REDAMENCY 11

REDAMENCY 
CHAPTER : ELEVEN
ZIAKTU : OLACEE RUSSEL 






Hriatpuia lo riah zan atang khan kar khat zet a liam leh tawh a, eng vanga a rawn kal leh beisei tlat nge maw ka nih le! Kei hi ka â tawh tak zet a ni, ka laka a tawngkam khat vang maiin beiseina ka lo nei a, hmangaih a nei tih hrereng chung pawhin ka hnar zo lo thelh chu nia. Engtiang takin nge min ngaih ang? Kha thil thleng vang khan ka takah a huang tau sawt mai ang ngem? 





Chutia rilru buai zeta ka awm lai chuan kawngka kik riin ka ngaihtuahna a la peng a, kawngka ka hawn ruala ka mi hmuh avang chuan ka khek raih mai. "I dam tha maw? Kan va inhmu khât ve?", tiin ka lo zawt vat a. 





"Ka dam ka dam, ka zin ka rawn haw chauh alawm, khaw nge Ruatsanga? I ke chu eng nge a an tawh?", a ti nghal bawrh bawrh a, a thâwm hi chu a ring thin alawm. "A muhil tawh, chhunah a mu lo a", ka lo ti vat a, sana ka melh pah zeuh a, dar 8 rik nan minute tam a awm tawh lo. "Chuan i ke chu", mit ko san zeuh zeuh pah hian a ti leh a.





"A dam tawh, ka tha vek tawh alawm", ka tih chuan lawm tih hriat zet hian a nui a, " A va tihzia ve, kal thei loin i lo la indawm kur ngai ang tih ka hlau ve deuh a", a ti leh nghal zat a, "Lalruatfel, uang uang suh", tih pah chuan ka melh rum a, sawifuh inti zet hian ani a lo nui thung a.






Dar kar chanve vel zet a thut hnu chuan min hawsan ta a, a thâwm a lian bawk a, a kal chiah chu a reh nghal ruih mai. A haw hnu chuan ka intifai leh thuak thuak a, ka mu ta nghal a. Ruatsanga muhil hmel chu ka thlir a, a va han tha tak em! 









A pa khan eng nge a tih ve ang? A mu ve tawh ang ngem le? Ka ngaihtuahna chu duh lo in ka lu ka thing a, a chalah chuan ka fawp zeuh a, insiam remin mutthilh tum chuan mit ka chhing zui ta nghal a.







Ka harh leh chuan dar 6 a lo ri tawh a, ka bula tui zeta muhil chu ka en a ka nuih sak mai, thawhhlima hmuh atan chuan a tha mah mah a ni. A lamah chuan ka tawlh hnai sat sat a, ka kuah a, ka che velah chuan a rawn che ve tiah tiah a, "A nu, ka walk peih lo a nia", tho phang aw zet hian a rawn ti a, ka nuih leh rih a. "Nga ti maw? Walk kha nuam i ti emaw ka tia", ka tih chuan, "A nuam a chu maw, a nuam ka ti tawh lo", a ti teh tlat a, a peih tâk ngang lohah chuan kan walk ta lo a.






Chu tia ka nufaa kan ti ti lai chuan ka phone a lo ri a, ka en chuan Hlutei a lo nia, "Aww Hlute", Hello pawh ti buai peih loin ka ti a, a aw a thian kharh a, "U Rinte, ka pu a boral a, kan khaw lamah ka haw rih a ngai a, hna ka lo kal thei rih dawn lo a, ka inthlahrung viau na in min lo hrethiam thei hram ang ngem le?", a rawn ti a.






"I pu chu a va zia lo ve, eng na nge a? Inthlahrunna tur a awm lo a nia", ka lo ti vat a, "Ka la hre chiang vak bik lo a, stroke lam ni awm tak a ni, min lo hrethiam hram mai aw", a tih leh a, a inthlahrung lutuk chu ka awm a ti nuam lo letling zawk a. Chhel taka awm tur leh tluang taka kal turin kan inthlah ta a nih kha.







"Anu tunge a?", tiin Ruatsanga chuan min lo melh chho kiau a, "Au Hlutei, a pu a boral a, a lo kal thei rih dawn lo a, i ngai dawn em?", ka tih chuan a lo bu ve nghauh nghauh a, 'boral' tih chu a la hrethiam chiah lo a ni tih a hmel buai deuh nakah chuan ka hre mai a, ka nuih sak mai. 







"Bawihah fel deuha awm tur aw, inban vel leh ka lo hruai dawn che nia, chuan mi tih buai hmasak loh bawk tur aw", ka tih chuan a bu nghauh nghauh a, "Nu banah icecream min lei thei ang ngem?", a ti a, "yess lei dawn chiang, a dang pawh kan lei ang", ka tih chuan hlim zet hian a khêk raih a, "le kal tawh rawh le, saw i thianteho pawh an lut vek tawh a nia", tiin kan invai liam ta a, gate a luh hnu, a lan phak loh thlenga ka thlir hnu chuan keipawh hna lam pain ka inkhalh liam ve ta a.







Computer hmaah chuan ka thu a, sana ka melh leh zeuh a, dar 12 a rik rual chuan kan boss office lam chu ka pan a, kawngka ka kik karh karh a, lut tura min sawm ri ka hriat rualin ka lut nghal vat a, "Sir, rem i tih chuan vawiin hi ka haw hma thei ang ngem le? Kan nauin hian rokhawlna avangin an khaw lamah min haw san a, ka fapa school ah lam a ngai a", inthlahrung ru tak chuan ka sawi a, a tarmit phenah chuan min melh kar a, a tarmit chu a nawr chho zeuh bawk.








"Aw le, hna i thawk tha thin bawk a, sawi nawi i nei ngai lo bawk a, i haw hma thei ang", a tih chuan lawm zet hian ka nui a, lawmthu ka hrilh mawlh mawlh hnuah ka chhuahsan a. Hmanhmawh ru zet hian ka inkhalh chhuak a, jam-ah ka tang leh rih thin, sana ka melh ka melh tawh a, an ban hun minutes 10-in a pel tawh, min lo zawng nasa tawh ngeiin ka ring.







A reia reiah chuan ka inkhalh thleng ve ta hram a, mahse le ka va thlen chuan Ruatsanga awm reng reng ka hmu lo, ka hawi kual vel a, ka hmuh tak mai lohah chuan an zirtirtu ka call ta ngawt a. Ka thu hriat chuan min ti mangang tak zet, ka dinna ngaiah chuan ka han ding ren rawn a, "A pa'n a rawn hruai a", a ti a nih kha. Khawiah nge a hruai ang? Eng vangin nge min hrilh hmasa lova a lo hruai ve rik ngawt.






Horn ri tuarah chuan ka harh zawk a, hmanhmawh zeta inkhalh chhuakin in lam ka pan a, ka kalh chak bawk a, ka thleng har lo, "Ruatsang, bawiha" tiin step atang chuan ka au a, hmanhmawh zetin ka tlan thla bawk. In erawh chu kan kalsan dawn ngai ngaiin a lo la inkalh tha thap bawk si. Ka mangang lutuk chu ka tha a khur a, ka tap titih der mai.







Hriatpuia ka ngaihtuah chhuah rualin ka phone ka phawrh a, ka tha khur nasa lutuk chuan ka duh ka hmet fuh mai thei lo a, a hming ka hmuh rualin ka call ta nghal a, a vawikhatna chu a ring ral thak a, ka ti nawn leh a, a rei ka ti tak zet, ka mittui a luang zung zung a, "la hram teh", tiin ka phun sup a, a ring ral leh thak a, ka call leh pawh chuan chhanna a awm lo.







Hmanhmawh zeta stepa tlan chho leh hlawk hlawkin ka scooty ka tinung a, Aizawl khaw pawn lam chu ka pan ta vang vang a. Gate bulah chuan ka ding a, a reh thuap mai, ka phone bawk chu phawrhin ka call leh a, ka hawi kual a, guard tumah hmuhtur awm lo chu mak ka ti viau bawk, "Hello", a tawp tawpah chuan a la ve ta hram a.







"Ka fapa hruai turin ka rawn kal, khawiah nge i dah", ka ti nghal a, ka thinrim lutuk chu ka tha a khur a, ka mittui a tling nghal pam bawk. "Eng nge i sawi awmzia", a rawn ti dam thlup a, a awmdan hahdam lutuk chuan ka thin a turin zual a, "lemchan kual vel a ngai lo, a school bang i lo va hruai a ni lawm ni, tunah i in kawtah ka awm, ka fapa ka rawn hruai dawn", ka ti nghal zung zung a.







"Gate kha chhuchhia la inchhungah khan lo va lut rawh, ka rawn thleng har lo ang", a ti dam leh thup a, "Engvangin nge i thusawi chu ka zawm ang, ka hnenah rawn hruai vat zawk rawh", ka lo ti vin nghal hluk a, "Bawiha te school ah ka kal lova ka hruai hek lo, khawngaihin ka sawi ang chuan ti phawt rawh, gate tala kha chu chhia la inchhungah lo va awm rawh, vatin! Ka rawn thleng har lo ang", a rawn ti nghal zung zung a, a hmanhmawh hmel hle bawk.







A thusawiah khan hlauh tur a awm miah lo nangin min ti phili a, ka piahah lung chu la in tala chu ka chhu a, a chhe har lo, hmanhmawh zetin inlam ka pan a, tala bawk chuan a lo inkalh leh a, ka chhu chhe leh nghal a, ka lut ta vat a, thu hle hle thei lo chuan chhuatah chuan ka vei tawn sek a, rilru tihfim tum chuan a thil thleng chu ka ngaihtuah kir a,  Hriatpuia ka biak khan a hriat hmel loh hle a, a nih chuan midangin an hruai zawk tihna em maw ni le, ka tha a rawn khur nghal dar dar a.






Engtin nge an tih ang, kut an thlak mai ang ngem, Engvangin nge an hruai, ka naute khan a hlau dawn lutuk, min lam min lam tawh awm si a, ka thiam loh vek a ni, an school ah khan kalpui a, veng a, nghak tur ka ni a sin le, chhuatah chuan ka thu thla hnawk a, ka tap nghal zawih zawih mai. Mahni inthiam lohnain ka khat a, nu nih tling lo ka inti tak zet bawk.






Kawngka inhawng thawm ka hriat rualin ka hminga min lo thawn ka hre zui nghal a, ka awmdan ngai chuan chhuatah chuan ka thu sawp reng a, ka lam pana a lo kal thawm pawh chu hre reng mah ila ka mang vek a, ka ngaihtuahnaah engmah a lut hlei thei lo, "Lo kal teh", tih pah chuan min lo kai tho a, min hruai ang ang chuan a kalna lamah chuan mumal lo zet hian ka zui ve tawp a, thut thlengah chuan min thut thlakpui a.






"Le thil thlendan sawi rawh le", a ti dam thlup a, a tawngkam dam lutuk leh min duatna aw ri chuan ka tah a ti chhuak zual a, ka inrin hmain a mittui a rawn tla a, han sawi ka tum pawh chuan ka tawng chhuak thei lo, a awmah min kuah bet a, ka tah chhung zawng ka hnungah duat deuhin a lo chul a. Rei tawk fang ka tah hnu chuan ka zia deuh a, thil thlendan a tira tanga a tawp thlengin ka sawi ta a.






Ka sawi chhung zawng chuan uluk takin a ngaithla a, a taksa a insan mar nasat danah a thinrim hle tih pawh ka hre thei a, insum a tum nasa viau bawk. "Ka kutah dah rawh! Hahdam tum bawk la", a sawi zawh rual rual chuan, "ka fapa a bo a, engtin nge hahdam se min tih, i engmah a ni lo a nih pawhin ka fapa, ka khawvel a nih hi, nang hi awm lo a chuan eng thil hi kan tawk lo vang. Kan hmaah i rawn inlan hma khan buaina kan tawk ngai lo, i rawn inlan a, harsatna hrang hrang min rawn siam a, nang hi buaina i nih hi", ka ti ta phiar phiar a, ka rilru buai thinrim lutuk chuan sawi tur leh sawi loh tur pawh an ka thliar hrang thei tawh lo.








"Min ngaithla phawt rawh, engkim hi ka siam tha leh vek ang tih ka tiam a che", a ti nghet churh a, "ka fapa kha min hruai kir sak leh rawh, tunahte hian engtin nge a awm ang, hrehawm a ti dawn lutuk, maw khawngaihin min hruai kir sak leh rawh", ka ti mawlh mawlh a, ka tap leh titih nghal der mai.







"Ka tiam a che engtin mah a awm lo ang, a chunga hetiang thil titu hi chu a awmdan tur a nep lo viau ang, ka rawn hruai kir leh dawn alawm", a ti nghet churh a, a tho a, phone phawrhin a hmet mual mual a, inchung lamah a chho ta daih a. Rei awm lovin a rawn chhuk leh vat a, a rawn chhuk chu ka lo en a, a thawmhnaw a han thlak a nih hmel, t-shirt dum a ha a, a chungah leather jacket a dum tho a inbel, chutiang bawkin a kekawr, a pheikhawk, a cap thleng chuan a dumin a inthuam a.







"Hetah hian min lo nghak thei ang ngem, pawnah sawn guard an awm a, engmah hlauhawm a awm lo, lo mangang lo la, ka fapa nen kan rawn kir leh ang", a ti nghet churh a.








End of chapter eleven.






Popular posts from this blog

REDAMANCEY 1

REDAMANCEY  CHAPTER - ONE  ZIAKTU : OLACEE RUSSEL  Ka mu lai chu min ti harhtu awm ang mai hian ka harh kawk a, thawhphan pawh nei lo chuan ka thu chhuak hlawl mai, ka hawi kual a engkim chu ka mut dawna a awm ang vek khan a la awm,  eng nge hmuh ka inbeisei pawh ka hre chuang lo, thil danglam ka zawng a ni ber. Ka mut thlak leh rual chuan thâwm ka hre ta, nichin aia chiang zawk mah khan ka harh a tih theih awm e. Hlauhnain min rawn man a, ka tha a khur nghal der der mai, chet nachang pawh hre lo in ka awm ngai chuan ka awm a, ka room kawngkhar chhung lama ka kalh chu ka melh ngar bawk. Hriatpuia ka ngaihtuah chhuah rualin room leh lama a mu mai mai pawh ka lo thlamuanpui thinzia ka hre chhuak. Ani te chu naktukah a rawn haw chauh dawn tih ka hria, chu pawh an hna an zawh fel hman chuan tih chauh a ni, Lungleiah hna pawimawh a awm thut avangin a zin a, ni thum lai a châm tawh. Mahse chu chu ngaihtuah hman pawh ka ni tawh lo, engtin nge ka tih tak ang, ka biru mai daw...
Read more

REDAMANCEY 10

REDAMANCEY  CHAPTER : TEN ZIAKTU : OLACEE RUSSEL  Ka hawi chhuah chuan khua a lo êng uar tawh a, ka tlaivar chiang ngei mai, ka mit a thip thum a, ka lu a na ngut ngut bawk. Ka tho chhuak a, damdawi ka ei ta nghal a, ka zia mai chuan ka ring. Vawiin hi inrinni a ni a, Ruatsanga ka lo tiam tawh ang ngeiin park-ah kalpui ka duh a, kar tirah khan ka book lawk vek tawh bawk. A duh ang chu ka theih phawt chuan tihpui zel ka duh a, ka ngaihsak a ni tih hi ka tawngkam mai ni lo, ka chezia thlenga a tam thei ang ber tih lan ka duh a. Nuin a fa tana hmangaihna a pek theih ang zawng zawng pek ka duh bawk, ka dawn loh, ka lo awh thin thil tam takte nen! Zing dar 5 a rik chuan Ruatsanga chu ka kai tho a, ka tih fai leh te te hnuah zingkar boruak tha dawng turin kan chhuak zui nghal a, la hma viau nângin motor tlan erawh hmuh tur a tam leh tawh hle. Kan nufa chuan kan inzui ve zel a, boruak a thiang tha bawk a, ka harh hawk a ni mai, ka luna pawh zia tawh tak a ni. Hriatpuia nena kan inthe...
Read more

REDAMANCEY 8

REDAMANCEY  CHAPTER : EIGHT  ZIAKTU : OLACEE RUSSEL  "Lalrin i hman em, Harold-a tlai dawn nia",  Mami chuan a rawn ti lut lang lang a, Bawihtea neck tie awrh thattir mawlh mawlh pah chuan ka hman tep thuin ka chhang a, ka dan ngai te bawkin ka fapa chu nitina ka hrilh thin chu ka hrilh leh mawlh mawlh tawh a "Bawihte mi tihbuai hmasak loh tur aw, schoolah harh miah loh tur a ni bawk a, zirtirtu te thu awih hle bawk tur, miin an tihbuai hmasak che chuan vawikhat tlawm a tawk ; vawikhat i hnar ang nga an la cho viau che chuan chak ngei ngei turin i tang tur a ni, mahse mi tihbuai hmasak loh tur", ka ti mawlh mawlh a, hrethiam tak tak ve niawm hian a lo bu ve nghauh nghauh a. "I fapa hi chu i chuang ve alawm, fighter nihtir hi i tum em maw ni", kan thusawi hre pha tih hriat tak hian Mami chuan room pawn lam atang nui ar ar pah chuan a rawn ti lang lang a. Kei pawn ka thusawi chu a dik lo tih ka hria, mahse a inven dan tur ka hrilh niah ka in ngai, miin hnuai...
Read more