lo a, kan inthen pawh khan ka tap thei reng reng lo khan a nia.

Tunah zet zawng dan rual lohin ka mittui a sur zung zung a, ka lo ngaih thinziate kha ka hrechhuak ni maiin ka in hria, mamawh lo ang taka lan ka tum thin a, a tel loa ka awm theihzia lah ka chet dahah lantir ka tum thin, chung hmang chuan midang mai ni loin kei ngei pawh ka inbum a, ka chhungril takah erawh ka theihnghilh ngai reng reng lo a, ka chunga a thil tihte kha hriat ka tum tlat zawk thin a nih kha, khang Athil tih zawng zawng vang khan huat ka tum thin a, mahse ka thei ngai reng reng lo.

Huat a hnekin ka ngai zual tulh tulh mai si, "tinge ka hlim ve tan chiaha ka hmaah i rawn in lan leh", ka ti chhuak a, ka tap ta nghal hawm hawm mai. Khang kum chhung aka tah loh zawng zawng kha ka tah kep emaw tih mai turin ka tap vang thei lo a, ka mittui lo luang te chu shower atanga tui lo inphuh chhuak nen chuan a inluan pawlh vek a, tui chuan a tleng fai zel a, a dang a lo luag leh zel bawk a.

Chau zetin khumah chuan ka mu a, ka mut erawh a chhuak eih lo reng reng, ka let kual sek a, atawpah phei chuan thlang lam pang balcony-ah chuan ka va chhuak ta ngawt a. Thliin min rawn chhem rualin a nuam veng veng ni maiin ka hria , chair-ah chuan ka thu a, Aizawl khawpui pe un chu ka thlir a, zan a tlai tawh tehreng nen motor an la intlan pel zut zut a, ka thlir reng a. 

Hriatpuia kha khawiah nge a awm ang? A haw ve tawh ang ngem le? Nupui a nei tawh ang ngem le? Tih chu ka inzawt mawlh mawlh. "Kan inneih leh angai", a ti a nih kha! A nih chuan nupui a la nei lo tihna a ni mai ang ngem? Eng vangin nge kan inneih leh kher a ngaih, kan inneih leh nachhan tur ka hre hauh lo, a kianga awm leh nachhan tur ka nei lo bawk. Kei chuan ka fapa nena hlim taka awm a, thlamuang taka nun chauh ka duh a ni. A bak eng thil dangmah ka duh lo!

End of Chapter 9